沈宗賢由馬來西亞飛來香港參加《中年好聲音2》，人生路不熟，41歲的他靠著對唱歌的一份熱愛，放下一切追夢，這是中年人的一份浪漫。宗賢坦言今次比賽至少花費六位數字，面對馬來西亞的代表一位一位被淘汰，要獨自堅持下去絕對不容易，最終成功走到決賽七強，簽約TVB正式落地香港發展做歌手。
同場加映：打天下2│AK即學即打動作比上輯華麗 Tiger武術底子身手獲導演讚賞
沈宗賢多年來在馬來西亞以「紹恩」的名字闖天下，在YouTube、酒吧和直播APP等演唱「走江湖」，經驗豐富加上超凡的唱功，令他信心滿滿來港挑戰自己，「我本身期望係入到十強，因為我覺得第二屆真係好多勁人，當初嚟海選嘅時候乜都唔知，原來呢個係《超級巨聲》，呢個又係《亞洲星光大道》，全部都出過道，其實自己都有壓力。」他表示小時候外婆希望他可以上TVB唱歌，到今次比賽終於如願，沒想到比預期的收穫得更大，「呢次嚟香港學到好多嘢，真係聽清楚自己把聲，以前做Live Band只聽得六、七成，其他都係現場喧鬧聲，今次終於慢慢了解自己聲線，加上好多老師悉心教導，我好開心。」
來港比賽長達九個月時間，飛機票、住宿、生活費等等令沈宗賢花上六位數字的儲蓄，他說：「我原本喺馬來西亞做髮型屋，但冇辦法，兩、三個月前我執咗，因為我唔喺度，客人都幫襯唔到，加上香港要生活都幾貴，（值得？）冇話值唔值得，做每個決定都要負責任，決定嚟比賽之前已經預有呢筆使費，嚟到中年，我係好堅持我嘅音樂夢想同理想，唔可以違背自己良心。人生好短，呢個疫情令我睇到人係好脆弱，唔嚟比賽的話，我會好後悔。」
沈宗賢表示自己六年級開始愛上唱歌，第一次走上舞台是畢業表演唱兒歌，雖然外婆看好他的歌藝，但家境不好，根本沒有機會學唱歌，幸好得到表哥所送的結他，他就全靠自學，在中學時期拎住結他走天涯，得到多個歌唱比賽的冠軍。「我哋讀嘅只係鄉村學校，成個學校都得廿幾個學生，但老師同校長好好，知道我鍾意唱歌同畫畫，畀我負責畫學校壁畫，唔使上堂，哈哈！」直至畢業之後，沈宗賢在酒吧賣唱，加上髮型屋的收入，生活總算安穩，不過疫情三年間卻令他陷入經濟危機，酒吧、髮型屋都沒有生意，他惟有學習在App唱歌，由素人身分開始慢慢建立自己的粉絲群，「App做得好成功，好多台灣歌手都有App開演唱會，巫啟賢開一場兩小時直播演唱會，差不多收到一百萬人民幣打賞，我當然都好心動，後來我向公司申請，做咗差不多兩年，終於畀認證我去開一次演唱會，當時演唱會好成功，打賞有差不多廿幾萬人民幣，幫我解決當時生活上問題。」他笑言當時唱App的收入比唱酒吧還要好，不過惟一不夠好的是沒有現場觀眾的掌聲，「無論唱酒吧定App，我都要識好多歌，甚至係跨世代，Bruno Mars、Maroon5等等全部都要識，經典歌當然係強項，都要識唔同年代音樂先可以多方面發展，為咗呢一行生存，唔需要每一把刀都利，但你需要好多把刀。」
來自馬來西亞，文化和生活習慣始終有所不同，宗賢坦言有感自己在《中年好聲音2》中顯得格格不入，「好多時候好難融入佢哋話題，港式廣東話交流，我都唔可以即時明白佢哋講咩，好彩係大家幾融洽，開頭大家以為我好靜，其實只係我理解得慢咗而交流唔到，慢熱啫但都可以一齊玩都可以好癲。而且馬來西亞節奏好慢，而家絕對係一個好好體驗，同媽媽嚟香港生活，發展我歌唱事業，希望慢慢融入呢度環境。」
撰文：楊安莉
攝影：何家賢
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】美獅鋒味搖滾美食節2024雙人電子門票！↓
↓ 呈獻超過20款特色環球創意料理 / 匯聚多位亞洲人氣歌手！↓
《社群狂歡大激賞》！送hellolulu最新系列袋款🎁！
