公屋申請｜3大為長者而設公屋申請計劃 58歲起可申請/可揀市區樓/更快獲得房署處理

============
同場加映：
【家居達人】防貓網7大安裝須知 邊款最安全？與蚊網有咩分別？

============

根據房委會近日公布嘅數字，截至今年6月底，長者一人申請公屋嘅平均輪候時間維持3.9年，係自2022年9月底起，連續4個季度維持不變，不過如果睇返申請宗數，其實係增加至23,500，較上一季係多咗700宗，而比較返約10年前嘅長者一人申請公屋數字，其實增幅接近1.4倍，睇返長者人口數字上升趨勢，長者對公屋嘅需求會愈來愈嚴峻，究竟現時有邊幾個為長者而設嘅公營房屋計劃可申請呢？

1.高齡單身人士優先配屋計劃：58歲可申請，可選市區樓
申請者當然要先符合公屋基本申請資格，並為高齡單身人士。凡參加呢個計劃而符合資格嘅申請，通常會比一般家庭申請更早獲得處理。要注意事項：
1.申請人申請時必須年滿58歲，而在配屋時必須年滿60歲
2.一般新登記嘅公屋申請人只可以選擇非市區，但「高齡單身人士配屋計劃」申請人則可選擇以下任何地區為將來編配公屋嘅地區：
a.市區（包括港島及九龍）
b.擴展市區（包括東涌、沙田、馬鞍山、將軍澳、荃灣、葵涌及青衣）
c.新界（包括屯門、元朗、天水圍、上水、粉嶺及大埔）
d.離島（不包括東涌）
3.如有需要，申請人可以喺輪候期間要求加入家庭成員，或將其申請轉為相關優先配屋計劃嘅家庭申請，而唔需要重新登記，並且會繼續使用原有的申請編號。如果申請者最初係以單身人士資格輪候，其輪候時間會按照半數計算到其家庭申請中，但呢個計算方式最長以三年為限。完成調整後，相關申請會被分配一個等同於一般申請嘅登記日期作為依據，以便日後進行公屋編配及政策執行。

申請人只要申請年滿58歲就可申請，而在配屋時亦必須年滿60歲。

而家一般新公屋申請人只可揀非市區嘅公屋，但高齡單身人士優先配屋計劃申請人係可以揀市區樓㗎！

2.「共享頤年」優先配屋計劃：兩人或以上共居，非親屬都可申請
若果係兩位或以上年滿58歲或以上人士，即使並非親屬成員，只要同意一起共住一個單位，即可以循呢個計劃申請公屋。如無親屬關係，申請人們須於申請表內一同簽署，而申請表上所有人士都必須年滿58歲，並且在進行配屋時都必須年滿60歲。符合資格的申請，同樣通常會比一般家庭申請更早獲得處理；亦可選擇任何地區，作為將來編配公屋的地區。

若兩位或以上年滿58歲或以上人士，即使並非親屬成員，只要同意一起共住一個單位，就可以申請「共享頤年」優先配屋計劃。

3.天倫樂優先配屋計劃：家人可揀同住或分別住兩個就近單位
「天倫樂優先配屋計劃」係為咗鼓勵年輕家庭照顧年長嘅父母或親屬，令家有長者嘅公屋申請者，可以有優先編配單位嘅機會。符合資格嘅家庭可以根據家庭情況，自行選擇共住一單位或分別入住兩個就近的單位。符合資格嘅申請，會比一般家庭申請提早六個月獲得處理。因此，有關申請會獲發一個相等於六個月嘅相應登記日期作為依據。計劃申請者除必須符合基本公屋申請資格及一般家庭申請資格外，仲要有以下要點要留意：
選擇住同一個單位
a.申請家庭最少有兩名成員，其中必須包括最少一名年長父/母或受供養的年老親屬，申請人可選擇任何輪候冊地區，以編配公屋單位。
b.申請登記時，該年長父/母或受供養的年老親屬必須年滿60歲，並且願意與較年輕的成員共住。
c.不論申請人是年老親屬，還是另一名成年嘅家庭成員，雙方均須於核實配屋資格面晤時簽署意願書，聲明較年輕嘅成員會照顧年老親屬，並一同居住。若日後較年輕嘅成員被發現違反此條款，所獲配單位的租約將被終止。

天倫樂優先配屋計劃嘅申請人，可選擇與長者同住於同一單位，但若日後被發現並無同住，有機會被終止租約。

選擇住兩個就近單位
a.申請家庭必須為核心家庭，並與最少一名年長父/母或受供養嘅年老親屬，分別遞交兩份申請表，選擇位於市區以外、同一輪候冊地區內兩個就近嘅公屋單位。
b.申請登記時，該年長父/母或受供養的年老親屬必須年滿60歲。
c.在輪候調查期間，如年青家庭嘅申請較先到達調查階段，輪候號碼較後嘅年長申請人可獲提前與年青家庭一起接受資格審查。而雙方均須於審查面晤時簽署意願書，聲明在獲得編配有關單位後，年青家庭會給予其年老親屬適當嘅照顧。若日後年青家庭被發現違反此條款，獲配嘅所有單位租約將被終止。

申請人亦可選擇與長者分別住兩個單位，但與年輕申請人與長者須為核心家庭關係。

text/Joyce
photo/HKET圖片庫