9號風球的士唔開工兼坐地起價 的士打風有意外或壞車 真係無保險賠償？
上星期颱風小犬襲港，但最引起爭論性嘅，就係期間曾懸掛9號風球，令港鐵喺短時間內停駛露天段路線，包括機場鐵路，結果令大批旅客及市民被迫滯留機場，即使想改搭的士離開，根本就唔夠的士開工，結果好多司機坐地起價，有啲開價照錶加$600，甚至有司機開到$3,000！事後有傳言話當日之所以無的士開工，係因為的士打風無保險，究竟事實係咪咁呢？
===========
同場加映：
【家居達人】屋企廢物簡單易變收納好物 鞋盒、紙盒、紙袋通通都得！
============
香港保險業聯會：的士購買全保會賠償車嘅市價
向來有「都市傳說」話的士行業「打風無保險」，所以每逢掛8號風球或以上，就無乜的士司機願意開工，或者乘機以此為借口濫收車資，但香港保險業聯會澄清，的士可以申請購買全保，喺正常及合理情況下使用車輛，就會受到保障，保險保單中並無任何條款列明喺8號風球下或因黑雨令車輛受損毀而無保障。如申請賠償嘅話，就會搵第三者，即公證行檢視車身水浸後損毀情況，如全損則會賠償車嘅市價，即損毀時嘅車輛價錢賠償與否，並非由保險公司決定。根據香港保監局2022年數據，香港的士每年保費平均為大約34,000元，等同市價，保費並無特別昂貴。而喺9月1日颱風蘇拉及9月8日黑雨過後，其實係有的士向的士保險商提出賠償要求，索償正在處理中。
但香港保險業聯會表示有購買全保嘅的士數量很少，全港約18,800架的士之中，大約僅4,000架（即2成）有投全保。
香港保險業聯會表示只要的士有購買全保，喺正常及合理情況下使用車輛，就會受到保障。
香港的士小巴商總會：賠償會按車齡折舊再減去墊底費
但香港的士小巴商總會就作出多處反駁，首先指現時的士嘅全保費用，平均要約40,000至50,000元，34,000元應該係約3年前嘅水平。而無買全保嘅餘下約13,000架的士，就屬第三者保險，如果行駛嘅時候發生咗機件故障，或者有事故嘅話，大部分都可能要司機自己硬食，如果勉強開工反而會得不償失。雖然喺惡劣天氣下仍有保險保障，但車主亦需要付最低30,000元「墊底費（保單持有人嘅自付額）」所以唔少的士車主都可能寧願唔收幾百元車租，也唔畀的士司機開工。
另一方面，賠償金額其實會根據車齡而有唔同嘅折舊，故的士有幾年車齡嘅話，通常都唔會考慮全保，例如一架的士購入時係30萬嘅話，若果車齡約一年，會先按折舊打8折即約24萬，再減去30,000元墊底費，實際可能只會獲賠償21萬。
香港的士小巴商總會話即使有保障，賠償金額其實會根據車齡而有唔同嘅折舊，加上要扣墊底費，故的士有幾年車齡嘅話，通常都唔會考慮買全保，現時大部分的士均屬第三者保險。
香港的士小巴商總會亦指打風期間根本唔適宜駕車，的士司機亦會擔憂路面客量係咪足夠，以及收工後係咪有交通工具可安全返家，所以亦應該體諒司機嘅安全考慮。此外亦提到政府應盡快讓的士行業加價，因為咪錶收費現時已滯後約20%，以提高司機收入。
香港的士小巴商總會就話其實打風期間路面狀況危險，所以亦應該體諒司機嘅安全考慮。
text/Joyce
photo/HKET圖片庫
港生活人氣本地熱話
↓【限時搶⚡】SmileLife™ Probio益活 厚生益菌元↓
↓提升腸道益菌，加強免疫力｜改善易敏體質，對抗濕敏↓
【旅途無蝨】請您用AQUA PRO+TECH「驅蚊大師」滅菌驅蚊液 ！
