中年好聲音｜李佳孖羅啟豪加拿大登台 上機前遇意外：真係有驚無險

同場加映：12怪盜｜Anson Lo拍動作戲太肉緊成受傷擔當 姜濤靠Stanley教戲不惜自嘲體重 

啟豪同佳佳當日乘搭早上九點嘅航班，晨早天未光就出門口。幸好二人預早兩個多小時到達機場，因爲佳佳去到櫃位登記時，航空公司職員竟然告知入境簽證出現問題，未能讓佳佳上機。佳佳表示：「我兩個月前已經申請好咗入境簽證，仲收到電郵確定。去到櫃位聽到職員咁樣講真係嚇一跳，因為主辦單位安排好晒，如果我作為表演嘉賓出席唔到一定會為對方帶嚟好大影響。等咗好耐，經我哋追問下職員幫我哋致電去加拿大確認先知道原來係搞錯咗，冇問題可以畀我上機。真係有驚無險！」而佳佳同啟豪一大清早都獲大批歌迷到達機場送機，為佢哋嘅偶像出征加國打氣同加油！

啟豪兩個禮拜前先啱啱喺拉斯維加斯登台返港，又要即刻搭長途機，問佢會唔會好辛苦，啟豪話：「唔怕呀，有工作就十分開心！同埋今次唔單止同佳佳一齊去好開心，其實亦因為我以前喺美國讀書時，成日都過加拿大探親，所以對於加拿大都好有親切感，好開心今次可以藉住工作機會返去行吓。」

+3

+2

點擊圖片放大

兩位順利登機並安全抵達溫哥華後，便立即出席有關當地嘅《中僑互助會》嘅《中僑星輝夜》活動。李佳對於今年有份參與除咗覺得極之榮幸，同埋好開心有機會第一次去到加拿大。而啟豪則覺得非常感恩可以參與幫助加拿大社區嘅善事。

圖片：大會提供