金像獎提名女主角│衛詩雅曾被嫌棄冇人氣失機會 零收入與陳家樂互相借錢度日
藝人星途是否順利、能否走紅，要靠天時、地利、人和。衛詩雅2008年入行不久，幸運地成為英皇公司旗下藝人，可謂樹大好遮蔭，工作量毫無疑問會比他人多。不過，在這個娛樂圈打滾16年話題欠奉，形象令人印象模糊，甚至早前接受薛家燕訪問時，更被對方誤認為連詩雅。衛詩雅自嘲是零話題女藝人，不過機會突然出現，衛詩雅的「飛雲」終於來了，今年憑電影《不日成婚2》，獲提名金像獎「最佳女主角」，守候多時終於被看見。
衛詩雅亦坦承自己有這個問題，她早前接受本網訪問時自認在別人眼中是個悶蛋，一個毫無話題性的女藝人：「當一知道有份被提名，真係好興奮，唔止係衛詩雅，係整套戲，覺得有人睇到我哋全個團隊，有被看見嘅感覺。始終呢套戲係愛情小品，呢個片種同金像獎好似冇乜緣，而我同金像獎更加無緣，我不斷問自己係咪發夢，好難以置信。」
其實衛詩雅入行以來，拍戲的機會不少，她演出過不少出名電影《全城熱戀熱辣辣》、《金雞SSS》、《掃毒2天地對決》、《紮職2》、《不日成婚》系列；而她亦有拍劇，近年在ViuTV的《歎息橋》、《Food Buddies》越來越多人留意到她，大讚她增添了不少女人味，而且都話她在戲中演得出色。
除了跟獎項似乎沒緣之外，衛詩雅亦自知入行以來的話題性也不高，早前接受薛家燕訪問時，衛詩雅也被認錯是連詩雅。衛詩雅都自嘲是最悶的女藝：「我成日畀人認錯，可能我係欠一個記憶點，欠討論性話題，係咪要整一單新聞出嚟，但有新聞又未必好。我可能係全港最悶嘅女藝人，咁多年冇新聞算係我最大嘅新聞。」
不少藝人都會自己製造機會、營造話題，衛詩雅笑言，初入行的時候，跟陳家樂都一樣，出席活動時都未必有人理會：「我哋好早明白娛樂圈有緋聞就有新聞，我哋次次出嚟冇人理，於是自己製造緋聞，記者只會訪問其他大明星，我同陳家樂會喺後面扮傾偈，叫佢搭我膊頭扮有嘢，但係都冇人理。直至有次被人追蹤我哋一齊行街，話我哋拍拖，我哋嗰次好開心，有嗰種：阿媽我得咗喇嘅感覺，向住成功邁向一大步。」
有段時間，衛詩雅被遺忘，甚少工作。她表示有段時間沒工作，收入很少，與陳家樂一起捱過窮困日子：「有段時間我哋互相向對方借錢，有時八達通冇錢，要問佢借100元增值返屋企，隔兩日還番。食飯一定惟有AA制，如果邊一個環境好啲，都會請吓客，夠錢嗌凍飲加2元嗰隻囉。」
衛詩雅曾因為人氣欠奉而聽過不少閒話，令自己難憾：「有段時間我好似被呢個圈遺忘，公司傾咗個工作番嚟。我都識嗰個搞手，對方話我搭你落去架咋，肯畀你做已經好好，聽到嗰刻好傷心。有時啲投資方都嫌我冇名氣唔想用我，另外有一次，有個導演想搵我拍嘢，但會有人問，點解你用衛詩雅？佢連提名都冇，點解用佢。不過我一世人夠運，好多貴人幫我。」
一直堅強的衛詩雅沒有被打沉，她懂得尋找機會，在被遺忘的日子裡，她積極考取專業牌照，亦有做過不少生意。近年，亦都會發展網上社交平台事業，她有自己的YouTube頻道，自己拍片剪片：「呢個係我主要收入，而家主要收入係網上媒體。以前做藝人會好被動，但而家唔同喇，要自己製造機會，我成日同公司新artist講，無時無刻都要自己搵機會畀自己。」
對於電影拍攝，衛詩雅同樣都有這樣積極的態度：「就係因為鍾意拍戲，所以會主動啲，到而家我都會主動打畀啲導演問有冇角色搵我做，就算一個行路過鏡嘅人我都OK，到而家我都會。」而這麼多年的拍戲生涯，衛詩雅很感激李敏和邱禮濤導演，而她更稱陳茂賢導演是自己的伯樂，感恩他們一直重用自己，才育成今天的衛詩雅。
圖片來源：本網圖片、IG、資料圖片、大會提供
Makeup: MW
Hairstyling: Daniel Chou
Outfits: INITIAL
Venue：余地 @yudei.hk
港生活人氣娛樂新聞
↓【限時搶⚡】Dermeze得美滋無皂清潔沐浴乳↓
↓修復、補濕滋潤、鎖水保水｜遠離乾燥和粗糙↓
【Chill Guide旅遊指南😎】日韓台泰越深圳2025行程攻略✈️
↓即睇最新行程懶人包、爆紅打卡點🔥、必吃美食😋等↓
