港女月入$6000養八旬父母！用$1000租村屋住 想申請公屋怕入息太低？

最近有女網友在Facebook群組「香港公營房屋討論區(FB版) 公屋 居屋 綠置居 租置 房協 裝修 傢俬 平面圖 富蝶邨 麗瑤邨喜瑤樓 樂建居」發文，向網民詢問有關申請公屋的問題，她表示，「我一個女子月薪$6000，帶著父母80多歲，三人加上有10萬多儲蓄，可否申請到公屋嗎？」並透露自己與父母同住在粉嶺坪輋一間較為偏僻的平房村屋，月租$1,000，每月租金水電開支$2,000。但由於父母身體不佳，需要經常到北區醫院複診，故希望申請公屋、能夠搬去一個交通較為便利的地方。

帖文一出，隨即在網上引來掀起熱論，但有部份網民懷疑其真偽，認為樓主在作故仔，「村屋平房有$1000咁平，咁講大話都唔好講到咁誇張」、「而（依）家香港有可能嗎？仲話搵6000一個月，搵鬼信呀」、「我唔信囉，仲屈埋三個人住喎」、「全家得十萬蚊你點樣生存到今日」，更有人直言「唔好濫用公屋、用虛價文書去呃政府啦」。

不過亦有不少網民為事主平反，指粉嶺坪輋的確有一些租金較低廉的居所，「我都係住坪輋，我信樓主，樓主所講既平房唔係你們心想既村屋，坪輋的確係好多簡陋既平房，好平租的」、「平房=石屋/木屋/鐵皮屋，只有一層，超舊款屋仔」、「我曾經也住坪輋，情況跟你相似，家有老人，住地方亦會水浸…要」、「行山先返到屋企，你試下咪知囉！一嚟就話人呃人，井底之蛙」。

對於事主怕入息太低申請公屋被拒的疑慮，網民則表示「你地絕對合資格去申請」、「公屋妳入息+資產吾過，夠資格申請公屋，加上妳父母年紀大，可能會快少少」，呼籲事主不用太擔心，並建議她盡快提交申請以及尋求社工、區議員的幫忙，「首先如果兩老有睇開公立醫院醫生。先去醫院找社工幫手，社工覺得需要醫生証明會幫你申請，因為你家兩老年紀巳經好大找社工會快過你自己入紙申請」、「你除咗申請公屋應該去申請綜援，咁嘅收入絕對係貧窮線以下」、「老人家年紀大加上身體特別情況，搵社工幫手會快啲」、「屋企又水浸又低收入又有老人，呢啲嘢去搵區議員幫你搞成件事會簡單好多，佢地有經驗」、「公屋唔落你名仲快上樓」。

來源：FB@香港公營房屋討論區(FB版) 公屋 居屋 綠置居 租置 房協 裝修 傢俬 平面圖 富蝶邨 麗瑤邨喜瑤樓 樂建居