直播靈接觸丨雨夜屠夫林過雲服刑期間雨天必有異樣？ 監獄冤氣重懲教職員信邪跟規矩
由梁思浩、黃紫恩（Jojo）及黃耀英主持、TVB Plus（82 台）開台重頭戲及首個靈異直播一小時節目《直播靈接觸》，昨晚（16 日）播出一集主題是「監獄靈異實錄」，請來「警界天師」簡信回師傅及更生人士家榮現身說法。
「警界天師」簡信回師傅在節目中提到監獄惹鬼的原因，同所處環境有關係， 他說︰「監獄一般都遠離市區人煙少，地方又唔會太光，而且重犯多，多冤魂纏身。」另外，今集嘉賓家榮為一名更生人士，親述當年靈異經歷，佢透露有次身處單人倉，平時有聽電台鬼古習慣，事發當日如常瞓地上戙高一隻腳聽節目，佢表示︰「聽聽下忽然戙高嗰隻腳被人拉直，即刻醒一醒，以為錯覺，當晚冇事發生。到第二晚又被嘢掹，嚇到彈醒今次見到有黑影捉住我隻腳，突然倉入面響鐘。職員嚟到問我咩事撳鐘，但我當時冇撳鐘，而倉入面又得我一個。」
事後家榮得悉所住的倉剛有囚友離世，相信與此有關，事後申請轉倉：「我哋都會直接同佢哋講，因為好多職員都遇過，都會酌情處理，調一啲唔知有嘢嘅人入去（鬧鬼監倉）。」家榮指如果倉中有犯人去世，其他人就會以煙代香上畀離世人士，同時會攞碟飯同攞啲生果；簡師傅就話有懲教署職員會先封倉，再拎死者 file，於倉內宣讀「你可以出冊喇」，希望死者得到解脫，不會留在監獄內：「懲教署職員會揸住把遮，送埋佢（死者）出去」。
家榮又提到，監獄內一啲重犯，不時都會被其他人見到有鬼「纏身」：「嗰個人（重犯）見唔到，身邊啲人會見到佢（被）纏住，可能職員同其他犯見到，喺倉出面徘徊。」思浩即時問簡信回師傅，點解會出現犯人本身見唔到鬼嘅情形，師傅就表示：「佢人都唔驚，點會驚鬼？我哋叫呢啲『戾氣』，佢完全唔會諗（見鬼），你見到係因為你放大咗，容易同佢溝通。打個譬如，唔帶電話，咁你打電話點會搵到我？」師傅指鬼魂纏身目的最後或為報仇，但人鬼殊途，可以做嘅都唔多：「最終目的，係最想入佢個身，擾亂佢（加害者）精神。」
節目中，又致電一位前懲教職員，對方曾見過大賊葉繼歡以及雨夜屠夫林過雲。思浩開門見山問：「林過雲監獄內靈異傳聞，係真定假？聽聞佢一到落雨就會不停自言自語，同人講對唔住？」電話中前懲教職員就表示：「對唔住就冇嘅，但會不停行嚟行去、騰來騰去，平時佢個人好文靜，雨天就焦躁不安。」思浩又問到葉繼歡於監獄內被孕婦靈魂纏身是否屬實，前懲教職員就表示佢同葉繼歡接觸時間唔多，自己就冇見過。」
簡信回師傅又分享一名國內更生人士搵佢求助，對方曾入臨時收容所，出到嚟每一日都被靈體騷擾，監房室友︰「佢每日都被鬼騷擾，發覺原來係同倉室友，想搵佢申冤，話自己唔係意外死，而係被人係監倉打死。」簡師傅表示最後該名更生人士為對方報警處理，事件新聞亦有報道。
港生活人氣本地熱話
【請您睇戲】投選您心目中的金像獎影帝影后🫅🏻👸🏻
↓立即投票贏禮物！↓
【旅途無蝨】請您用AQUA PRO+TECH「驅蚊大師」滅菌驅蚊液 ！
