窗戶篇！專家教颱風來襲6大必知 必學DIY驗窗法+強制驗窗點搵師傅？1招預防窗戶意外

===========
同場加映：
【家居達人】專家教颱風來襲6大必知 必學 DIY驗窗法+強制驗窗點搵師傅？1招預防窗戶意外

============

Q5︰如何快速清除窗戶的膠紙？答︰1.皺紋膠紙︰揀選有牌子的，唔好揀啲平兩蚊但係黐落去果下已經覺得黐手黐立立，嗰啲就比較差，容易會有啲剩膠黐落去。2.唔好太遲先處理︰即太陽曬到溶晒或者過咗一個月先搣就會差啲。

3.使用刀片夾 + WD40︰溶咗再剷。4.勿用封箱膠紙︰有啲人話好多膠漬，其實係因為佢哋用錯膠紙。佢哋唔係用皺紋膠紙係用封箱膠紙，封箱膠紙並唔會實淨啲，更容易有剩膠以及較難清潔。

Q6︰網上購買到的防爆貼有用嗎？答︰防爆膜黐落個窗度一定有啲用嘅，因為黐皺紋膠紙都可以抆實啲玻璃，所以防爆膜都一定可以，但係你話防爆作用嗰件事就係疑問嚟嘅。因為通常做防爆膜，最好就係做窗嘅時候喺廠度做埋，一來貼得好，二來可以做到防爆膜本身施工應有嘅效果。自己買返嚟做一來切割困難、黐貼困難以及效用差啲，既然大家都唔可以 DIY，所以市面上其實好少見到有得賣嘅。

Q7︰DIY 驗窗法？答︰自己做可以做幾樣嘢嘅，因為窗通常會壞手掣、開關窗鉸以及膠邊。手掣方面，如果平時正正常常但鬆咗，即係話入面啲五金零件有問題，咁就要換手鉸。個窗好大，上面有幾個位一齊開一齊閂，就會有個「聯動」。如果「聯動」其中一個甩咗就係時候要換喇。因為甩完一個你唔理佢就會容易繼續甩第二個就閂唔實個窗。所以「聯動」或者手掣突然鬆咗呢個問題就係第一樣可以 check 嘅！而開關窗鉸方面，可檢查有冇缺螺絲、有冇生銹以及閂窗時感覺會否很卡，有可能係窗框或者窗鉸已經變咗形，咁如果你再唔理佢就可能會惡化。

最後就要檢查膠邊，膠邊好容易睇，摸吓黑色膠邊睇吓佢係咪仲係軟身同有冇破損。如破損或變得硬身就有機會漏水，因為佢係靠條膠邊喺閂窗時逼實窗罅。不過 Simon 並唔建議自己搞，因為你望到一個問題唔代表淨係得嗰個問題，有啲人可能見到螺絲有問題喎自己搞吓先。始終一嚟唔熟手，二嚟冇一個專業嘅能力去判斷係咪淨係得嗰個問題，所以窗嘅問題就算只係換膠邊都好，都唔建議自己落手。

Q8︰師傅更換窗戶後等於強制驗窗？答︰當我哋搵師傅安裝或更換窗戶零件時，有啲人會問咁多師傅點樣搵呀？係咪等於驗埋窗㗎喇？如果真係去到強制驗窗你都要再驗過。因為佢到時會有個 Barcode 俾你嘅，你要用返個 Barcode 去登記。但係你而家搵人驗窗可以要求佢驗完窗之後俾個驗窗紙你，雖然唔可以取代強制驗窗，但係都可以確保到佢係一個有牌嘅師傅。

Q9︰如何預防窗戶意外？答︰平時啲窗就有窗花嘅，用嚟保護我哋唔會跌出去或者啲人唔會爬入嚟。但有啲人就想保持好靚嘅景觀，所以就唔想裝窗花，但呢個時候我哋就要識得加裝返一個叫做「限位器」嘅配件。「限位器」有好多款式，可防止窗戶開得太闊、建議無窗花時加裝。通常有兩款，一種就係卡扣式、較方便、一卡扣就開到，當你屋企冇小朋友剩係得大人或冇小朋友來訪就就可以用呢一種。如果你有小朋友則建議螺絲式、較安全、要用匙開關。小朋友攞唔到條匙就開唔到個窗就可以更加安全。當然抹窗嘅時候要小心，唔好成個人爬出去同用啲合適嘅工具。

可自己安裝嗎？答︰睇你買邊一款，好多都可以自己裝，有啲就話免打孔或黏貼式，如果係免打孔黏貼式嗰種，黐唔實其實都好危險，用嚟借力就仲危險。淘寶都有好多唔同款式，但有啲係唔啱香港安裝。好處就係好平，如果買返嚟唔啱裝就再買過。香港都有啲配件，想穩陣啲香港買就保證一定啱裝。小貼士︰裝落窗鉸、不要裝落窗框、盡量不要鑽窿，費事打風落雨會有漏水問題。

【INFO】
裝修中伏大全（裝修學院）
電話：5418 8169
網址：deco-academy.com
FB︰裝修中伏大全（裝修學院）

Text/Yuen
Photo/Jay、香港經濟日報集團