ERROR成員郭嘉駿（193）昨日被網友於「香港突發事故報料區及討論區」FB群組中，踢爆他是一條車Cam片的男主角，片中拍到一架紅色法拉利，向後倒車期間不慎撞跌一名婆婆，婆婆隨即跌落地。事後193在IG承認此事，重申婆婆拒絕送院亦表示不需要報警及賠償。原來193獲邀明天出席公開活動，不過主辦單位發電郵通知活動取消。
網友昨日「香港突發事故報料區及討論區」分享兩條影片，片中是疑似車Cam拍到的片段，據知，片段是昨日拍攝，第一條片見到紅色法拉利在土瓜灣美善同道十字路口位置向後倒車，期間有打燈，不過未知是否婆婆未有留意，而且走出馬路時有少少猶豫，所以最終法拉利向後褪時，婆婆被撞跌倒地。而另一條片是司機已經落車正在慰問婆婆，向婆婆雙手合十後道別然後上車，司機著住紅色長袖衫，印有大大隻字「16」，司機高材高大，但車Cam就拍不到司機容貌。婆婆疑似睇一睇手踭上的傷勢後，就繼續在同一位置過馬路。
不少心水清的網友一睇司機的身形和車牌號碼就估計是193本人，亦有人討論今次賠償和駕駛問題，「193嚟」、「係咪跌咗錢和解？」、「阿婆即刻入醫院驗傷，C X到佢爆！」、「阿婆畀法拉利撞一撞，應該內傷㗎喇！」、「咁快走人，呢個歲數到時有乜事就冇得追」等等。本網致電經理人求證，隨後193在IG Story親自回應此事，「昨日喺土瓜灣倒車時於後鏡見到婆婆跌咗喺地上，我當刻即時落車向婆婆道歉及詢問有冇受傷，亦問咗需唔需要報警或送院。婆婆話冇事唔需要，於是我便上車離開，事後我已為事件向警方備案，亦會盡力配合跟進，以後開車會更加倍小心注意路上情況及安全。」
193原本明天（21日）獲邀出席一個品牌活動，原因今日相關公司通知傳媒活動取消，未知是否跟今次交通意外事件有關。而193再發IG Story，背景疑似是他的車Cam片段，但他就用大堆文字遮住中間部分，他留言說：「尋晚好夜先收工，返到屋企唔係好瞓得著，一直都喺度反省自己嘅行為，可能因為第一次揸車碰撞到路人，唔識應該唔應對處理，但我完全明白我駕駛係有唔正確嘅地方，以後一定會非常非常小心，遵守交通規則同埋留意路面所有情況。而我最怕係見到網上不實嘅報道話我不顧而去，例如將啲片Cut頭Cut尾，令痛（疼）錫我嘅人見到呢啲不實嘅資料會唔開心甚至同人鬧交，所以我尋晚收工即刻Backup返個車Cam。想畀大家知我一停車就馬上衝落去慰問婆婆（或者其實應該形容佢為姨姨）問佢需唔需要報警或去醫院，最後希望姨姨佢一切安好，事件已交由律師及警方處理，所以我暫時不能夠回應太多，感謝各位關心。」
34歲的193憑《全民造星》節目入行，跟何啟華、肥仔梁業及吳保錡組成組合ERROR，為方便工作，2021年10月已經成功考到車牌，隨後一年後興奮宣布「甩P牌」，揸車車齡已經差不多三年時間，大部分工作都會開車代步。而他一向是愛車之人，無論影相或是拍新歌MV，都以揸車作為主題之一。
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】卡樂B粟一燒熱浪香辣味！↓
↓ 粟一燒結合熱浪，香辣惹味！↓
↓【限時搶⚡】moonwell尊貴花膠食療系列養生燉湯！↓
↓ 無添加、真材實料滋補養生燉湯！↓
