房屋局局長承諾：綠置居納米樓將會絕迹！ 未來公營房屋單位面積都會加大？！

============
同場加映：
【家居達人】抹窗勿搏命！ 清潔3部曲+安全貼士

============

房屋局長何永賢喺立法會接受質詢時表示，去年嘅《施政報告》中，政府已承諾喺2026至2027年落成嘅資助房屋，實用面積將不小於26平方米，形容「封底」，因此曾喺「綠置居2022」出現過、實用面積小於20平方米嘅「納米樓」單位，將屬「絕版貨」。

房屋局局長何永賢表示，由2026年後落成嘅資助房屋，面積將不會小於26平方米，即納米樓將絕迹。

何永賢又表示，自綠置居喺2016年推出以來，房委會一共推售咗13,900個綠置居單位，當中只有約2,000個單位嘅實用面積，係小於20平方米以下，其實只佔總數大約15%。當中青富苑及蝶翠苑兩個屋苑嘅細單位數目比較多，佔兩個項目單位總數嘅23%，而「綠置居2022」3個項目共發售4,700個單位，房委會已減少面積較細的單位數目，當中實用面積小於20平方米以下嘅，其實只有500個，佔總數的10%。何永賢話總結過往銷售經驗，面積較細嘅單位，的確比較唔受市民歡迎，房委會已檢討現時公屋項目定為綠置居嘅設計流程，喺設計上增加彈性，制定更適合嘅單位組合比例。而上一期綠置居已經於上月完成揀樓，約98%單位售出，剩下約100個未售出嘅單位，全部屬於面積20平方米以下，會撥至下期「綠置居2022」再次發售，假若有單位無法賣出，局方會讓「特快公屋編配計畫」輪候者買入相關單位，而房委會亦正檢視「綠置居2023」嘅單位比例。

柴灣蝶翠苑，係其中一個單位極細嘅綠置居屋苑。

何永賢表示歷年綠置居13,900個出售單位中，其實20平方米以下嘅單位，大約只有15%。

公營房屋單位面積增靈活度    私樓納米樓亦將絕迹？
另一方面，房委會亦會喺設計上，增加房屋比例嘅靈活性，何永賢舉例指，公屋單位分為A至D種類，面積為14至33平方米，局方將會將14平方米嘅A單位，同33平方米嘅D單位相連，令到間隔可靈活變通，未來或可將兩個單位改建成兩個C單位。至於日後公營房屋單位面積會唔會起大啲，起帶頭作用引領私人發展商，一齊「趕絕納米樓」？何永賢指，目前未有條件將所有公營房屋單位嘅面積放大，因為土地面積有限，如果放大單位面積，單位數目就會相應減少，要等到下一個五年嘅較後時間，當公營房屋供應充足情況下，先有空間研究係咪合適放大公營房屋單位面積；而新招標出售嘅土地賣地條款內，已規定私樓單位面積下限為280平方呎。

何永賢指，目前土地面積有限，如果放大單位面積，單位數目就會相應減少，要等到下一個五年嘅較後時間，當公營房屋供應充足情況下，先有空間研究係咪合適放大公營房屋單位面積。

text/Joyce
photo/HKET圖片庫