窗戶篇！專家教颱風來襲6大必知 打風漏水緊急處理、點癡膠紙最有用？DIY驗窗法

今集家居達人搵嚟裝修學院嘅校長Simon教大家打風關於窗戶嘅應對措施同日常保養，唔想下次打風咁狼狽就快啲睇下文！

Q1︰打風時窗戶漏水原因？
答︰其實要睇吓點樣漏法嘅，如果8號風球都冇事，係10號風球先有事，咁至係因為10號風球太勁。因為窗邊其實靠條膠邊條去逼實，所以10號風球下正常係會漏吓水嘅，並唔係大問題。

Q2︰漏水當下應如何緊急處理？
答︰好多人會塞毛巾喺窗邊，但其實只會將積水由一氹變做一撻，有機會破壞石屎或日後地板會出現滲水問題。加上要不停扭毛巾，成晚都冇得瞓。窗隙位有水滲入可試吓用保鮮紙或垃圾袋逼實條隙，於窗邊外圍攝多少少並貼膠紙固定，作用是擋水及逼返實膠邊。

另外，濕緊嘅時候唔可以用玻璃膠，但係有一款叫「暴風膠」嘅產品係濕水時都可以使用。只要水壓唔係自來水咁勁，其實係可以即刻唧上去。如果都仲係漏水就可以鋪塊保鮮紙將啲水引落去個桶度，點都好過淨係塞啲毛巾不斷抹。

Q3︰漏水事後應如何處理？
答︰等佢乾透晒之後就可以用玻璃膠修補，基本上所有條狀滲水位如冷氣機邊或窗台邊都可以玻璃膠封邊。

但如果唔想將水封咗喺牆身入面就要喺外牆做喇！其實滲水有時唔係喺邊隙位入嚟，可能係經過石屎上一啲見唔到嘅細微裂縫滲入窗台，令窗台撲晒出嚟。所以就會用透明色的「防水膠」，約一百蚊一罐，唔使稀釋，以油掃或油轆於外牆掃兩次，乾透後就會形成一層防水膜。

Q4︰打風時黐膠紙的作用？
答︰防止玻璃碎裂時周圍飛濺。當然最好做法是遠離窗邊，但如果真係唔想飛到周圍都係，黐皺紋膠紙係一種方式，但黐嘅時候就要留意癡貼窗框以承接最多的玻璃碎。另外不要只癡中間，否則跌出的玻璃會更大塊。第二就係如果本身已有一個玻璃貼貼咗喺窗嘅話，其實就唔需要再黐皺紋膠紙。因為爆嘅時候都係為咗搵嘢擋一擋，玻璃貼其實已經完美地擋住，等如一個黐滿晒皺紋膠紙嘅玻璃窗。

Q5︰黐膠紙什麼形狀最有用？有防爆作用嗎？
答︰雖然各有講法，但如果以黐住窗框來說，其實「米」字形和「井」字型覆蓋得最平均、最能黐實窗框。至於防爆來說就唔關黐皺紋膠紙事，因為玻璃係唔會好似皺紋膠紙咁可以彎曲。皺紋膠紙無法彎曲、玻璃無法彎曲，所以玻璃碎咗其實佢都未開始發生作用，咁係冇辦法可以防爆嘅。

【INFO】
裝修中伏大全（裝修學院）
電話：5418 8169
網址：deco-academy.com
FB︰裝修中伏大全（裝修學院）

Text/Yuen
Photo/Jay