屯門私樓地下停車場非法變散貨場 業主唔畀居民通過 可以點投訴？
屯門有座私人物業嘅地下，長期有幾間「地舖」出售水果及家品等，但原來呢度本來係停車場及上落貨區，業主而家非法將停車場變成散貨場，仲唔畀居民通過停車場出入，引來居民怨聲載道，究竟停車場嘅業主，係咪可以咁樣做？背後其實有乜嘢陰謀呢？
============
同場加映：
【家居達人】瞓覺都有學問 專家教你點樣瞓得好 一定要夠8個鐘？半夜札醒發夢無問題、食褪黑素呃個腦？
============
根據節目《東張西望》節目報導，有街坊向節目組報料，指示喺屯門新墟街市附近、康利中心地下有幾間賣生果及毛巾等家品嘅「店舖」，店舖內其實空無一物，因為所有貨品及生果等，都擺放在店外面出售，原來呢度嘅「真身」根本係個停車場，而好多街坊雖然每日經過，亦根本唔知係停車場，原來停車場被非法使用，當作散貨場，間作三間「店舖」，小販話現時日租$1,500，計一計數，三間「店舖」加埋月租合共可達$135,000，的確會比出租車位更好賺。
康利中心地下有幾間喺門口擺賣生果及毛巾等家品嘅「店舖」，店舖其實空無一物，原來呢度嘅「真身」根本係個停車場。
原來呢度本來係有三個停車位嘅停車場及貨物上落區。
測量師：改變土地用途 需入紙申請再補地價
雖然該處門口有個寫住「地下停車場28A號舖」嘅「門牌」，但節目組委托資深產業訴訟測量師黃雍盛翻查過田土廳記錄，呢間舖根本唔存在！同時調查過土地用途，原來係停車場及上落貨區，停車場原本由發展商持有及管理，停車場變散貨場嘅原因，原來係自從十幾年前，入面三個停車位嘅使用率極低，於是發展商就低價出售停車場，但業主立案法團並無接手，一直丟空，直至8年前由一位麥先生買入。之前一直未有任何搞作，直至兩年前，開始裝修並安裝鐵架，並喺社交平台出post出租停車場作散貨位。但其實喺呢個情況下，業主係需要入紙申請改變土地用途，再補地價，黃雍盛表示「補地價」嘅金額，就係原來該地方作停車場用途同現在改變用途後商業地價嘅差額。而節目組亦查過麥生根本無申請過，擺明係想搵快錢。
雖然該處門口有個寫住「地下停車場28A號舖」嘅「門牌」，但節目組翻查過田土廳記錄，呢間舖根本唔存在！
資深產業訴訟測量師黃雍盛（左）表示喺呢個情況下，業主係需要入紙申請改變土地用途後，再補地價。
而最令住客感到困擾同氣憤嘅地方，就係麥生以買咗停車場成為私人地方為理由，由去年開始唔畀住客由停車場進入室內。其實大廈法團都出過律師信，指業主已經違反公契，要求14日內清走物品，但對方無理會，仲將出租事宜交畀隔離舖處理。居民試過向唔同政府部門投訴，但食環署表示由於係私人物業，啲貨又無擺晒出行人路，店舖係可以擺賣。又搵過地政署，地政署表示若入面三個車位都無擺放雜物，係唔可以告業主……業主完全係走法律罅。節目組搵過麥先生，對方拒絕回應。
令住客感到氣憤嘅地方，就係麥生以買咗停車場成為私人地方為理由，由去年開始唔畀住客由停車場進入室內。
黃雍盛表示，地政署係有條款，指如果將場地嘅目的改變咗，唔係用途，都可以視為長期性同地契有抵觸，其實地政處係可以採取行動，將業主物業收回，終止屬權。節目組搵過食環署，回覆為「徵詢法律意見，以考慮下一步跟進行動」，亦指就有關地點店舖阻街等事宜，已發出22張罰款通知書。地政署亦回覆指接獲投訴後，已採取行動，確認有違反地契條款，發出警告信，並指有關違契位已經糾正，並會繼續跟進。
節目組向食環署查詢，對方回覆指正「徵詢法律意見，以考慮下一步跟進行動」。
text/Joyce
photo/電視畫面截圖
港生活人氣本地熱話
↓【限時搶⚡】森源安睡足艾貼↓
↓吸走體內毒素｜改善血液循環 ↓
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
