巴黎時裝周丨黃偉文爭輸埋單後輩出大絕請客 與盧瀚霆AL擺難頂甫士「偏好」與姜濤合照

Wyman 一早身在巴黎，佢同姜濤同Anson Lo一早已經約見面食飯，大家忙搞到反覆取消，幸好最後緣份都令佢哋可以食得成：「上次3月倫敦茶聚已經開始夾時間6月巴黎食飯。結果又食到又食唔到又食到又食唔到反覆咗幾次，本身已經放棄咗，終於喺兩日前又突然「撈」得返（海底撈月個撈唔係𢱑撈個撈），大家犧牲瞓覺時間喺 Paris 10點先開飯食到過咗半夜⋯⋯」

一向好提攜後輩嘅Wyman 諗住一盡「地主之誼」請客，不過估唔到都上演中國人經常出現嘅戲碼「爭埋單」，始料未及嘅Wyman仲畀兩位後輩「出大絕」爭輸咗：「唯一尷尬位係，我負責 book 餐廳諗住請客，所以點菜時懶豪亂叫一通叫到成枱都係希望唔好待慢啲客人，結果臨尾畀人偷偷埋咗張單。下次無論喺地球上邊度偶遇，求吓你哋畀我請，好唔慣唔係有大食大，畀年紀細過我嘅人請我食飯。🙏🏻不過，呢餐係開心嘅。」而預先埋單呢招都認真貼心，大家唔使喺侍應生面前爭來爭去！

+10

+9

點擊圖片放大

見到Wyman repost嘅合照都知佢哋真係好開心，佢先係repost同AL嘅合照，留言：「被要求做一個我平時點都唔肯做嘅動作，所以要REPOST紀念一下。」相中嘅佢同AL都喺面側用手做出半個心形嘅動作，兩個仲嘟起嘴仔，非常Kawaii；而Wyman repost同姜濤合照就相對「順攤」，留言：「唔知點解，我比較接受到咁樣單手畀心，幾廿歲人仲用面珠，我真係唔係幾頂得順，哈哈哈哈……」相中Wyman就淨係用姆指同食指比出小心，相對低調！

圖片來源：Instagram