居屋2023 6大新屋苑環境配套逐個睇 邊個交通最方便？邊個校網最好？邊個大機會有噪音問題？

============

同場加映：

【家居達人】專家分享床單小知識！ 點樣揀床單？清洗方法+次數？

============

8 成單位位於市區    納米樓絕迹
今期居屋最有特色及吸引嘅地方之一，係當中約8成單位均位於市區，屬近年少見，而且面積最細嘅都有278呎，起碼可以間到一房，唔算係之前嘅納米樓，算係有進步。而呢6個屋苑嘅預計關鍵日期為2025年4月底至2026年3 月底，即居屋2023年嘅6個屋苑，樓花期最長約3 年。而除咗以上6個新屋苑，房委會亦會同時重售39個因取消買賣協議而收回嘅單位，包括居屋2022嘅東涌裕雅苑及沙田愉德苑，以及居屋2020嘅沙田錦駿苑及黃大仙啟翔苑，合共9,193個單位。 

今期居屋，預計最遲可於2026年3月底可入伙。

居屋2023  6 大屋苑資料

觀塘安楹苑、安樺苑、安麗苑        離港鐵站遠交通購物稍不便
今次觀塘區共有3個屋苑，包括安楹苑、安樺苑及安麗苑，全部位於安達臣道石礦場舊址，依山而建，合共提供3,510個單位，實用面積由最細278平方呎至最大497平方呎，售價則介乎169萬至394萬元，三個屋苑嘅預計關鍵日期分別為2025年7月至8月底。

安楹苑、安樺苑及安麗苑位於安達臣道石礦場舊址，售價則介乎169萬至394萬元。

呢3個屋苑嘅缺點，係離市中心有一段距離，距離港鐵站亦較遠，所以對外交通要以巴士及小巴為主，居民可到附近安泰邨及安達邨等地乘撘公共交通工具。目前安達邨的巴士站，提供如11X、89、213、214、214P、613等路線，來往長沙灣、牛頭角、尖沙咀、港島東杏花邨及筲箕灣等地。至於安泰街市嘅小巴站，就有提供89A專線小巴，來往淘大花園、寶達邨、聯合醫院、樂華邨、牛頭角街市等地。

呢3個屋苑離港鐵站離港鐵站較遠，所以對外交通要以巴士及小巴為主。

而根據運輸署早前公布《2022-2023年度觀塘區巴士路線計劃》諮詢文件，為配合新居屋落成入伙後新增大量乘客嘅需求，建議落實4條新嘅往來巴士路線，分別為：
1.安達臣道石礦場用地 ─ 至中環(林士街)
2.安達臣道石礦場用地 ─ 鑽石山綜合發展區公共運輸交匯處
3.安達臣道石礦場用地 ─ 至深水埗(欽州街)
4.安達臣道石礦場用地 ─ 至九龍站

在購物等設施方面，暫時居民可到最近嘅安泰邨安泰商場購買日常用品，以及安達邨和平市集買餸，或者到寶達商場及秀茂坪商場等購物，不過政府已在整個安達臣道石礦場發展區入面，預留3幅商業用地，提供購物設施。

喺新嘅商業設施未落成之前，呢區嘅購物地點要去寶達商場。

校網方面，安楹苑、安樺苑及安麗苑位處小學48校網，包括聖公會聖約翰曾肇添小學秀茂坪天主教小學等；至於中學則屬於觀塘區中學校網，該校網內知名嘅Band1中學包括藍田聖保祿中學、觀塘官立中學、觀塘瑪利諾書院、順利天主教中學、聖言中學、聖傑靈女子中學等。

呢3個屋苑嘅中學交網為觀塘區，校網內知名嘅Band1中學包括藍田聖保祿中學等。

元朗朗天苑   單位最多售價最平    交通購物稍不便
元朗朗天苑所在地皮，前身係中轉房屋用地，喺2016年起清拆改劃作公營房屋用途，連同旁邊土地，項目共分為兩期發展，提供3,080個單位，平均呎價為$6,280，為今期居屋6個屋苑中，單位數量最多兼售價最平屋苑。同時由於預計落成後嘅住宅大廈，樓高會達48至50層，將成為全港最高嘅居屋屋苑，亦即表示住宅密度會較高。而資料顯示，元朗朗邊發展項目預計會興建一批配套設施，將會成為兩期居屋共用，包括：停車設施、兒童及青年綜合服務中、長者鄰舍中心、幼稚園、羽毛球場／籃球場／乒乓球桌、社區遊樂場等運動及康樂設施、零售設施等。

朗天苑預計要2026年3 月底才落成，售價方面係今次6個屋苑中最平，預計建成後大廈會樓高48至50層。

交通方面，朗天苑交通並非十分方便，離朗天苑最近嘅港鐵站為屯馬線朗屏站，而由「屏山」及「水邊圍」兩個輕鐵站步行至朗天苑，約需15分鐘步程，居民亦可到朗邊站巴士站，居民可乘搭53、68A、276等巴士路線來往市區及九龍、港島各處。屋苑另一缺點為附近無大型商場，居民要乘車至安寧路、元朗廣場，或元朗政府合署的大橋街市一帶購買日常生活用品及食品。而所屬小學校網為72，比較著名小學有順德聯誼總會伍冕端小學及天水圍官立小學等，中學校網則屬元朗區，較著名Band 1學校包括新界鄉議局元朗區中學及趙聿修紀念中學等。

