香港羽毛球混雙組合「鄧謝配」最後一屆拍檔出戰奧運，惜八強止步，謝影雪和鄧俊文賽後哭成淚人，負傷參賽的謝影雪今日（2日）撰千字長文總結今次巴奧之旅，憶述近半年最少三歷大病傷，先是1月時膝頭劇烈腫痛，抽出幾樽水，至6月兩膝突劇痛，確診類風濕關節炎，至復操後再遇膊頭第8次甩骹，她形容當時已崩潰，但為備戰奧運隔日已再落場練波，儘管今屆成績比不上上屆，她對於能第四次站上奧運舞台已很感恩，亦對今屆發揮更滿意，「好多謝我自己堅持咗咁耐，我覺得呢啲事比以前既謝影雪遇到，可能已經一早放棄咗，我都要好多謝我嘅身體，多謝你18年來比我用到五勞七傷！」
謝影雪長文憶賽前3歷大傷病
謝影雪今日（2日）在Instagram發長文總結今次巴黎奧運之旅：
「我嘅巴黎奧運完成喇！終於等到完嘅一刻，呢兩日心入面都有好多感受，但完成呢一刻，我好想將第一個分享留比我自己，我想多謝我自己。
可能我平時都不時會多謝身邊嘅團隊，但原來成日漏了多謝自己。今次好感恩第四次企上奧運舞台，由爭取奧運積分到真係完成嘅過程，已經唔識可以點形容。以前後生打波，咩傷都無嘅時候，覺得所有事都好易，條路好簡單、好易行；之後到今次奧運爭分前，我同俊文嘅狀態已經差到好似唔識打波一樣，當時幾乎無信心可以去到奧運，之後爭分初段雖然成績一直低沉，但後半年好彩突然回復狀態，更加可以打到年終賽。
不過，我永遠都估計唔到傷患幾時會嚟搵我。今年1月開季時喺印度拉親之後，好返之後就想打支針令膝頭無咁痛，但打完之後突然出現藥物敏感，有日瞓醒兩個膝頭腫痛到瞓覺時無法轉身，連去洗手間都要扶住，令好簡單嘅日常事都無法做到。年初二當日行去醫院搵容醫生條路時好似行咗好耐好耐，最後要坐上輪椅，兩日喺兩個膝頭抽出幾樽水。好返之後以為應該可以好順利行落去，但到6月有一日起身，梳頭時發現兩個手肘痛到舉唔高，初時以為自己受傷，但第2日出發亞洲三站賽事，所以只可以食住止痛藥出發。喺呢三站期間，上網不停搵相關資料，因為每次過幾天，就會有多一個關節出現腫痛，到最後番到香港時，手指痛到握唔到球拍，練波都練唔到，好幾次練到一半瞓喺球場度忍唔住喊，做GYM時因為伸唔直雙手，所以要調較到唔痛嘅角度去做，然後一邊做一邊喊。
最後經過8次MRI，同埋無數次超聲波及抽血，確診類風濕關節炎。上網搵資料時自己有一刻諗過，確診一刻雖未有晴天霹靂，但心入面都沉咗一下，但當時因為距離奧運只有唔夠一個月，我只係好想快啲有藥食，快啲將痛㩒住，可以令我正常練波。食藥後終於將痛減少，可以練波時真係覺得好開心，但之後好似壞嘅事會接二連三出現，一日後膊頭第8次甩骹，嗰一刻好崩潰，好好彩容醫生雖然忙梗都即刻飛去醫院。好記得麻醉藥後，我問容醫生我仲去唔去到奧運，之後佢好有信心同我講無問題！令我本身由好崩潰變得安心落嚟。然後再超MRI，好彩情況唔算好差，第2日已經可以帶住手托去做物理治療、恢復及力量。記得隔2日授旗禮我都唔敢去，唔想人人準備十足迎接奧運時，我就托住手去影響大家士氣。仍然覺得好好彩，幾日後已經開始落球場，做簡單訓練，但心入面其實仲好驚同好有陰影，以前甩骹會休息2星期先練，練到好有信心先落場，今次只係2日已經落場，可能係奧運令我勇氣大咗，每日都鼓起勇氣去試唔同動作，因為望住俊文自己練，我都好想快啲跟上佢嘅進度。身邊有人笑話：呢啲故事令你運動生涯更精彩，但我真係唔需要好精彩，因為咁多年咁多高高低低，我只係想今次奧運打出自己最好嘅狀態，有時會唔明白，點解好似好多事去阻止我去巴黎一樣。
對於今次巴黎奧運，我心入面好矛盾，等左好耐最後一屆奧運，一方面我好想去享受，一方面又好想奧運快啲完，因為好期待整個人可以放鬆落黎嘅一刻。呢三年我覺得整個人已經谷到我自己嘅極限，但呢一刻我係好開心我可以做到自己目標，可能大家都講想我哋拎牌時，我自己就好想去享受呢個舞台，今次我覺得自己真係做到喇！比起上一次，我更發揮到自己嘅能力，可以打番出一個似謝影雪嘅比賽比大家睇，雖然今屆成績無上屆咁好，但對於發揮，我係今屆比較滿意。
最後，好多謝我自己堅持咗咁耐，我覺得呢啲事比以前既謝影雪遇到，可能已經一早放棄咗，但經過今次，我覺得我真正學識咗及做到自己嘅座右銘。我都要好多謝我嘅身體，多謝你18年來比我用到五勞七傷，抱歉無將你哋照顧好，我以後會更愛錫自己了。」
一個月前仍無力唧牙膏、梳頭
昨日（1日）謝影雪在賽後受訪時，也曾透露自己賽前1個月傷勢嚴重，她稱：「一個月之前，我唧牙膏都唧唔到，梳頭都梳唔到，到我今日可以完成奧運，好多謝所有後面嘅人，因為在兩、三星期前我還在醫院急症室，喊著問醫生『點算，我去唔去到（參加奧運）』。」她形容當時已認為很大機會無法參與，但醫生很好，不斷安慰她「無問題，一定去到」，非常感恩最終能夠參賽，「上一屆覺得自己發揮不足，今次真的好享受打每一場，已盡所有努力，對得住自己。」
」，
App內睇文同睇片可隨時捕捉U Fun彩蛋，
換領現金券及禮品！
【登記送🎁】L'OCCITANE 3款臻緻節日倒數日曆🎄！
↓一次帶走24件護膚、身體／頭髮護理及香水產品↓
↓ 【毛孩請試用】Royal-Pets蘆薈溫和修護沐浴露！↓
↓去除身體污垢，成分溫和無添加！↓
