41歲梁靖琪罕有重提第一段婚姻失敗經歷 離婚後數年再婚否認奉子成婚

文: 羅志宏
2024.06.24

現年41歲的女藝人梁靖琪(Toby),近日憑熱播劇《家族榮耀之繼承者》演富家女Nana,獲網民一致讚賞而人氣急升,日前她接受電台節目《星光背後》專訪,剖白入行二十年的高低起伏,由女團成員,到歌手,到藝人,到三度轉行發展,以及經歷首段婚姻失敗,她亦剖白被現任丈夫追求時,亦汲取了之前過於衝動的教訓。

節目中,梁靖琪剖白無論當年以四人女子組合「女生宿舍」加入樂壇,又或是06年轉投TVB拍劇,由於父母梁家樹及蕭笑鳴當年均是電視台高層,她一直被標籤靠父蔭飽受網絡欺凌。今天已為兩子之母的Toby哽咽感動首獲觀眾及父親的認同外,亦披露父母當年曾要求她轉行的原因。

梁靖琪坦言20年來面對負評居多,甚少受到稱讚,今次演Nana令她首獲觀眾認同外,更讓她哽咽的是,她於演員生涯中首次得到爸爸梁家樹認同,「我本來唔敢接呢個唔討好嘅角色,我本身形象已經唔討好,好驚畀人鬧!其實今次新劇出街頭嗰幾星期迴響都好差,因為觀眾未睇到角色變化同層次,所以直到重頭戲播之前,我都無上網睇評論,始終我而家做媽咪,唔想帶著負能量照顧小朋友。最後係爸爸第一個send有人讚我嘅評論畀我睇,仲加左『叻叻』手勢emoji,係人生一次,收到時好感動,諗起都想喊。」

談及當年不理父母勸阻入行,梁靖琪指父母早已告知她會因其背景面對不少壓力,至於「女生宿舍」兩年便解散,梁靖琪直認:「出咗一隻碟,銷量反應梗唔好!好難生存。」但她勢估不到2006年進入電視台拍劇,面對是非及難關更多,「 一開始是非比當歌手時更多,因為性格問題,現在已經改咗好多㗎喇。我喺外國長大,同人打招呼會講『yo』『hey』,當時唔知太friendly原來會令人唔舒服。」

及至2016年沒再為TVB拍劇,梁靖琪曾任健身教練、婚禮統籌及開設公關公司,曾三度轉行發展,她坦言是為生活,但某程度上也因為聽從父母的意見需另尋找別的發展,「之前拍劇拍到中段,畀人鬧到鬧埋父母,係好唔開心,覺得為乜呢?而家我有仔女就明白,最辛苦就係父母,點會有父母想聽到人地長期奚落自己啲仔女?如果有人長期奚落我兩個仔,我會好唔開心囉!所以我終於明白到點解佢哋中間叫我放棄拍劇,佢哋話:『你唔好做啦!搵過第二份工啦!點解你仲唔肯放手呢?』做極都唔討好,事實係當年我未拿捏到,根本無觀眾緣,咁咪從中去開婚紗公司,又試下搞飲食。」

至於近年又重投幕前拍劇?梁靖琪說:「好鍾意吖嘛,到呢刻我都好鍾意!真係我夢想,而家我終於同阿仔講,媽咪無放棄過自己夢想,如果你有夢想,都唔好輕易放棄。」

除了演戲滿途荊棘,梁靖琪亦經歷過兩段婚姻,重提首段婚姻失敗,梁靖琪說:「當時我太心急,我哋唔夠瞭解對方,之後先知大家要嘅嘢好唔一致,所以好快分開。」離婚後數年,Toby透過朋友認識現任丈夫Jonathan,「係朋友介紹,第一眼就覺佢好靚仔。剛認識嗰陣,我搞緊一個慈善event,佢連續5日都嚟探我,兩個人坐係沙灘傾計飲咖啡,之後慢慢約會發現好夾,就一齊咗。」

梁靖琪續稱:「今次係明顯唔再咁急,人要長大,其實我同佢好多嘢好夾,大家都鍾意動物、做運動,亦因為佢,令我信返主。」兩人拍拖兩年於2019年結婚,同年梁靖琪懷孕,但她否認是奉子成婚,「其實老公話有小朋友之前已經想求婚,只係先後次序唔同咗。」

 

同場加映:【衝出嚟玩】最新影片

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【全城招募120隻毛孩】試用腳掌潔護SPA泡泡!↓

↓登記攞禮物番屋企↓

↓登記攞禮物番屋企↓

↓【夏日送禮】送麒麟一番搾啤酒及夏日和風禮品套裝!↓

↓登記即有機會攞禮物番屋企↓

↓登記即有機會攞禮物番屋企↓