家族榮耀之繼承者丨羅子溢與梁諾妍連場限制級濕吻戲 洪永城動肝火：老婆冇講錫咁耐
《家族榮耀之繼承者》現正於翡翠台熱播，當中男女關係七國咁亂，唔少人睇到好入戲好肉緊。不過最緊張嘅都莫過於洪永城，皆因洪太梁諾妍（Inez）喺劇中同羅子溢有連場咀戲，搞到佢睇又唔係，唔睇又唔係！
Inez於劇中飾演大馬拿督女兒Gigi，並與飾演丘智斌嘅羅子溢有不少對手及親熱戲。日前一集Inez與子溢於遊艇上激嘴，如入無人之境，洪永城就喺社交平台post出自己睇呢場戲時嘅反應，見到佢過山車一般嘅心情，唔少網民都留言安慰。
洪永城曲線幫老婆宣傳，日前於內地社交平台上載「直擊老婆親熱戲」旁述片段，留言：「雖說最近經常有評論話老婆演技好，我都好開心，但總是有點委屈的。」洪永城一開始已經忍唔住狂讚老婆：「朝頭早起身都咁靚。」、「古銅色嘅皮膚真係好襯佢，一開始我就係畀佢嘅膚色吸引。」不過之後畫風一轉，Inez從後熊抱半裸羅子溢，洪永城就皺晒眉頭：「你從來冇咁樣喺後面攬過我喎？！」之後戲中嘅Inez表示鍾意羅子溢夠Man，洪永城反擊：「我冇胸肌咩？係腹肌爭啲啫」。
去到戲肉，Inez同羅子溢法式濕吻，洪永城大叫：「喂喂喂，使唔使出埋脷？」仲「激到」面紅，「投訴」Inez冇同去講去到呢個尺度：「即係呢場戲唔使咁close嘅……使唔使錫咁耐呢？我老婆都冇話畀我知錫咁耐。」日前，tvb官方網站post出Inez同羅子溢另一場咀嘴戲，吳若希就「唯恐天下不亂」，tag洪永城睇片，洪永城再次嬲嬲回應：「睇咗好多次啦😡😡😡😡」
唔少網民都留言安慰洪永城：「你下部戲可以親楊怡（楊茜堯）。」有人更錯認Inez係郭少芸：「我以為佢咀郭少芸」、「你當佢郭少芸唔好當佢係你老婆就得。」都有網民表示接受唔到咁多情慾戲：「感覺結了婚的男女演員沒必要接這樣的吻戲。」
圖片來源：小紅書、Instagram
港生活人氣本地熱話
全新功能《U GO》強勢登場🎉！
立即探索🔍本地熱門活動📍好去處🔔食買玩情報
↓【招募試食員🐱】送Harlow Blend全新貓糧系列！↓
