金式森林丨江嘉敏對羅子溢春心盪漾 含春喪笑嗌怕醜《東張》主持打圓場

鄧凱文原本同羅子溢、何依婷以及何廣沛做訪問，之後就代江嘉敏向羅子溢示愛：「其實佢（江嘉敏）同我哋講咗個秘密，佢話唔同你講得嘅，佢話好開心可以同你合作，佢甜絲絲咁講。」羅子溢靜一靜，表示：「但我平時同佢對戲我feel唔到。」講完之後大家都大笑。

鏡頭一轉，發福江嘉敏行入鏡頭與羅子溢一同受訪：「早知唔亂講嘢啦！」之後不停尖聲喪笑，完全收唔到掣。鄧凱文問：「佢（羅子溢）話feel唔到你甜絲絲呀，解釋下先。」何依婷同何廣沛似乎就已經去到鏡頭外食花生，羅子溢話：「你睇幾多人望住我哋。」鄧凱文追問：「究竟係咪呀？」羅子溢就話：「有啲面紅喎。」江嘉敏繼續以高分貝笑聲回應，仲笑到攣埋，話自己怕醜。鄧凱文就話江嘉敏隱藏得好深，而子溢就踢爆江嘉敏平時都唔係咁，追問：「你第一套劇係睇我咩劇？搞到我好似好老咁。」江嘉敏狂笑：「我哋唔好講啲咁嘅嘢，我好尷尬依家。」鄧凱文就表示：「《東張西望》畀你表達你愛意，依家佢就喺你身邊。」江嘉敏仍然咩都唔答，大笑：「好尷尬，唔好望住我，好怕醜依家。」搞到企隔籬嘅子溢都有啲尷。

+29

+28

點擊圖片放大

之後鄧凱文打圓場，話幫二人合照留念，羅子溢就話：「嘉敏好畀面我。」仲大方擺搞笑pose捉住江嘉敏影相，江嘉敏就keep住喪笑嗌怕醜，真係耳膜都畀佢笑穿。江嘉敏就話早知唔同大家講佢傾慕子溢呢個秘密，鄧凱文就話：「我哋《東張西望》嚟，係冇秘密嘅！」

江嘉敏出道多年，曾有不少負面新聞，除了拍劇時與對手傳緋聞之外，又曾被爆識富二代，之前更有傳與佢同劇又有女友嘅男拍檔都避開佢。不過曾經同佢有對手戲嘅謝東閔，就為佢澄清，笑言當佢係男人，一啲都唔覺得佢姣，「完全get唔到」咁話。

圖片來源：Instagram