公屋申請｜特快公屋編配計劃申請超額達15倍 好多都係凶宅？即睇申請條件/計劃優缺點
經濟市道欠佳，市民對公屋需求更加殷切，「特快公屋編配計劃」就可以協助輪候公屋人士更快上樓，房屋署剛公布今年嘅「特快公屋編配計劃」提供約2000個單位，但申請人超額近15倍，要約16人爭一個單位，下周一公布名單，下周三起開始揀樓……究竟乜嘢係「特快公屋編配計劃」？有乜嘢「着數」？但聽講呢啲「特快公屋」，好多都係「凶宅」喎……
============
同場加映：
【家事達人】專家教路！自己洗車有咩技巧？ 由車頂洗起更有效率？剛停車切忌先洗車軚？
============
特快公屋申請人少咗？！
今年房屋署同時推出「特快公屋編配計劃」，以及「出售青富苑及蝶翠苑未售出綠表置居計劃單位」（即連續第二年推售「綠置居2019」青衣青富苑和柴灣蝶翠苑貨尾單位），今年「特快公屋」共接獲31980宗申請，超額申請近15倍，平均約16人爭一個單位。「特快公屋編配計劃」 嘅公屋自選單位程序，將會於今年9月13日開始進行，首批為二人或以上家庭申請者，第二批為一人申請者。供二人或以上家庭申請者揀選公屋單位嘅名單，將於9月11日上載於房委會網頁，供公衆參閱。
今年「特快公屋編配計劃」，超額申請近15倍，平均約16人爭一個單位，但比較之下，今年申請數字較去年跌約20%。
再詳細分析申請人資料嘅話，31980宗申請入面，其中只申請特快公屋編配計劃嘅有26220宗，而只申請綠置居貨尾單位則共有2690宗申請，同時申請兩個計劃嘅則有5760宗申請，即綠置居貨尾申請共8450宗，以綠置居貨尾僅得179個單位嚟推算，平均約47人爭一個單位。回顧一下：去年「特快公屋編配計劃」共接獲40810宗申請，即今年數字跌約20%，亦是連續兩年錄得跌幅。而「出售青富苑及蝶翠苑未售出綠置居單位」嘅選樓環節，預計將於今年第四季進行。
至於重售柴灣蝶翠苑及青衣青富苑嘅貨尾單位，則約47人爭一位單位。
「特快公屋編配計劃」單位有乜缺點？
房屋署會根據公屋資源情況，提供受歡迎程度較低的公屋單位。申請人揀選單位時不受地區限制，以自選單位形式進行。其實呢啲被選中嘅特快公屋單位， 部分嘅環境、交通、社區服務、購物及醫療設施等方面都十分理想，但當中確實有部分單位曾涉及不愉快事件，例如兇殺案、自殺、意外身亡、自然身故、追討欠債等；又或層數、座向、以至單位設計等較為遜色，例如屯門寶田邨及天水圍天恩邨（一期），單位入面嘅洗手間會較其他公屋單位略為細小。
天水圍天恩邨部分單位，洗手間面積比其他單位細，所以亦被列入「特快公屋編配計劃」。
確實有部分「特快公屋編配計劃」單位曾涉及不愉快事件，例如兇殺案及自殺等。
曾列入「特快公屋編配計劃2021」名單中嘅沙角邨綠鷺樓1610室，曾兩度發生兇殺案。
乜嘢資格先可以參加「特快公屋編配計劃」？
截至2023年6月底，在過去12個月獲安置入住公屋嘅一般申請者的平均輪候時間為5.3年，特快公屋最吸引之處當然係可以加快上樓！房屋署會向合資格嘅公屋申請人發出邀請信，以今次嘅申請計劃為例，合資格申請人須持有有效公屋申請而其登記日期在2021年3月31日或之前，同時符合至少一半家庭成員喺香港居住滿七年，及持有有效嘅編配機會。
特快公屋嘅申請人若喺獲邀參加自選單位程序後無出席、無揀選單位，或喺房屋署發出「配房通知信」前放棄自選單位，都唔會影響「不合情理拒絕編配」紀錄；但如果申請者喺成功揀選單位及獲發出有關「配房通知信」後，拒絕接受自選單位嘅編配，或未能依約前往所屬屋邨辦事處辦理簽訂租約手續，就會被計算一次「不合情理拒絕編配」。
房屋署會向合資格嘅公屋申請人發出邀請信，參加「特快公屋編配計劃」，申請人若喺獲邀參加自選單位程序後無出席、無揀選單位，或喺房屋署發出「配房通知信」前放棄自選單位，都唔會影響「不合情理拒絕編配」紀錄。
特快公屋計劃有乜嘢優或缺點？
A.優點
凡願意入住「有效空置期」達12個月或以上單位嘅租戶，可以享有租金寬減，寬減程度視乎單位有效空置期而定；但喺租金寬減期間，租戶就唔可以同時申請房屋署嘅租金援助計劃。
B.缺點
1.申請者接受自選單位嘅編配後，喺租約生效日期起計三年內，申請者及其家庭成員唔可以要求調遷。但若有任何經有關部門/機構證實嘅特殊情況，或調遷源於房屋署要求嘅話，則可獲酌情處理。
2.獲編配特快公屋嘅租約生效日期起計三年內，以綠表申請居屋或房協居屋時，編排選樓次序方面，會被視為白表申請者，而喺購買單位後，須把公屋單位交回房委會。
3.喺特快公屋單位首次租約生效日起計三年內，租戶將不合資格申請購買綠置居單位。
凡願意入住「有效空置期」達12個月或以上單位嘅租戶，可以享有租金寬減，但另一方面，三年內租戶將不合資格申請購買綠置居單位。
text/Joyce
photo/HKET圖片庫
港生活人氣本地熱話
【送禮🎁】送Esther Bunny春日好物🐰！
↓ 登記免費帶走可愛折疊傘 x 保溫杯 ↓
↓【限時搶⚡】森源安睡足艾貼↓
↓吸走體內毒素｜改善血液循環 ↓
