香港樓價35年升幅達1305.7% 入職收入中位數卻隨年下跌 大學畢業生幾時先上到車？
近月不斷聽到香港樓價持續下跌，唔少二手樓主不惜蝕價放樓，而中原城市領先指數 (CCL) 8周亦累跌約5.22%，報156.79點，按周再跌0.84%，重返2022年12月底水平。雖然好多人都覺得而家趁樓價跌就係上車好時機，但近來有調查報告指出，原來香港嘅整體樓價，喺過往35年，升幅竟高達1305.7%，而且仲要係面積430呎或以下嘅細單位升幅最高……唉，究竟幾時先儲夠錢買樓上車呀？！
===========
同場加映：
【家居達人】屋企廢物簡單易變收納好物 鞋盒、紙盒、紙袋通通都得！
============
住屋一向係最困擾香港人嘅民生問題，樓價不斷飆升，但人工嘅升幅又永遠追唔上樓價……根據新青年論壇最近公布嘅《香港各世代大學學歷勞工住屋承擔能力研究報告》指出，由1987年和2022年嘅35年間，本港整體樓價指數升幅高達1305.7%，租金指數亦上升咗279.4%，但同期間內嘅綜合物價消費指數通脹，只係升咗221.8%，反映樓價升勢大幅拋離通脹。
研究報告指出，由1987年和2022年嘅35年間，本港整體樓價指數升幅高達1305.7%，但同期間內嘅綜合物價消費指數通脹，只係升咗221.8%，反映樓價升勢大幅拋離通脹。
430呎以下細單位價錢升幅最高？！
如果睇埋唔同面積嘅單位價錢走勢，結果竟然係單位面積愈細，其呎價及租金升幅則愈高。以實用面積少於430呎嘅細單位為例，於2012至2022年期間樓價指數升幅達87.3%，高於實用面積介乎430至752呎單位嘅82.6%，以及整體樓價指數嘅79.3%。租金指數方面，實用面積少於430呎細單位，於過去10年升幅達30.8%，高於期內整體租金指數升幅嘅25%，升幅亦是在各類型單位中最高。
當個個以為可以負擔買細價樓上車，卻原來少於430呎嘅細單位，於2012至2022年期間樓價指數升幅達87.3%。
大學生入職收入中位數隨年下降？
《香港各世代大學學歷勞工住屋承擔能力研究報告》仲分析咗由1987年至2022年畢業嘅大學生，居住開支與收入嘅關係，並以5年為一個世代來劃分，分成8個世代來比較經調整後嘅初入職收入中位數。結果發現：1987年畢業嘅第一代大學生中位數最高，有17,490元，其次為2002年畢業嘅第4代畢業生，有15,021元；而1992年畢業嘅第二代及2007年畢業的第5代則相若，分別為10,563和10,628元，至於1997年畢業嘅第3代，由於當時樓市正處於1998年亞洲金融風暴前夕嘅高位，所以收入中位數經調整後僅得7,970元。
但因樓價快速上漲，2012年後嘅畢業生，置業能力急降！像2012年畢業嘅第6代，其收入中位數經調整後只有5,819元；而2017及2022年畢業嘅第7及第8代，其初入職收入中位數，分別跌至只有4,492元及4,868元，僅為首代大學畢業生經調整後收入中位數嘅1/4！
根據研究報告分析1987年至2022年畢業大學生嘅初入職收入中位數，愈遲畢業嘅大學生，置業能力愈低。
月薪要儲７成先夠買到１呎？！
為了解各世代大學畢業生對上車盤負擔能力嘅變化，該研究報告就以新界一個約430呎嘅細單位平均呎價作比較，結果發現呎價佔首代大學生嘅初入職收入中位數約19.1%，第二代升至33.9%，第3代升至42.4%；其後樓市雖因金融風暴一度回落，佔第4及第5代大學生收入比例，分別稍跌至21.6%及27.5%；但第6代起比例已大升至52.5%，最近的第7及第8代，更分別急升至75.3%及74.1%。換言之，現時嘅大學畢業生需儲起其月薪超過70%，先夠買到上車盤嘅一呎面積。
新青年論壇團隊認為，港府必須加強土地供應，為私人市場提供足夠房屋；同時應推動產業多元，發展高新科技等高增值行業，提高年輕世代大學畢業生嘅收入，先至係解決年輕人置業問題嘅根本方法。
研究報告以一個約430呎嘅細單位平均呎價為例，發現呎價已經佔近年大學生初入職收入中位數嘅74.1%，即要儲約月薪嘅7成先買得起1呎嘅樓。
text/Joyce
photo/HKET圖片庫
港生活人氣本地熱話
【🎁免費送】HIZERO 輕量級F300潔地機！
【旅途無蝨】請您用AQUA PRO+TECH「驅蚊大師」滅菌驅蚊液 ！