離朗天苑最近嘅港鐵站為屯馬線朗屏站。

由水邊圍輕鐵站步行至朗天苑，約需15分鐘步程。

朗天苑周邊乃住宅區，如果要購物，要乘車至元朗市中心嘅元朗廣場。

朗天苑中學校網屬元朗區，較著名Band 1學校包括新界鄉議局元朗區中學等。

屯門兆翠苑   單位數量最少但面積最大  附近有巴士車廠易受噪音影響
雖然屯門兆翠苑只提供518個單位，為今次6個屋苑中最少，但最大單位實用面積達518平方呎，呎價為$6,800，相宜程度僅次於朗天苑。根據房委會嘅招標文件，兆翠苑除咗有兩座住宅大樓，還會有到校學前康復服務辦公室及泊車設施（位於住宅大廈地下及平台）及其他附屬設施。離兆翠苑最近嘅車站，係屯門泳池輕鐵站，但值得留意嘅係，兆翠苑本身位置離輕鐵路軌相當近，附近又有九巴屯門南車廠及城巴屯門車廠等，因此估計低層住戶有機會受到噪音影響。兆翠苑鄰近私人屋苑御海灣及南浪海灣，最近嘅商店及食肆亦喺御海灣，商場可到屯門中央廣場或稍遠嘅豐景園。居民亦可到在南浪海灣及豐景園附近搭巴士前往各區。

雖然兆翠苑只提供518個單位，但當中有大面積518呎嘅單位，平均呎價為$6,800。

兆翠苑本身位置離輕鐵路軌相當近，附近又有九巴屯門南車廠及城巴屯門車廠等，因此估計低層住戶有機會受到噪音影響。

屋苑附近為住宅區，要購物可到屯門中央廣場或稍遠嘅豐景園。

康樂訪施方面，附近有屯門游泳池，居民亦可步行至海珠路遊樂場，內有戶外免費健身設施供市民使用。小學校網屬71校網，包括如保良局西區婦女福利會馮李佩瑤小學及路德會呂祥光小學等；中學則屬屯門區中學校網，區內BAND 1中學包括宣道會陳瑞芝紀念中學、南屯門官立中學順德聯誼總會梁銶琚中學等。

區內著名BAND 1中學包括南屯門官立中學等。

啟德啟悅苑  售價最貴樓王    交通方便兼位處名校網
以售價計，啟德啟悅苑係今期居屋2023嘅「樓王」所在屋苑，以屋苑面積最大嘅475呎單位計，建議售價約為494萬元，是今期居屋中最貴單位，以綠表買家最高可承造95%按揭計，業主要付24.7萬元首期先可上車。但同時今期居屋面積最細嘅278呎單位，亦位於啟德啟悅苑，售價約223萬元，但同樣提供這個面積嘅觀塘安麗苑，同面積單位最低售價只係約169萬元。

以售價計，啟德啟悅苑係今期居屋2023嘅「樓王」，最大嘅475呎單位，建議售價約為494萬元，是今期居屋中最貴單位。

啟悅苑嘅交通配套相當好，鄰近屯馬線宋皇臺站，屋苑附近亦設有宋皇臺公園巴士站及九龍城轉車站，設有3B、15、21、85X等巴士路線，來往將軍澳、鑽石山、紅磡等地。居民亦可步行到「富豪東方酒店」乘搭隧道巴士。喺飲食及購物方面，居民除可以經由宋皇臺站B出口前往九龍城區嘅食肆及商店外，啟德區預計即將有大型新商場如Airside及SOGO雙子塔等核心商業設施。區內休憩設施亦將有如啟德空中花園、啟德跑道公園及啟德郵輪碼頭公園等。而預計最快可於2024年啟用嘅啟德體育園，室內體育館將提供合共相當於12個標準籃球場嘅活動空間供社區使用，而公眾運動場當沒有活動進行時，將開放予公眾作免費緩步跑及健步行用途。啟悅苑另一優勢係位處九龍傳統名校網，區內名小學有馬頭涌官立小學、農圃道官立小學、陳瑞祺（喇沙）小學等、而Band 1中學則包括協恩中學、華英中學、喇沙書院等傳統名校。

屋苑鄰近屯馬線宋皇臺站，附近亦設有宋皇臺公園巴士站及九龍城轉車站，可以轉乘大量巴士路線。

居民可到九龍城購物及歎美食。

區內會有矚目嘅大型新商場如Airside及SOGO雙子塔等落成。

預計最快可於2024年啟用嘅啟德體育園，室內體育館將提供合共相當於12個標準籃球場嘅活動空間供社區使用，亦可供舉辦大型演唱會。

啟悅苑另一優勢係位處九龍傳統名校網，Band 1中學包括協恩中學、華英中學、喇沙書院等。

text/Joyce
photo/HKET圖片庫