家居漏水滲水｜家居漏水懶人包 4大漏水重災區喺邊度？幾時要搵滲水辦同公證行幫手？

============
同場加映：
【家居達人】防貓網7大安裝須知 邊款最安全？與蚊網有咩分別？

============

Step 1：4 大熱門滲水源頭，究竟自己單位係源頭？定係苦主？
當發現天花、牆身或地板等地方有水漬時，首先唔好懷疑鄰居，應該先檢查自己單位內外係咪有破損，導致滲水或漏水問題，可以檢查以下地方：

A.窗台滲水
窗台滲水主要有3個原因：1.防水層遭破壞或老化，當碰上落雨就會出現窗台滲水；2.師傅手藝欠佳或使用嘅物料質素差劣，未必能完全密封玻璃與窗台之間的空隙，又會有大機會出現滲水情況。

B.天花漏水
天花漏水的問題較為複雜。通常會係以下地方：頂層單位有機會係因為天台工程粗糙，防水工程參差而引致。反之，其他樓層若出現天花漏水或滲水則多與樓上單位有關，若樓上單位地台內的防水層板有破損，廚房、廁所或浴室嘅天花便會間歇性漏水或滲水，水漬呈圓形，該位置會發霉及有臭味。若果係浴室嘅防水物料損毀，會對樓下單位的天花或牆壁造成面積相對較大及均勻的水漬。

C.外牆滲水
通常樓齡較高嘅樓宇，外牆大機會會出現裂縫或破損，導致出現漏水情況，最明顯係一旦落雨，雨水會經大廈外牆直接滲修屋內，或經由牆身、縫隙流至室內不同地方。如發現是外牆問題，則需要透過搭棚維修。

D.廚廁滲水
廚廁漏水滲水，有機會與鋁窗維修方法有關，另一原因係因為企缸工程唔完善，例如浴屏同牆身之間嘅玻璃膠打得參差錯落，令企缸碰口位經常出現滲水問題。而如果馬桶同地面連接嘅位置漏水，有可能係馬桶有裂縫，或馬桶同地面粘合的玻璃膠太薄或出現老化問題。

Step 2：自行檢查確認係咪水管漏水
最基本，當然係肉眼睇吓搵唔搵到滲水源頭，如窗邊玻璃同牆身之間係咪存有罅隙？外牆有沒有裂縫？等，但進一步，如大廈採用隱藏式食水管，可以喺單位內進行簡易測試，睇吓會否係食水管有滲漏。

A.閂全屋水喉30分鐘，記錄閂前和閂後的水錶讀數，如讀數有升，證明有水喉漏水。

B.記錄滲水位於30分鐘內嘅滴水頻率，再閂自來水總掣加開水龍頭30分鐘，期間觀察滴水頻率有否減慢，甚至停止。然後重新開水掣，閂回水龍頭，一小時後再記錄滲水位在30分鐘內嘅滴水頻率有否增加。

如果肉眼檢查過單位，兼做埋以上嘅隱藏式食水管漏水測試，都似乎無問題嘅話，你可合理地懷疑源頭為鄰居。

Step 3：聯同鄰居進行色水測試
如果懷疑鄰居為滲水源頭，一般而言都會搵管理處出面做聯絡及協調，搵懷疑漏水單位嘅業主合作，共同進行色水測試。 色水測試就係將添加食用色素嘅「色水」，稀釋於10公升水中，喺懷疑漏水單位嘅洗手盆、坐廁水箱、去水口、企缸或浴缸封邊等位置注入色水，而且可以喺唔同地方注入唔同顏色嘅色水，以作識別。大約喺一小時至兩星期間，於漏水單位檢查，如發現色水，即代表漏水源頭的確係「嫌疑單位」。呢個時候，當然係兩個單位嘅業主及管理處商討如何維修。同時亦可向保險公司查詢家居賠償事宜，不過一般嚟講，保險公司只會賠償因意外引致嘅損失，例如爆水管或鄰居意外鑿穿投保人嘅喉管。如果是水管嘅自然耗損導致漏水，不論係家居保險或火險，一般都不屬於受保範圍。不過最緊要喺：記得影低漏水現場嘅相關相片或短片，向保險公司查詢。

Step 4：打1823投訴　由滲水辦處理
假如無法順利與鄰居協商，就不妨考慮致電1823，或到1823網站提出投訴，向食物環境衞生署和屋宇署成立嘅聯合辦事處（俗稱「滲水辦」）尋求協助，由滲水辦派員上門進行勘測。滲水辦會喺收到投訴後6個工作天內聯絡投訴人，並派職員進入懷疑源頭單位及受影響單位，進行測試及勘測，90個工作天內完成調查，並將結果以書面形式通知投訴人。如懷疑源頭單位唔肯合作，拒絕讓滲水辦職員內進嘅話，滲水辦係有權向法庭申請手令，強制進入該單位的。一旦確認滲水源頭，源頭單位必須喺指定期限內解決滲漏水問題， 否則有關人士會被檢控一經定罪，最高可被罰款10,000港元，另加每日罰款港幣200港元。當局亦可向法庭申請「妨擾事故命令」，命令有關人士減除妨擾。如有關人士無遵照法庭命令，一樣會被檢控，一經定罪，最高可被罰款25,000港元，另加每日罰款450港元。

Step 5：聘請公證行調查　搜集證據入稟追討賠償
如果做咗以上步驟都未能夠找出源頭，又或者同樓上樓下單位糾纏不斷，甚至有其中一方業主提出索償，則可聘請第三方嘅公證行再次進行檢測。 公證行會採用較先進嘅紅外線熱熱像分析及微波斷層掃描技術進行調查，需時會較短且失誤率較低。 調查完成後，如果有足夠證據，如顯示漏水源頭屬樓上單位等，就可以決定係咪真係向法庭舉證，入稟追討賠償。

text/Joyce
photo/HKET圖片庫