中年好聲音2丨黃劍文笑罵由人靠堅持換來機會 坎坷過去拒賣慘望正能量感染粉絲

文: 余美鳳
2024.07.09

黃劍文有份參與的音樂劇《為你鍾情》將於下月公演,接洽音樂劇的時候是兩年前,如今由獨立歌手身分轉眼間變成《中年好聲音2》第四名,人氣與知名度都大大提升。排練過程中,劍文對張國榮的仰慕有增無減,特別是學習對方「我就是我」的態度,不要理會別人七嘴八舌的意見和批評,做自己喜歡的事,所以就算心怕遭嘲笑,也決定勇敢追夢參加比賽。

黃劍文今次參與的音樂劇《為你鍾情》,他直言期待足足兩年時間,面對這位巨星張國榮,起初難免有壓力,「就算自己唔比較,人哋都會比較,但劇本主要內容係講述一班張國榮歌迷向佢致敬嘅故事,會演繹好多張國榮嘅歌曲。其實無論佢嘅電影同歌曲,都影響我好大、啟發我好多。作為一個藝人,好多人會畀意見你,唱歌、演戲、甚至出活動嘅造型同髮型,好多人討論,但世界上得一個你,應該要堅持做一個獨特嘅自己。」

的確,在娛樂圈跟風容易,堅持自己很難,劍文坦言就算熱愛舞台,再次參加公開歌唱比賽都收到一定的批評,「以前啲電視台放棄你就知咩事啦!」、「要紅就一早紅咗啦」都是參賽後收到的網友評語。的確不少觀眾認為曾出道的歌手參賽對素人不公平,劍文說:「參加比賽前都諗好多,雖然做獨立歌手三年,開心係做到自己想做嘅事,但做咗好多嘢都好似冇乜成效咁。見到《中年好聲音》比賽完有幾好發展,好似係一個幾好嘅平台,就覺得不如試多一次啦!好多人執著係咪素人或白紙參賽,我的確入過行幾年,但幾年來都冇太多機會或嘗試,同一張白紙其實冇分別,反而比賽入面從新學習。其實有啲《中1》被淘汰嘅人再參加《中2》都被人鬧,但佢心態好好,考試考唔好咪再考囉,你考車牌都未必一次過得啦,只係冇人知之嘛,公開做過歌手點解就唔可以再爭取機會去發光呢?以往不被看見,唔代表另一個平台唔得。所以我特別喜歡陳蕾的歌曲《凡星》,歌詞提到:『誰都可發光,只要找對地方』。」

 

 

劍文過往擁有一段不平凡的成長故事,小時候母親改嫁要跟隨後父生活,在親戚面前只准叫媽媽做阿姨,他同後父關係麻麻。26歲那年更發生噩耗,母親選擇以燒炭結束生命,令黃劍文墜進人生谷底,幾乎從26樓的露台跳下去,幸好最終懸崖勒馬放棄做傻事的念頭。在《中年好聲音2》有不少動人故事,但劍文拒絕「賣慘」,他說:「出過道、做過好多訪問,要知我背景相信大家都知,唔使再講我身世,節目組有問家庭背景,但我選擇笑住去講、笑住去面對,的確擁有好痛苦嘅過去,但抱咩心態去面對先最重要,我希望帶正能量畀大家而唔係賣慘,我需要得到大家認同而唔係同情的身世。」

劍文的人氣有增無減,他感恩比賽為他帶來不少支持者,粉絲「Kimchi Family」由最初一百多日激增至六百多,有粉絲會一口氣買下八場音樂劇的門票,亦有人會冒雨守候他,「我感受到好多愛同支持,粉絲們對我嚟講係好大能量,畀我繼續走落去,我真係好幸福!」

 

 

採訪:楊安莉
攝影:何家賢

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【限時搶⚡】請您食卡樂B Potaland® 酸忌廉洋蔥味薯片!↓

↓ 濃郁開胃的酸忌廉味 + 香氣四溢的洋蔥味!↓

↓ 濃郁開胃的酸忌廉味 + 香氣四溢的洋蔥味!↓

【請您試用】韓國夏日防曬套裝☀️!

↓ 一次試勻4款防曬好物↓

↓ 一次試勻4款防曬好物↓