肥媽大鬧垃圾徵費被找「晦氣」?同局長拍片教扔垃圾:狗屎咁處理最慳錢?

文: 黃樂恩
2024.02.10

垃圾徵費措施押後至今年8月1日實施,早前環保署找來狂鬧該政策「垃圾、黐線」的肥媽,與環境及生態局局長謝展寰拍宣傳片,教市民善用6仔回收店、智能廚餘機,大讚這樣做可以節省扔垃圾的開支,又可以免費換糧油雜貨,最後肥媽更在片中請教局長如何處理家中6隻狗的狗屎,即入內文睇睇啦!

上月肥媽拍片狂鬧垃圾徵費政策,她在片中怒斥港府不應對市民製造更多問題,又指這樣無疑是將責任轉嫁市民,「垃圾、黐線」、「你唔畀人哋用黑膠袋,要人哋買你啲膠袋,咁你同環保直情係背道而行啦,即係買多啲膠袋啦」。不過局長謝展寰跟肥媽似乎並無因此「結怨」,日前Facebook專頁「大嘥鬼」上載新影片,二人一同拍宣傳片「當肥媽遇上局長時」,更在片中教大家如何從精明慳家的家庭主婦角度出發,用環保回收「慳得一蚊得一蚊」。

片中肥媽手上拿著裝滿垃圾的指定袋,在啟業邨社區會堂附近「偶遇」局長謝展寰,肥媽一見到對方後即問:「局長,你呀?你唔係嚟找我晦氣啊嘛?」謝展寰隨即否認,又指自己是來找她傾下有甚麼不清楚的地方。

肥媽聽後便表示自己真的不清楚「要點做」,謝展寰便打開其中一袋垃圾,他發現裡面有不少物品都可以回收,於是便帶肥媽到綠在區區的回收便利店(又稱 6仔店),其後更親自教她如何使用回收設施,稱這樣做可以慳垃圾袋錢之餘,又可以儲分兌換禮品,免費換糧油雜貨、紙包飲品和指定垃圾袋。

隨後,謝展寰又帶肥媽到智能廚餘機,示範如何使用智能廚餘機,他指出這部廚餘機具備除臭、殺菌、消毒等功能,除了解決家中廚餘問題兼儲回收積分,廚餘回收後更可轉廢為能。最後肥媽更在片中提出「私人問題」,指家中養了6隻夠,每日有「12篤狗屎」該如何處理。謝展寰解答指,「屎」涉及衛生問題,確為垃圾,他建議肥媽可用售價3毫的3公升指定袋裝妥即可,「裝狗屎咪唔使咁貴囉」。肥媽聽後都表示都可以負擔得到,「我哋師奶仔其實都只係想慳,用這些回收物就可以賺到指定垃圾袋、糧油雜貨,對大家都有著數」,而謝展寰則回答,今次計劃目的是希望改變市民的生活習慣,「揼少啲、慳多啲」。

宣傳片一出,即在網上引發熱烈討論,有網友看後認為港府構思固然好,但港人對回收的意識和普及度不高,加上回收地點不方便、回收設施不足,現在只有4成公共屋邨設有廚餘機,讓不少網友紛紛質疑其成效,「我知要做回收,但回收設施未足夠。你都識講啦,例如廚餘機,只有四成公共屋邨有,有六成係未有,佢地去那裏倒?」、「回收idea係好,但麻煩開多啲點呀!唔係要拎住一大袋膠樽行到老遠/坐車去掉?」、「這是示範的地方啟業邨,設有廚餘機及最近新開嘅綠在區區回收便利點,所以比較容易做回收的工作」。

來源:FB@大嘥鬼 Big Waster

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

↓透過發佈帖文賺取收入!立即參加!↓