女神收割機丨羅天宇中途轉基殺出新血路 與張景淳「大叔的愛」BL小劇場衝出國際

片中羅天宇同張景淳以及李興華一同喺佢哋經營嘅小食店入面工作，一開頭天宇捧住托盤出餐，李興華就「no look開」為天宇打開小門，天宇感受到對方嘅小心思，就含羞甜笑。之後天宇又兩手拎住吉嘅水壺，張景淳就預先幫佢開水喉，天宇又再含羞笑。最後三人一同出現，天宇準備執貨，張景淳就預先幫佢打開櫃門，天宇踎低之後，李興華就人手幫佢擋住櫃頂，以防佢頂到，天宇被兩男嘅愛包圍，再次甜甜的。

片段分享咗唔夠一個星期，竟然累積咗25,370,000次觀看次數、1,830,000個讚好、16,000個留言以及336,000次轉發，非常誇張！而最勁嘅係觀眾們有唔少都係來自海外，衝出國際，當中留言有西班牙文、泰文、印尼文以及英文等；天宇更加係男女通殺，有唔少男士都留言大讚佢靚仔：「呢個酒凹，我可以為佢打劫銀行。」、「呢啲係咪叫『美麗特權』？」、「見到呢個笑容邊個唔會為佢……」都有唔少鍾意睇BL嘅女士留言：「我睇到『姨母笑』。」、「睇到我又笑又面紅。」

+22

+21

點擊圖片放大

本網訪問羅天宇，天宇表示拍呢啲片段都係為咗佢哋盤生意搞下宣傳，想多啲人識，冇估到會咁爆，完全係無心插柳：「好誇張爆咗2500萬個VIEWS，完全仲唔到，拍嗰陣都覺得唔係最好笑，有諗過唔出，但估唔到反應咁好，去到外國啲人都好鍾意。」提到短片帶挈佢人氣急升，男男情節有冇令佢男Fans急增，佢就表示：「都多咗過萬人（followers），不過唔知男定女。」天宇提到提到自己拍片嘅初心都係為咗娛樂大家，所以反應咁好佢都好開心：「自從《婚後事》同《再見枕邊人》拍咗啲搞笑片之後，好鍾意引到人笑嘅感覺，其實拍劇都係，作為演員想拍多啲唔同嘅人生畀觀眾感受，陪我一齊經歷，係娛樂嘅一種。」

羅天宇2008年參選香港先生入行，曾經認愛過三個女友，當中包括林芊妤、苟芸慧同湯洛雯，而同佢傳過拍拖嘅女神就有蔣家旻、陳曉華、何依婷、陳瀅同戴祖儀等，仲有依家嘅緋聞女友「東張女神」陳㦤德，個個都樣靚身材正！天宇入行多年都非常「直」，更被封為「女神收割機」，估唔到今次打開呢個新市場，分分鐘可以做埋「男神收割機」！

至於張景淳，對於片段的驚人點擊，他表示：「有啲嚇親，一開始唔知會咁多，頭一日見無端端去到80萬就覺得條片都幾受歡迎噃，諗緊有100萬呢有就好喇。點知突然變咗viral，ig將佢送埋去東南亞同歐美地區，幾日內推到2000幾萬。覺得好幸運可以成功做到宣傳。（有冇多咗男粉絲？）係多咗啲男fans，多咗啲外國人。可能故事呈現反差感比較強，一般係女仔先會咁溫柔對同性，但男仔對男仔就比較少。加上Joey笑得夠sweet，好有想像空間。之後都係會參考下網上其他Viral片點拍，從中偷下師學習下，主要都係希望睇得開心，又低調地帶出我的個雞蛋仔Brand。」

圖片來源：Instagram