房委會上星期公布咗居屋2023售樓書及價單，首批買家於1月31日起有得開始揀樓喇！居屋2023有6個全新屋苑，包括啟德啟悅苑、觀塘安楹苑、安麗苑和安樺苑、屯門兆翠苑及元朗朗天苑，以市價62折出售，合共提供9,154個單位，如果閣下正係有份揀樓買家，恭喜你呀！如果仲苦惱緊要揀邊屋苑，不如入嚟睇吓呢6個屋苑，各有乜嘢賣點或者缺點喇！
============
同場加映：
【家居達人】10個輕鬆手洗步驟 羽絨外套清洗Tips
============
A.啟德啟悅苑：最貴「樓王」所在 位於「宋皇臺站」出口旁
今期居屋2023中，最貴嘅「樓王」，係啟德啟悅苑B座30樓8室，實用面積469呎，售價494萬元，呎價約10,543元！單位嘅賣點，係座向東南，預料望向正在興建嘅啟德體育園，並擁有觀塘避風塘及維港景色，但單位缺點為「開門見廁」，預計可間約兩間房。而啟悅苑本身亦算係6個屋苑中條件最好嘅屋苑，由兩座組成、共提供2,046個單位，面積由278-475呎之間，預計落成日期為2024至2025年，位處市區之餘，配套亦齊備，既有屯馬線嘅位於「宋皇臺站」出口旁，區內亦有大型商場Airside以及公園等，所以屋苑平均呎價亦會是今期居屋最高，平均達9,390元。
啟德啟悅苑平均呎價，是今期居屋最高，平均達9,390元。
啟悅苑位於屯馬線「宋皇臺站」出口旁，交通方便。
區內亦有大型商場Airside以及公園等，生活配套極佳。
啟悅苑B座2樓至31樓平面圖（source：房委會售樓說明書）
啟悅苑所在位置圖（source：房委會售樓說明書）
B.觀塘安楹苑、安麗苑、安樺苑：有機會見海景 但交通不便
今期居屋位於安達臣道石礦場嘅項目，涉及觀塘安楹苑(1,140伙)、安麗苑(1,380伙)和安樺苑(990伙)，共3,510個單位，佔咗總供應量嘅38%。當中安楹苑單位面積為282至478呎，售價由171萬至394萬，平均呎價7,370元。安麗苑單位面積為278至497呎，售價由169萬至376萬，平均呎價為7,260元。安樺苑單位面積為296至495呎，售價由181萬至377萬，平均呎價為7,030元。
呢個項目嘅優點，係位處市區，而且地勢較高，有機會俯瞰維港海景。不過由於仍然屬於新區發展，所以呢三個屋苑最大缺點，係交通！買家要有做「開荒牛」打算。呢三個屋苑遠離港鐵站，暫時除咗小巴接駁至觀塘、新蒲崗或九龍灣外，惟有到寶達邨、安泰邨及秀茂坪邨轉乘巴士線，接駁金鐘、尖沙咀及將軍澳等地。安達臣區除咗社區設施有待興建外，暫時亦無商場、商舖等配套，住戶相信要靠周邊公共屋邨如安達邨的商場提供服務。
觀塘安楹苑、安麗苑、安樺苑同位於安達臣道石礦場舊址，雖有機會俯瞰維港海景，但暫時嚟講，交通相當隔涉。
要搭巴士，要到鄰近嘅寶達邨、安泰邨及秀茂坪邨轉乘巴士線，商場及食肆亦要光顧屋邨商場。
安楹苑B座15樓至26樓平面圖（source：房委會售樓說明書）
安楹苑所在位置圖（source：房委會售樓說明書）
安麗苑A座12樓至25樓平面圖（source：房委會售樓說明書）
安麗苑所在位置圖（source：房委會售樓說明書）
安樺苑B座3樓至28樓平面圖（source：房委會售樓說明書）
安樺苑所在位置圖（source：房委會售樓說明書）
C.屯門兆翠苑：屯門延線新站6年後落成 向西低層單位可能有噪音
屯門兆翠苑共有2座共518伙單位，所提供嘅單位數量，為眾新居屋最少，預計2025年竣工，單位面積為281至518呎，售價由179萬至372萬，平均呎價6,800元。呢個屋苑最大賣點，係政府已拍扳興建「屯門延線」，其中一個站口更鄰近「兆翠苑」！呢個暫稱「屯門第16區站」，係會採用三層設計嘅地面車站，上層及中層分別係月台及車站大堂，車站出入口則設於中層及地面，預計車程五分鐘便可抵達「屯門站」。但相關鐵路工程，暫時預計要到2030年先落成。若以「兆翠苑」2024年可入伙嚟計算，起碼仍需等約6年，先會有鐵路搭。
政府已拍扳興建嘅「屯門延線」，其中一個站口鄰近「兆翠苑」，但暫時預計要到2030年先落成。
所以目前交通，要依賴旁邊嘅「屯門泳池輕鐵站」，搭約五個站前往「西鐵屯門站」，又或者依賴小巴及巴士前往區外。其他生活配套，暫時都係依靠對面、內設小型商舖及酒樓嘅「屯門中央廣場」，或者私人屋苑「海典軒」嘅兩層高小型商場。前往比較多商舖嘅「友愛邨」商場，就要步行約15分鐘。
目前兆翠苑出入交通，要依賴由旁邊嘅「屯門泳池輕鐵站」，搭約五個站前往「西鐵屯門站」。
另一方面，屋苑附近多為私人屋苑，故大部分單位都會望樓景，但向西嘅單位，會望到屯門河及日後預計興建嘅運動場，但「海皇路」屬於連接屯門碼頭嘅主要幹道，加上下方就係「輕鐵站」，低層單位或會有噪音問題。
兆翠苑A座2樓至29樓平面圖（source：房委會售樓說明書）
兆翠苑所在位置圖（source：房委會售樓說明書）
D.元朗朗天苑：平均呎價最平 地理位置及配套最輸蝕
元朗朗天苑共有3座逾3,000伙單位，為今期供應量最大屋苑，預計2026年竣工。項目預計樓高48至50層，落成後將成為全港最高的公營房屋。單位面積為280至454呎，售價由149萬至318萬，平均呎價為
6,280元。而今次居屋計劃中，最平嘅單位就係元朗朗天苑A座3樓19室，面積288方呎，售價149萬元，呎價5,164元。若以綠表首期只需5%來計算，最平只要約7.43萬港元便可上樓。
元朗朗天苑共有3座逾3,000伙單位，售價由149萬至318萬，平均呎價為6,280元，係今次居屋計劃中售價最平嘅屋苑。
不過喺今次6個屋苑中，論地理位置及配套，元朗朗天苑最輸蝕！屋苑位置比較接近屏山，出入多數要到「屏山站」搭輕鐵至其他地方再轉車，至最近嘅西鐵朗屏站，都要駁車前往。至市區，可往青山公路屏山段轉巴士路線往荃灣或佐敦等。附近嘅購物及飲食配套亦相當缺乏，最近要到大馬路，或者大橋村一帶。
但朗天苑嘅交通生活配套都算最輸蝕，出入要到「屏山站」搭輕鐵至其他地方再轉車。
朗天苑A座4樓至38樓平面圖（source：房委會售樓說明書）
朗天苑所在位置圖（source：房委會售樓說明書）
text/Joyce
photo/HKET圖片庫
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】卡樂B粟一燒熱浪香辣味！↓
↓ 粟一燒結合熱浪，香辣惹味！↓
《社群狂歡大激賞》！送hellolulu最新系列袋款🎁！
