中年好聲音2丨譚輝智為仔女做好榜樣追求成就 公開得獎感言：勿讓渺小顧慮成絆腳石
譚輝智由無名素人成為《中年好聲音2》的人氣王，短短兩個月時間舉辦個人演唱會，並推出個人新歌。雖然家族背景富裕，但從來沒有不勞而獲，甚至離開家族生意獨立發展，希望做出成就為一對仔女建立好榜樣。昔日想也不敢想的事就夢幻般一一發生，他首次公開打算奪冠後講的感言，希望鼓勵所有人不要留有遺憾。
譚輝智憶起最初參賽時的心情，仍然留有餘悸，他笑指第一次在舞台上唱歌時，幾乎嚇到瀨尿，整個比賽過程長達8個月時間，他形容絕對是撐過來的。「我真係諗住唱一、兩首歌就算，冇諗過真係玩大咗，比賽中途我都有問屋企人點算好，而家搞到咁？無數次諗過放棄，好驚會出醜。父母其實好早就叫我做歌手，我叫佢哋咪傻啦，做歌手要好靚仔呀，比賽期待佢哋都冇乜點理，我覺得最重要佢哋有得威，最鍾意聽到人哋讚：『你個仔好勁喎！』」
輝智參賽後期被網民起底，揭發他的爸爸是馬主譚握籌，一家人不時出入馬場，更被視為富裕家庭生活無憂，輝智表示：「首先身家唔係真係豐厚，未至於可以亂使錢。我阿爸係唔會畀我哋唔做嘢，反而畀更大壓力，可能囡囡就冇所謂，但對兩個仔就一定要有目標，唔可以等屋企養，一係就幫屋企公司手，一係就自己搵工。畢業之後我出去打工做廣告設計，因為我讀設計系畢業，但阿爸見我真係忙到成一年幾冇機會返屋企食飯，日日都通宵，所以就叫我返公司幫手。」他表示在家族公司差不多八年時間，直至遇到太太，啟發他創業開展美容院生意，自力更生，這個人生轉變全因孩子出世之後，他說：「疫情期間開美容院，真係好困難，但我覺得小朋友出世之後，我訂好目標，希望可以壯大自己，好想有成就畀佢哋睇。」
雖然走出父蔭，但輝智坦言在爸爸身上學到很多生意的事，特別是他的人生態度感染自己最大，「其實我係吸收咗佢性格，先能夠喺呢個《中年好聲音》比賽入面行得咁順，佢性格係凡事唔好太執著，亦盡量唔好麻煩人哋，永遠開心笑住咁面對所有嘢，反而我最終得著到更多。」現時輝智都是一名爸爸，一對仔女分別5歲和4歲，由於年紀太細，所以不太知道爸爸得到亞軍的事，「早幾日出去食飯等枱，有人想同我合照，影完之後，個女問：『點解佢要同爹哋影相嘅？係咪因為爹哋好靚仔？』我唯有答係，佢哋真係唔明點解呀。」他表示入行後，感覺最難交代的子女的學校，事關以後家長日都一定會到，但如今難免擔心學校會介意，填寫的職業與工作不相符，「唔知呀，遲啲先知學校咩反應，好彩我個形象都唔算好差啫？」
輝智坦言這個比賽令他感受很大，決賽當晚有準備過一番說話，留待萬一得到冠軍的時候講，他笑言：「其實我參加比賽，有個訊息帶到出嚟，我自覺係一個成功例子，如果當初冇踏出一步去玩，就呢世都冇可能行而家呢條路，當時將好渺小嘅顧慮諗到好大，成日以為會被人笑，但原來大家都好尊敬、尊重。中年人有咩試咗先，做完如果覺得唔適合，咁咪算囉，冇人會理你失敗。其實唔止唱歌，做任何事都一樣，唔想到老咗先後悔，死嗰日先回望，可能錯過咗好多嘢。」
撰文：楊安莉
攝影：何家賢
港生活人氣本地熱話
【請您去旅行✈️🌎】
↓登記領取HK$1,500 旅遊資助金💰！↓
【社群送禮🌸】送您麒麟一番搾啤酒及「和風櫻花禮品套裝」！
↓簡單一步登記贏禮物！↓
