電單車泊屋邨慘被整爛兼推走 車主1招恐嚇「攬炒」迫現身賠錢!反遭網友狂插自私精

文: 黃樂恩
2023.11.13

香港電單車越來越多,車位供不應求,不少港人為了方便慳錢,都會把電單車停泊在屋邨公眾範圍內!最近有沙田街坊網上發文,指有陌生人擅自移動他的電單車,導致軚盤損毀,令他感到深深不忿,於是發文公審要求肇事者主動賠償,否則就報警「攬炒」。事件引發網民熱議,但大多數人都不同情他的遭遇,當中網民認為車主這樣做非常自私,即入內文睇詳情啦!

日前有車主Facebook群組「鳩鳩沙田」上發帖,他表示有一輛後備用的電單車停泊在沙田禾輋邨公眾範圍內,從去年初開始便停泊該處,過去曾被人拆去後鏡,但當時他並未追究。直到上周四 (9日),車主突然收到朋友通知,指他的電單車被陌生人擅自推出單車徑,其後更發現軚盤經已損毀。

今次事件讓車主忍無可忍,他先後在網上發文、車頭前留下告示及聯絡資訊,要求肇事者現身道歉兼賠償,其後更報警威脅要「攬炒」,要其他同樣在該處泊車的人被抄牌,「見字盡早聯絡賠償,否則報警處理,呢個地方大家唔洗泊」、「(電話號碼)WhatsApp 我解決,否則全場走鬼」。據悉,該名車主現在所停泊的地方,並非是屋邨規定泊車處,因此其他在該處泊車的人同樣會有違規抄牌的風險。

事件引發網民熱議,但大多數人不同情車主遭遇,紛紛指責他此舉非常自私,「拉晒其他人落水啫」、「本身你岩哂,但你咁樣威脅其他無辜既人就好反感」、「點解要攬炒?」、「正宗cheap精,自己泊街成年犯法唔講,然後比人偷完野覺得自己大晒」、「自私到極點,本身違泊X點解仲咁X惡」、「泊得街就算係骨位都要有心理準備比人搞」。

有部分網民表示支持車主報警處理,「支持報警處理」、「 一泊兩散」、「快啲有咁大搞咁大 想睇」、「千祈唔好忍 留名睇成街乾淨曬...」。另有網民感到不解,詢問「果度泊,算唔算違泊?」、「合法泊車位嚟㗎咩?」樓主對此回應稱「冇人報警唔算,屬於房署範圍」,但這項說法引來大量網民炮轟,直指沒有在合法停車位泊車都是違泊,「其實都算係違泊,只不過房署冇抄你,其實佢哋係有權抄」、「無係合法泊車既地方泊車,一律就係違泊…」、「啲人好鍾意將自己啲不當行為合理化」、「房署都有違泊告票」、「無人報警就唔算違泊,咁殺左人無人報警又唔違法?真心好笑。」

近年在公共屋邨違例泊車問題日趨嚴重,房屋局局長何永賢於6月28日回覆立法會議員提問時表示,今年因違泊被扣押車輛總數多達1,187輛,相比2年前大幅增加近5倍,政府將加強巡查,改善公共屋邨違泊問題。在一般情況下,當屋邨辦事處發現有人在屋邨範圍內的公眾地方放置雜物造成阻礙,包括於行人路上停泊或棄置電單車等時,會按既定程序處理。先發出書面警告要求物主在指定時間內移走有關物件;倘若無效,便會根據《房屋條例》(香港法例第283章)賦予權力將有關物件移走及扣押。

來源:FB@鳩鳩沙田 (Go Go Shatin)

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【社群送禮】麒麟一番搾啤酒及禮品套裝!↓

↓麒麟一番搾啤酒杯/櫻花富士山杯/櫻花玻璃碟↓

↓麒麟一番搾啤酒杯/櫻花富士山杯/櫻花玻璃碟↓