荃灣出名怪人含遮男首度剖白內心 鞋擺頭頂、錢塞眼鏡跳扭腰舞 背後原因有洋蔥

============
同場加映：
【家居達人】專家教營造日系簡約風家居 重視平靜 大地色/小盆栽/地燈

============

唔少人荃灣區街坊都對圖中呢位經常身穿鮮艷顏色衫以及佩戴搶眼眼鏡嘅怪叔叔退避三舍，原因並唔係因為佢嘅衣著，而係佢成日將長傘嘅底部放入口中品嚐，不分地方不分時間，搭緊車、食緊飯、行行吓都會不時含傘，人人睇到目瞪口呆。

「含遮阿叔」除咗會含雨傘外，仲會行行下大跳扭腰舞、將對鞋擺頭頂、自言自語、周街撩人傾偈甚至喺馬路中心隨街小便，怪異行為喺荃灣區出晒名，更有不少網上片段引來網民討論。

節目主持訪問該區街坊，幾乎人人都見過佢，紛紛評論︰「佢住咗好耐喇，個個街坊都知佢」、「無人望佢無人喺附近佢好正常，一見到有人行埋嚟佢就做啲動作嚇人，仲會講晒粗口。」、「佢會將把傘督完坑渠蓋再放入口，好核突㗎。」、「驚佢打人啊」等等。

雖然有好多街坊都驚咗佢，但亦有人表示覺得阿叔只係想引人注目，精神唔算有問題，認為阿叔內心孤獨，需要人關心，做出怪異行為都只係因為缺乏愛。

節目組追查多時，終於成功埋身採訪阿叔，當主持問到點解要將把傘放入口時，阿叔多次表示「你見我係咁篤都無事吖嘛即係證明我無事啦」、「我戴唔戴口罩都無事啦」、「呢個習慣已經5年啦」。

阿叔今年60歲，佢強調自己身體強壯，百毒不侵，當節目組提醒阿叔含傘好多細菌，佢反稱︰「「呢個係我作風，我關注，我體能，我可以控制好多病毒入侵我唔到，係D人唔抵得我咁樣放入口都無事。洗咩勸我，勸極我都咁做啦」、「啲細菌都比我剋死晒喇」、「我咁耐以嚟都無事，你係生就生，死就死㗎啦」。

「含遮阿叔」認為在街上用傘篤地再放入口已是一種優勢，獨一無二。不過他亦指街上的人看到他都會即時散去。傾了一會，阿叔似乎認為與節目組可做朋友，竟然請他們一行人返屋企繼續傾。

片段可見阿叔獨居於一人公屋單位，只有幾件傢俬、連床都沒有只睡在蓆上、只靠一盞燈照明、窗口以報紙遮擋以免有人看到屋內情況。屋企更有9把望落相當殘舊嘅長傘，每次出外都會睇心情揀遮。阿叔更表示︰「大家交個朋友，大方啲上嚟坐啦，我覺得你唔係衰人」阿叔續稱從來無人探過佢，節目組係第一批人可入屋同佢傾偈，即使對方是記者，影相都無問題，看來已對節目組相當信任。

原來阿叔靠著每月幾千元綜援過活，幾個月會睇一次精神科醫生，醫生評定佢出現性格問題，為人較憤世疾俗，比較偏激和孤獨。節目組請來心理學家分析，佢指出阿叔嘅問題同佢嘅成長和家庭背景有好大關係，加上佢無親人在旁，特別容易感到孤單，所以佢會用譁眾取寵的方法來取得人關注，實則係想同人建立關係。

節目組採訪阿叔嘅鄰居，有鄰居指「以前都會打招呼，而家唔會講嘢，佢有時會大嗌大聲講嘢」、「聽過有呀媽講搭𨋢時佢整喊細路哥」、「但都體諒佢嘅，因為佢好似有啲病，佢有副好可愛嘅眼鏡。」大部份人都指佢嘅行為未到好滋擾。不過叔叔反而指鄰居對佢有成見，「佢哋話知你死，唔驚你影衰佢都偷笑。我喺度12年都慣喇。佢哋唔會驚我，歧視我咋嘛，我又唔係怪物，佢哋見到我啲動作都習以為常，十二年都慣啦」。

網民睇完訪問後都指「其實佢真係幾慘，聽完都想喊，講嘢有文有路，想有人關心但個個都避開佢，想有人望咪做呢D」、「片中有個小朋友講得好好，知道佢有問題，都係想有人關心佢，政府就應該搵人去了解啦」、「叔叔無威脅到其他人安危就算啦，佢其實好正常，係鍾意做D嘢出位，其實真心慘」。記者睇完訪問都感受到阿叔心中有唔少鬱結，但卻沒人可傾訴，希望佢可以早日解開心結，亦希望大家都對情緒或精神有問題嘅人多啲體諒同包容啦！

Text/Circle
Photo/TVB 節目《東張西望》