房委會積極出招打擊濫用公屋 收回2,200個單位 下一步擬設賞金鼓勵舉報？

============
同場加映：
【家居達人】10個輕鬆手洗步驟 羽絨外套清洗Tips

============
房委會去年中，要求首批約8.8萬名喺公屋居住未滿10年嘅租戶，申報居住情況及有否擁有香港住宅物業，截至2024年1月中，當局已收回約8.7萬份申報表，約總數超過九成九；而截至2023年12月31日，因租戶濫用公屋、違返租約或房屋政策而收回嘅單位，約為2,200個。另有約100個租戶逾期未交表，當局亦未能聯絡上，對於呢啲個案，當局會「重點處理」，例如會進行家訪、調查戶主出入境紀錄或住醫院記錄等。

房委會去年中要求約8.8萬名公屋住戶申報居住及擁有物業情況，截至2023年12月31日，因租戶濫用公屋、違返租約或房屋政策而收回嘅單位，約為2,200個。

多角度調查   揭發70個租戶擁有香港物業
喺審查過程中，當局喺去年底透過與土地註冊處建立嘅資料，比較及核對機制，隨機抽選約3萬個租戶進行查冊，覆核後發現有46個家庭，證實擁有香港住宅物業！其中6個家庭已如實喺申報表中申報，房委會將跟進發給遷出通知書或檢控。另一方面，去年12月中，房委會就當時仍未交回申報表格嘅900多個租戶，進行資料比較及核對，證實有24個家庭擁有香港住宅物業，即代表去年當局揭發共70個公屋租戶擁有香港物業個案，羅淑佩表示房委會會跟進個案及發出遷出通知書。另外，房委會再抽選多13,000個已交表嘅租戶進行查冊，正詳細審視每宗個案，並會按覆核結果作跟進。因應新措施，亦有約330戶因已移民、已購買物業等不同原因，而主動交回單位。

房委會透過多方調查及核對資料，揭發70個租戶擁有香港物業，羅淑佩表示房委會會跟進個案及發出遷出通知書。

物管公司協助揭發濫用公屋租戶
另一方面，羅淑佩表示自2023年第三季開始，若物管公司成功發現濫用公屋租戶，會喺表現評核報告給予該公司額外分數，而自推行呢個制度後，物管公司發現濫用公屋嘅個案有22宗，成功執行扣分制嘅個案則有52宗，涉及19條管理外判屋邨，共9間物管公司。而護衛公司亦有發現濫用公屋個案，有6宗，當中成功執行扣分制個案則有1宗，涉及4條屋邨，共3間護衛公司。

自2023年第三季開始，屋邨嘅物管公司及護衛公司亦有協助成功發現濫用公屋租戶。

擬設舉報制度   4月開始公屋富戶申報行動
羅淑佩又透露，正研究設立舉報制度，或參考警方好市民獎，而「好市民獎」目前獎金為3,000元，至於舉報制賞金具體金額仍有待研究， 但羅淑佩形容報酬金額唔會多，因為設立目的並非鼓勵「舉報文化」。而下一輪申報表行動將會喺今年4月展開，會涉及25萬名喺公屋住滿十年而已被納入「富戶政策」下需申報嘅租戶。至於有關垃圾徵費，延至8月實施，羅淑佩指會喺屋邨垃圾站加設監控裝置，避免邨外人士違法將垃圾棄置到屋邨內。

房屋署署長羅淑佩透露，正參考警方好市民獎，設立舉報濫用公屋個案制度。

text/Joyce
photo/HKET圖片庫