44歲的劉威煌2014年曾經從TVB的門口離開，沒想到相隔10年再以「中年」身分再次走入這度門，無疑事前有一定的心理關口要衝破，但猶幸的是一份「衝動」讓他海選當日已經遇到或重遇這班「輕鬆啲」好兄弟，透過比賽之中建立密不可分的關係。威煌認為幾年的直播生涯，網友的支持令他性格和心態上有一定的轉變，今次再簽TVB有著跟上次不一樣的期盼。
同場加映：神耆小子丨鄭則士稱人紅未必係強籲保持初心 慶幸能變老：下部劇先係我嘅高峰
威煌從小就熱愛唱歌，參與過大大小小的比賽，直至《超級巨聲》讓他成為真正的歌手，可惜發展平平，2014年決定離開TVB獨立發展，隨後因著疫情令他開直播唱歌慢慢由零開始重新建立粉絲群。曾經離開過，他自問都沒想過自己會走回頭路，「其實《中年好聲音》已經有人叫我玩，但感覺身分尷尬唔太適合，後來見到周吉佩都玩喎，加上開幾年直播之後，覺得自己其實搖滾以來都可以唱好多唔同曲風，既然有平台就去試吓。心態上唔係要爭第一，但每次都好想晉級，因為晉級就可以唱多一首歌，所以好珍惜每次台上表演嘅機會。」
至於再簽TVB成為旗下歌手，威煌坦言全因被參賽者所感動，很希望參與跟大家一齊做好一件事。他直認昔日的自己不太懂得跟別人溝通，連行規和這一行應該注意甚麼都不懂，迷迷糊糊就離開了。「好多人一聽劉威煌個名就話：『哦，好寸嗰個吖嘛！』識我就知唔係啦，我如果咁寸就唔會有咁多朋友啦！但我深明呢一行，無論對觀眾定內部工作人員都一樣，唔鍾意你就死得，所以《中年好聲音2》之後，而家出街好多人好開心同我打招呼，好似街坊一樣咁親切，我好感恩可以去到呢一步。」問到是否生意穩定才可以自在地再做歌手？他表示：「小生意應付生活上係冇問題，但唔係因為咁而簽約，同公司溝通好晒，大家都唔係小朋友，最緊要舒服。坦白講我經濟唔係特別好，只係我過活唔算貪心亦唔大使，唔係帶住負擔入嚟，亦無諗住要TVB令我發達。」
劉威煌表示從來沒有介懷過「駙馬」的指控，心態上只是不想太多負面或不實報道，因為不是每個人心理上負擔得起。「如果我真係億萬駙馬，點會免費咁樣開直播唱歌？我覺得而家嘅豁達係直播觀眾畀我，以前唔識得表達自己，好多嘢都硬食，自從開直播之後，真係幫我好多，將心底話都講晒出嚟。講真，初頭開直播都好多留言鬧我叫我收皮，根本唔理我唱得好唔好，但亦都有好多人多謝我，因為疫情好悶，唱歌令佢哋開心，就算鬧我都可以令佢哋開心，咁我就真係釋懷。」
比賽後，劉威煌率領譚輝智、梁浩賢、梁思傑、甘永傑、王嘉明、顏米羔及龍導成立「輕鬆啲」Channel，短短3個月時間已經儲到過萬人訂閱，觀眾喜歡聽歌之餘，亦被他們之間的兄弟情所感動。威煌說：「唔知係咪年紀問題，人越大就冇咁容易有真友誼，咁大個人總會分到真情假意，但呢班係係攤開個心出嚟互相幫忙，就算比賽緊有競爭都照畀意見，唔會隔岸觀火。我哋八個人性格好唔同，但又好願意分享感受，平時傾偈傾通宵，好多嘢講，咁就不如上網一齊講。」由於經驗最多，威煌擔當隊長的角色，至於歌唱發展，他坦言都有給予素人兼兄弟譚輝智建議，他說：「其實輝智好適合簽，比賽八個月，佢外表好似好佛系咁，但其實仲需要時間畀觀眾睇清佢，越睇清大家就會越鍾意佢，而且佢經驗最嫩口，可以畀大家睇住佢進步。」兄弟情越來越強，除了經常走在一起，更齊齊去旅行，問到會否擔心忽略另一半？他說：「其實我哋全部啲另一半都好Friend，我哋叫『輕鬆啲』，佢哋叫『太輕鬆』，已經變成一個團體，懷疑差少少就可以出道，因為個個都係靚女。太太們好好，100%支持我哋去做呢件事，絕對係緣份同吸引力法則，冇強求過佢哋要做朋友，但最終佢哋成班女士係Friend到不得了，自己有個Group吹水！坦言講，忽略一定有，我除咗幕前工作，仲有公司嘢又搞Channel同演唱會，有時候幾日都同老婆見唔到面，只係瞓埋同一張床，希望之後時間安排好少少，可以多啲機會陪吓老婆，答謝老婆啦！」
撰文：楊安莉
攝影：何家賢
」，
App內睇文同睇片可隨時捕捉U Fun彩蛋，
換領現金券及禮品！
【送PHYSIOGEL全新男士護膚系列】
↓ 為男士們全天候水分修復💧↓
↓【夏日密密賞☀️】輕鬆擁有迷人電眼⚡↓
↓免費換領Clalen海外限定款IRIS彩色日拋隱形眼鏡！↓
