黃浩然鋼條身形消失變凸腩廢中 日日攤屍食5餐犧牲肌肉增肥廿磅

黃浩然日前以fit身剪裁嘅格仔恤衫西褲look現身， 入行多年出名有鋼條身形弗到爆，但呢日竟然凸出肚腩，非常違和。黄浩然接受訪問時提到自己係為咗演活新劇「凸腩廢中」角色刻意增肥：「周家怡以為（肚腩）係假嘅。」周家怡即時伸手摸奏呢個少見嘅肚腩表示：「我發覺由六舊腹肌增到有肚腩，嗰個肚腩係硬嘅，增肥咗8至10KG左右。」

黃浩然繼續指自己都冇試過有腩，又話佢用咗接近兩個月的時間增肥，而一向有運動習慣嘅佢就因為咁而要暫停，非常煎熬：「唔敢運動，我淨係可以做一個廢柴食嘢瞓覺。」而佢更加要刻意加大食量：「都食5餐㗎！尋晚收工我都走咗去銅鑼灣食北菇雞飯加蝦餃。」周家怡就嘆息表示自己要keep fit。提到黄浩然第一次接拍ViuTV劇集，有否請教已經拍咗多套ViuTV劇嘅周家怡，佢即刻抽水：「家怡姐盡量會自己過啲料過嚟，我喺呢邊係新人嚟嘅。」周家怡就表示過去曾經於TVB與黄浩然合作，而且係演情侶，今次終於可以「結婚」，不過就冇親熱戲份。

+25

+24

點擊圖片放大

現年48歲嘅黃浩然中學畢業後放暑假期間做雜誌模特兒，並獲導演杜琪峯發掘，開始演員之路。拍攝第一部作品《十萬火急》，同場還有劉青雲和方中信等，已經係做型爆消防員。後來他擔任全職電影演員，於《新紮師妹》中劍雄嘅角色都有大騷身形，非常突出。2001年黃浩然加入亞洲電視拍劇，05年擔正演出《情陷夜中環》的第一男主角兼大反派，成為亞視一哥。2006年與視后田蕊妮轉投無綫電視，有觀眾緣嘅佢非常多產，2010年後幾乎每套電視劇都擔正第一男主角，佢嘅鋼條身形都成為賣點，幾乎每套劇都有機會畀佢騷肌，而觀眾都好受落。

黃浩然曾為無綫電視監製梁材遠及陳耀全的常用演員，也是TVB基本合約藝人（部頭約），2019年宣佈與中國星約滿，轉投古天樂旗下之天高娛樂。2021年6月離開無綫，《法證先鋒IV》為其告別作。