女團COLLAR成員李芯駖最近推出首支個人單曲《SPYLING》，成為團中第三位單飛成員。透過新歌呼籲大家告別虛假人設，誠實做自己，芯駖笑言入行後反而更能保持真我：「係《全民造星IV》嘅功勞，因為係真人騷，拍攝呢半年，大家（真實性格）都表露無遺，想扮都扮唔到！」
同場加映：父親節快樂｜ 鄭俊弘兒患天使綜合症最享受沖涼 感激囝囝：佢令我學識活在當下
繼邱彥筒（Marf）及陳泳伽（Winka）之後，芯駖正式推出單飛作品《SPYLING》，大曬舞技及性感間諜造型之外，唱腔亦較平日高音，令歌迷甚為驚喜。歌曲講述生活中人人都像間諜，為免被別人看穿心中想法，會刻意掩飾自己，倒不如放低一切人設，誠實地活着，給自己喘息空間。
芯駖自言入行前，曾自我訂下不同人設：「因為我入行前有太多唔同角色（工作），做過跳舞老師、排舞師、道具師、燈光師…對住唔同學生，都有唔同人設，反而入行後統一番（個性）。」因《造星IV》入行，芯駖笑言比賽期間，大家日對夜對，習慣真性情面對鏡頭：「反而入行後有段時間曾經收埋自己，因為擔心自己做得唔好，好緊張、唔適應；依家累積咗唔同經驗，又做完COLLAR演唱會，人都放鬆番啲。」世代不同，明星不再是遙不可及。「依家網絡好透明，大家距離好近，喺社交網好多互動，成日分享日常諗法、生活狀況等等。有啲嘢偽裝唔到，如果要扮柔弱人設，成日扮受害者，但真實嘅我好tough，咁樣會被人睇得出。做番自己，大家其實唔會介意，反而粉絲會更加支持。」
芯駖給人堅強的感覺，她自言並非因不想表露脆弱一面而故作堅強，而是她的性格本是如此。曾有不愉快童年的她，從小練成硬淨個性：「呢個係真實嘅我，我習慣頂硬上，習慣好多嘢自己處理，仲要照顧媽咪呢，所以唔可以冧。我慣咗報喜不報憂，就算對住相識多年嘅朋友，我都會自己哽咗先，搞掂先再同佢哋分享，等佢哋唔使擔心。」
舞蹈員出身的芯駖，一直苦練唱功，到後來越見進步，她獻唱已故天后梅艷芳歌曲《似水流年》收獲不少讚賞，到了《SPYLING》更挑戰較高音的唱法，她笑說：「監製想我用另一把聲配落首歌，聽出嚟又幾特別，不過歌詞好密，錄音嗰陣有少少哽親！」她在唱歌方面下了不少苦功，「每日幾忙都好，都會練唱歌，同埋跟唔同唱歌老師去學。之前演唱會每個人都有solo，真係每日好努力練，靠肌肉記憶，唱到把聲拆咗，好返又再練過，練成一把比較穩定嘅聲。跟唔同朋友合作都學到好多嘢，例如之前同Angela（許靖韻）合作，發現原來一句歌詞可以咁表達，可以咁溫婉好聽。」
提到希望合作的歌手，芯駖興奮說：「我好鍾意Gareth T.（湯令山），佢啲歌好入腦，會成日記住，係好真實嘅texture（質感）。希望有幸合作嘅前輩歌手有好多，雖然知道自己冇乜可能，例如Eason（陳奕迅）、偶像林憶蓮、王菲、Sammi（鄭秀文）等等。」
擁有自己的單飛歌曲，代表演藝夢想再踏前一步，但芯駖暫未想過擁有自己的solo演唱會：「好遙遠，自己覺得以團（COLLAR）行先！因為我哋由女團開始，大家風格唔同，冇重疊，擺埋一齊好多元化、好好睇，7個人代表女性大部分面向，結合埋一齊，係一個好大嘅能量球！將來solo開騷與否，我想等個團發展好穩定先，或者團嘅作品出夠先！」團魂超強的芯駖想為COLLAR貢獻更多，希望COLLAR在廣東歌樂壇站穩一席位：「希望我哋個團被看見，其實廣東話歌都有好多快歌，都有女團可以睇下！」
撰文：李潔盈
攝影：何家賢
場地：No.5 Studio
髮型：Ricky Lam
化妝：Cathy Zhang
造型：Daniel Cheung
服飾：Helmut Lang from Lane Crawford, Isabel Marant, APM Monaco（首飾）
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】卡樂B粟一燒熱浪香辣味！↓
↓ 粟一燒結合熱浪，香辣惹味！↓
↓【限時搶⚡】卡樂B Jagabee茄汁味波浪薯條！↓
↓ 酸酸甜甜，香脆可口！↓
