現年49歲嘅男神吳彥祖5月時進駐抖音，同內地網民分享生活小碎片，不過仍不忘佢荷里活嘅演藝事業，日前佢就喺美國拍戲，仲喺抖音分享佢當日嘅伙食，睇到都覺得唔多開胃呀！
男神吳彥祖於美國拍攝新片《With Love》，仲喺抖音分享片場伙食，片段中吳彥祖去飯堂拎食物，阿姐先係幫佢𢳂飯，之後就畀啲肉丸佢，然後就打開一盤深啡色嘅不明汁液。之後佢都忍唔住問阿姐有冇蔬菜，阿姐就搖頭。之後吳彥祖就解釋，因為佢遲咗去飯堂，所以冇咩食物剩，佢打開飯盒，裏面就得兩粒肉丸以及一啲汁同白飯，佢都苦笑咗出嚟，頹到爆之餘仲冇咩營養，真係塞飽個肚都偷笑！
唔少網民都留言表示拍戲伙食好得多了，又有人心痛佢冇啖好食，想幫佢加餸！又有人將焦點放喺佢唔知用咩嚟拍呢條短片，因為全程都唔見佢用電話或者攝影機，有人就估計佢係用類似google glass嘅智能眼鏡嚟拍片，好緊貼科技潮流！
吳彥祖近年主力喺美國發展，而依家正係拍攝嘅《With Love》再次同關繼威合作，相信係一部係動作片，事關片商Universal 搵咗另一廠牌87North合作，而近年87North近年拍咗好幾套口碑唔錯嘅動作片，包括暴力版聖誕老人電影《殺神夜》，同埋《特技狂人》；就連導演人選都係動作指導出身嘅Jonathan Eusebio，而關繼威都曾經做過動作指導！
吳彥祖雖然喺外國長大，但就有一個中國胃，上月佢去到中國時挑戰當地激臭螺絲粉，雖然佢助手臭到彈開，但佢就食得津津有味。吳彥祖一邊拍片一邊狂食，不過最後都係辣到濁親，唔少網民都覺得佢好貼地，明星都係自己食一樣嘅嘢；又有網民解釋廣西正宗嘅螺絲粉其實並唔臭，不停推薦佢試真中國滋味！
圖片來源：抖音
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】勁送小牧味屋高鈣梳打餅套裝！↓
↓ 一套6包：芥末味 / 蕃茄味 / 黑芝麻味！↓
【請您去】海洋公園水上樂園💦！
↓ 立即登記 送雙人門票↓
