大窩口惡婆婆超市推車襲人兼惡人先告狀

============
同場加映：
【家居達人】窗戶篇！專家教颱風來襲6大必知 打風漏水緊急處理、點黐膠紙最有用？DIY驗窗法

============

節目主持在超市附近訪問了多位街坊都表示曾見過惡婆婆的惡行，可見其惡名昭彰，不少人表示阿婆會無差別襲擊人，連小朋友或老人家都唔放過，相當得人驚！惡婆婆主要於大窩口上邨、下邨以及荃灣一間酒店附近的3間超市出沒，邊個擋佢路就會撞邊個，屢勸不改。

其中一位受害人Apple表示，有一次在超市內彎腰揀沐浴露，卻被惡婆婆從後用手推車撞向腰部，二人發生爭執，惡婆婆再用手推車撞向Apple肚部，Apple返家後即發現腰部受傷出現瘀青。而Apple的母親更三度遭惡婆婆攻擊，又向她粗言辱罵，更試過被撞向超市辦公室門口。圖中可見傷勢都幾嚴重，加上老人家脊骨和膝蓋做過手術，行動不便，被阿婆撞到後更要休息幾日先行到，相當陰公。

阿婆唔只於超市用手推車無差別撞人，更會破口大罵，「死男人」、「唔知頭唔知路，報警吖」、「唔好出街返屋企啦」、「去死啦」、「呢啲人唔死都無用」等，周圍辣着火頭。除咗鬧人同撞人之外，佢更試過拎起一大盒奶掟人，超市職員出面處理仲惡言相向。

節目組追蹤咗阿婆一個月，發現佢真係橫行霸道，不分男女老少，甚至連坐輪椅嘅婆婆都照撞！有阿叔更比佢撞到企唔穩差啲跌親，另可見即使超市走廊夠位兩架手推車過，阿婆都會照撞埋去。

節目組訪問期間亦比阿婆用手推車大力撞埋嚟，對質時阿婆惡人先告狀︰「你自己衰唔企埋一邊，你都癡線」。阿婆更加好似愈撞愈上癮，四圍搵目標猛力撞，邊撞邊鬧，一連串行為看似精神有問題。短短15分鐘內已激嬲唔少人，街坊怨聲載道。

節目主持主動出擊訪問阿婆，豈料佢突然情緒激動，破口大罵！「報警啦八婆！啲後生真係無鬼用。今日撞到啲仆街真係慘啊」有街坊經過也忍不住開口指責，惡婆婆當然唔會甘心被鬧啦︰「全部都係八婆、死佬！報警啦，做咩唔報警啊，拉我去坐監啦！我今年90歲喇，第一次見呢啲人。」愈鬧愈激動，精神狀況疑似有問題。

節目組尾隨阿婆回家，保安都表示經常被佢鬧，同層鄰居都對佢避之則吉，個個都驚咗佢。據了解，阿婆獨居，隔離一戶係阿婆嘅兒子，可惜訪問當日無人應門。

鄰居對佢敢怒不敢言，表示每次搭𨋢都要等阿婆成個人出晒先可以入，如果唔係又會比佢鬧。鄰居更表示覺得阿婆精神唔似有問題，因為平時聽佢同屋企人講電話都相當正常，認為阿婆就係好自我、高高在上。

香港心理學會註冊臨床心理學家趙思雅對惡婆婆的行為作出分析：「我覺得呢位女士無論係口角或者用手推車撞人，都係有一個共通點—就係覺得對方阻住佢。而覺得人哋阻住佢就開始有情緒出現，而呢個情緒係憤怒、躁底，其實係一啲幾常見嘅抑鬱症狀，咁都要睇返佢係咪刻意每一日去超市搵對象，想用手推車撞人，如果係呢個情況，似乎佢有一鋪癮，好想有一個快感去攻擊人。」

Text/Circle
Photo/TVB東張西望截圖