不可不知！9大搭的士巴士犯法行為 講粗口、唱歌、玩樂器最高可被監禁6個月！ 連衣着令人生厭都會被趕落車！

============

同場加映：
【家居達人】專家分享床單小知識！ 點樣揀床單？清洗方法+次數？

============

根據《道路交通(公共服務車輛)規例》第46條「乘客的一般行為」，乘搭公共巴士、公共小巴或的士之乘客或有意乘搭該等車輛嘅人，原來有大量行為守則，以下就揀出一啲好容易「唔覺意」做咗嘅「違規行為」：
1.使用不良或冒犯性的語言或作出不守規矩的行為；
2.故意妨礙或阻撓車輛司機或獲授權人或分散其注意力；
3.吐痰或故意損壞、弄髒、毀損或弄污車輛任何部分、任何設備或其任何附件；
4.故意移走、移動、毀損或更改任何號碼字牌、收費表、路綫指示器或終點牌或任何車輛內或其上印製的其他公告或廣告；

「使用不良或冒犯性的語言……」，即係大家搭公共交通工具，或有意乘搭該等車輛，都唔好隨便講粗口呀！

喺交通工具行駛中，故意妨礙或阻撓司機，或分散其注意力，原來都算犯法㗎！

吐痰、整污糟或者損毀車輛任何部分，都係犯法！

5.在車輛移動時上車或落車；
6.在上車或意圖上車時 ——
(i)阻礙任何企圖上車或落車的乘客；或
(ii)作出相當有可能會延誤該車輛的行為；

原來上車嘅時候有阻礙其他乘客上車，或者搞到交通唔能夠如期開車，都係「犯法」㗎！

衣着會令其他乘客不安、容易弄污車廂都出事？！
有無諗過成身污糟邋遢咁搭巴士或的士座位，甚至其他乘客嘅衣服，又或者衣着引起其他乘客不安，都算犯法嘅呢？原來《道路交通(公共服務車輛)規例》第46條都有關於乘客衣着嘅指引：
7.上車或停留在車內或車上，而其情況足以令車上乘客生厭，或其衣著或衣服的狀況在合理預計下可弄髒或損害該車輛的褥裡、座墊、座位或其他部分或車上任何乘客的衣服，且該車司機或獲授權人或警務人員曾以該人的情況或衣著或衣服的狀況為理由而要求他 ——
(i)不要上車；或
(ii)離開該車輛

即係咁，原來根據《道路交通(公共服務車輛)規例》第46條，衣着打扮令到車上乘客生厭嘅話，司機甚至警務人員係可以要求該名人士唔好上車或者離開該車輛㗎！

喺巴士、的士入面唔畀唱歌、玩樂器
雖然近年已經好少人帶住收音機之類喺公共交通工具上「焚機」，亦應該無乜人會喺交通工具上玩樂器，不過喺搭緊巴士或的士時歌癮大發唱吓歌，都好多人試過，但如果唱得好好聽，唔知係咪可以「 網開一面」呢？！《道路交通(公共服務車輛)規例》第46條對於乘客發出聲音嘅行為，有以下指引：

8.在車內或車上的時候 ——
(i)使用或操作任何嘈吵的器具、樂器或任何留聲機、收音機或錄音機，而滋擾到任何其他人；
(ii)自己或聯同其他人唱歌或叫喊，以致發出過量噪音

即係咁，就算閣下歌癮大發，喺乘搭公共交通工具時請忍一忍，唔好唱住啦！

巴士及小巴上唔可以賣嘢或派單張
唔知大家有無諗過巴士上面向其他乘客sell嘢或者派宣傳單張呢？但原來《道路交通(公共服務車輛)規例》第46條係講明：唔得嘅！
條例係咁講：
9.公共巴士或公共小巴的乘客或有意乘搭該等車輛的人，不得 ——
(a)由並非供乘客上車的車門或通道上車，或由並非供乘客離去的車門或通道落車；或
(b)在車內或車上 ——
(i)行乞；
(ii)售賣或要約售賣任何物件，但如有司機或持證人的允許則不在此限；或
(iii)為廣告用途而派發任何類別的印製、書寫或類似的物品，或派發任何物件。

原來喺公共交通工具上面係唔可以派發宣傳單張或者賣嘢嘅！

而觸犯咗以上呢啲行為，一經定罪，原來係可判罰款$3,000及監禁6個月㗎！

帶住籠雀，可唔可以搭的士？
通常攞住重嘢或者大型物品，我吔都會搭的士，但究竟乜嘢呎吋嘅手提行李先至可以唔使放車尾廂呢？對於乘客手提行李，《的士則例簡介》（2022年7月修訂版）係咁樣講嘅：
「的士不得運載個人手提行李以外的貨物。
個人手提行李，不得包括以下兩類：
(1) 屬危險或厭惡性質的貨物；及
(2) 未經牢固包裝的貨物。
一般來說，擺放在乘客車廂內的輕便個人手提行李，如果每件的長、闊、高總和不超過140 厘米，可獲免費運載。的士司機可就每件擺放在車尾行李廂內的行李，不論大小，向乘客收取行李附加費。的士乘客如屬傷殘人士，他所攜帶的任何輪椅、拐杖或用作輔助行動的其他物件，不論大小及擺放位置，均可獲免費運載。」

相109  原來搭的士時嘅手提行李唔係乜都帶得，屬危險或厭惡性質嘅貨物，以及未經牢固包裝嘅貨物，係唔可以上車㗎！

咁究竟搭的士又可唔可以帶寵物或雀鳥呢？《的士則例簡介》（2022年7月修訂版）係咁樣講嘅：
「的士運載動物或雀鳥的附帶條件，由的士司機酌情決定，惟獲准攜帶任何動物或雀鳥上車的人士，應對車輛遭受由其動物或雀鳥造成的任何損壞負責，並給予賠償。」

帶住籠雀或寵物，係可以搭的士嘅……不過如果動物對車廂造成任何損壞，咁乘客就要提供賠償。

text/Joyce
photo/HKET圖片庫