《東張西望》熱話！3缺1雀局+白燈籠 炮台山地舖出現驚嚇紙紮祭品展覽 1,200居民聯署反對食環署都唔理？！

============

同場加映：

【家居達人】專家教洗冷氣機7大必知 滴水點處理？傳出臭味有原因！條喉塞咗DIY吹得通？

============

雖然話中國人殯葬儀式用嘅紙紮用品，例如大屋、房車甚至傭人等，真係「栩栩如生」，堪稱民間手工藝術，不過，如果日日出入屋企或者返工都見到，咪話唔「大吉利是」！炮台山油街一間商住大廈嘅相連地舖，由4月起就出現一間號稱「傳統紙紮工藝」嘅店舖，落地玻璃櫥窗入面，就恍如一個地府生活場景展覽，而呢間店舖嘅招牌係寫住「免費殯儀諮詢」，「殯儀有限公司」，呢啲大型紙紮用品令附近居住甚至返工人士都相當不安，紛紛兜路走，商場商戶就投訴生意大減，居民及商戶不滿之餘，更大件事係收到風，呢條街將會陸續有其他殯葬公司進駐！

雖然呢間地舖商舖話自己係「「傳統紙紮工藝」，其實係一間經營殯儀服務嘅公司。

落地玻璃櫥窗入面，就恍如一個地府生活場景展覽，壽衣及白燈籠高掛，嚇到居民都要兜路走。

如果登入呢間公司嘅網頁睇，公司係會提供一站式殯儀喪禮安排服務，有齊服務流程及價錢。根據《殮葬商規例》，經營相關殯儀服務嘅公司，需要向食環署申請殮葬商牌照，發牌條件非常嚴謹，不單止「須遮蔽店舖，使店外行人完全看不見店內情況」，而且列明招牌如果有「殯儀」及「安葬」等字眼都不獲發牌。但最「峰迴路轉」嘅係，經《東張西望》節目組調查過，竟發現呢間公司並唔喺持牌殮葬商行列！街坊話由4 月開始，從來無見過呢間舖有「開舖」或有負責人出現過。

根據《殮葬商規例》，經營相關殯儀服務嘅公司，需要向食環署申請殮葬商牌照，發牌條件非常嚴謹，嘅唔可以畀店外行人睇到店內情況，招牌字眼上亦唔到以有「殯儀」相關字眼。

1,200居民聯署   食環署仍然無採取行動
而《東張西望》節目組打過電話去公司查詢，的確有職員回答有關如訂殯儀館等嘅服務收費。節目組亦意外地撞到舖位嘅業主，但業主拒絕接受訪問，根據街坊報料，原來呢位大叔業主喺附近幾條街都擁有多間店舖，亦曾經係大廈業主立案法團委員，但因事跟其他人鬧翻退出，有街坊懷疑呢位業主為咗報復，故特登將舖位租畀殮葬商。

相關大廈嘅大廈業主立案法團一收到投訴，就已經喺附近幾座大廈及商場進行聯署，喺兩星期內收到1,200個簽名，上月底更召開咗特別街坊大會，請來區議員及食環署參加，但有業主立案法團委員表示，會議中食環署代表只不停重覆，如果店舖有申請到相關牌照，就要跟返牌照嘅規例做，亦即係話如果店舖係「無牌」，食環署係監管唔到！但街坊都認為，如果店舖無牌嘅話，就更加唔應該做要有牌商戶先做得嘅嘢！節目搵嚟李健志大律師畀意見，李律師表示食環署係有執法權，要求呢啲店舖申請牌照，若果店舖繼續無牌經營，最高可以罰款25,000元及監禁6個月。

大廈業主立案法團一收到投訴，喺附近幾座大廈及商場進行聯署，喺兩星期內收到1,200個簽名，更召開咗特別街坊大會，邀請區議員及食環署代表參加。

李健志大律師表示食環署係有執法權，要求呢啲店舖申請牌照，若果店舖繼續無牌經營，最高可以罰款25,000元及監禁6個月。

店舖負責人認為被街坊刻意打壓   律師建議可民事索償
節目組聯絡到店舖負責人，負責人承認紙紮品嘅擺放係刻意有故事性，但感覺絕不恐怖，並且強調係宣揚緊「傳統紙紮工藝」，而其他紙紮品店只係「唔識宣傳」！並謂業主好諒解佢哋生意，只係街坊唔明白佢哋嘅出發點，更感到被人刻意打壓！負責人亦承認「未係」有牌嘅殯儀承辦商，而家業務都係幫人，同埋傳承紙紮文化，仲話自己公司係「合法合規」。

但節目組向食環署查詢，回覆指無接受過有關店舖嘅殮葬牌照申請，並已收到4單投訴，已經搜集緊證據準備採取執法行動。而大廈業主立案法團亦查過大廈公契，其實地舖係唔可以做殯儀及相關生意，李律師話如有業主將舖位出租作相關業務，已經係違反公契。而大廈業主立案法團及居民，其實可以申請禁制令，要求將違反公契嘅嘢移除。如果影響到居民，或者影響到人流及令生意受損，係可以以民事途徑索償，彌補金錢上嘅損失。

負責人承認紙紮品嘅擺放係刻意有故事性，並且強調係宣揚緊「傳統紙紮工藝」，只係街坊唔明白佢哋嘅出發點，更感到被人刻意打壓！

大廈業主立案法團亦查過大廈公契，地舖係唔可以做殯儀及相關生意，李律師話大廈業主立案法團及居民係可以以民事途徑索償，彌補金錢上嘅損失。

而節目出街後，店舖聯絡節目組，話其實佢哋只係殯儀中介，並非殮葬商，唔算無牌經營，更加話同東區食環署有聯絡，係合法經營。節目組有聯絡食環署，對方表示無收過呢間公司嘅牌照申請，但無表示呢間殯儀公司現在究竟係咪無牌經營，署方表示會繼續跟進及搜集證據。

text/Joyce
photo/電視截圖