伍家謙大爆奧運訪問潛規則！電視台為搶獨家專訪會咁做...仲會出動美人計？

2024巴黎奧運丨港媒採訪方式引起網民關注...

相信大家都有留意到今屆巴黎奧運，香港運動員賽事完結後都會先完成TVB專訪，然後才到HOY TV、有線新聞、ViuTV、NOW TV、香港電台等電視台進行圍訪。今屆奧運中更發生小插曲，有「微笑劍后」之稱的香港劍擊運動員江旻憓（Vivian）在女子重劍個人賽中奪得金牌，賽事完結後接受傳媒圍訪時，HOY TV遞耳機讓江旻憓與在香港錄影廠的李麗珊及張小倫進行對話，因此引來ViuTV主持不滿以及網民批評，另一方面，事件引發網上討論為何TVB總是可以做獨家專訪？

點擊圖片放大

只有TVB可以做獨家專訪？網民猜測原因係呢樣...

前TVB新聞部體育組首席記者伍家謙，日前（29日）就在個人社交平台上發文，表示看到網上有人問「點解有啲台可以做獨家訪問先？」眾人紛紛猜測箇中因由，例如「係咪夾硬夾走個運動員呀」、「係咪個受訪者自己揀呀」、「係咪有指定要答邊個先呀」。伍家謙直言與其大家估估下，倒不如分享自己現場採訪過兩屆奧運的經驗、其採訪規矩。

點擊圖片放大

伍家謙發長文解釋：奧運採訪「有規有矩，不得亂來」

伍家謙在文中提到，指奧運採訪一向有很多規矩，他直言「有規有矩，不得亂來」，例如「邊度可以拍片」、「邊度可以影相」、「邊度做得訪問」，總而言之，合法訪問區域都會寫得清清楚楚，如果在不適合地方進行採訪拍攝，分分鐘被國際奧委會起訴，「輕則口頭警告，重則取消成屆嘅採訪資格（真係發生過）」。

而且採訪規矩亦非常複雜，簡單來說，每個比賽場館裡只有一個合法訪問區域（即是 混合採訪區mixed zone），所有完成比賽的運動員都必需經過這個區域後，才能回到後台更衣室，但是否接受訪問的選擇權就落在運動員手上，「試想像下，超級體壇巨星，全世界記者都想問；如果個個都答，佢可能行一世都未走得出個mixed zone，膀胱爆埋都未返到去驗尿做藥檢，所以，佢哋多數會選擇答頭幾個、有啲見到相熟/嚟自自己地方嘅記者就停低、有啲做完一定要做嘅訪問(下文會講)就直行直過。」

點擊圖片放大

伍家謙大爆奧運採訪潛規則：畀錢最簡單直接

在這個前提下「排得越前當然越著數」，伍家謙卻透露，要注意的是排第一的一定是國際奧委會的頻道，而且規定了運動員一定要回答，而排第二的就是主辦城市的國家官方電視台（例如倫敦奧運是BBC，北京奧運就是中央台），至於之後的排位就開放自由競逐，而競逐方法有兩種，分別是「畀錢」和「鬥早」。

點擊圖片放大

伍家謙指出，「畀錢最簡單直接，只要肯科水畀國際奧委會，個位幾靚都有。入面光纖電掣乜都齊，而且只有你一間專享，其他人想入都唔入得；服務同價錢成正比，所以有意買位嘅電視台會係事前plan定，邊個場館最有機會攞獎，邊個運動員一定要問到唔可以甩，先至決定畀錢買嗰個場館入面嘅mixed zone位。」

+3

+2

點擊圖片放大

至於預算較少或是「肯畀錢」但抽不到名額的電視台，就只能夠早點入場，希望可以排到較前的採訪位置，「嗰啲位一定會排喺畀咗錢嘅人後面，都真係幾後下；又因為嗰度所有記者都入得，亂起上嚟係會同打仗一樣，迫到飛起。其實行到嚟到呢度嗰陣，個運動員可能已經答咗同樣嘅問題幾十次，一般好少停低。」

點擊圖片放大

有傳媒為採訪甚至出動美人計？

但伍家謙也補充道，幸好香港運動員很多都非常好，見到香港記者幾乎一定會回答問題。同時他也在留言中分享他看到的一個奧運採訪花絮，表示有些傳媒為了採訪運動員真的是無所不用其極，「我見過有間南美嘅電視台，日日都搵個成個Model咁嘅靚女企喺採訪區，佢啲衫基本上可以唔遮嘅地方都冇遮，結果真係做到好多訪問。」

▼原帖文▼

點擊圖片放大

TVB財政赤字仍「揼本」撐奧運獲網民大讚

帖文一出，短短一日已獲過千網民讚好，不少人紛紛留言感謝伍家謙的詳盡解釋，「謝謝解答所有人嘅疑問」、「多謝分享，令我長知識」。亦有網民指出，TVB自2018年起連續6年虧損，財政赤字，沒想到仍然「揼本」參與這項體育盛事中，值得被尊重，「TVB係最肯比錢嗰個，今次真係威返次」、「業績見紅都咁肯揼錢，其他嗰兩間真係要學下嘢」。

▼按圖看網民留言▼

+11

+10

點擊圖片放大

來源：Facebook@伍家謙、TVB