TVB全新旅遊節目《Grand住去大阪》，由C君、高海寧（高Ling）及陸浩明（6號）主持，日前正式首播，三位主持出發前「grand住」在香港機場頭等候機室等上機，上輯《Grand住去台北》主持黃翠如驚喜現身「送機」。去到當地一個求婚熱門景點，6號陸浩明就慘遭C君狙擊...
高海寧（高Ling）及陸浩明（6號）會合C君去到必到地標兼拍拖勝地——梅田藍天大廈空中庭園，於360度全方位觀景台欣賞大阪夜景，接著再到室內餐廳邊歎美酒，邊繼續睇靚景。由於該處是求婚熱門地方，C君乘機向6號施壓催婚：「點解你對求婚少少誠意都冇？拖咗人咁多年唔肯娶人呢？完全冇婚姻概念。」以三連擊令6號毫無反搏之力。
而6號就無奈笑指C君比自己母親更囉嗦：「到時我第一個通知你，你唔好煩我喇！」
▼▼點擊睇更多陸浩明女友靚相▼▼
似拉麵碗嘅香檳桶浴缸？！
首間介紹的酒店品牌向來以hip同style見稱，大阪此間則以大人遊樂場為主題，並由日本著名建築師安藤忠雄設計，其實已經噱頭十足。位於酒店頂層、佔地2,800呎、約51,058港元一晚，只此一間的Extreme-WOW套房，樓底4.5米高，加上超開揚落地玻璃，可以俯瞰城市景色；浴室的銀色鏡面浴缸，設計理念來自香檳桶，高Ling笑指形狀似足巨型拉麵碗，時尚又funky！房內還設有DJ台打碟，且隔音、防震設備完善，絕對是派對場地之選。
之後，C君、高Ling和6號帶大家到米芝蓮一星餐廳歎法國菜，一入門口高Ling已被古典裝潢吸引住，高呼「好classic」。三人品嚐了鴿肉鴨肝香料麵包碎、咖啡牛油烤鹿兒島和牛、干邑海藻燉煮藍龍蝦，6號食到和牛時誇張形容：「我覺得隻牛好似活生生喺條脷度奔跑緊！」卻被C君吐槽：「唔使講咁多架，我哋淨係話畀話觀眾知，好食。感受？觀眾自己嚟感受嘛。」
《千與千尋》海上列車真實版
另一間值得推介的，為吞拿魚極致餐廳，高Ling和6號品嚐吞拿魚多個稀有部位，包括胃、心、眼窩等，還有吞拿魚珍貴部位—腦天。廚師即場表演解剖魚頭，高Ling被嚇得一邊掩眼一邊說：「第一次有人喺我面前咁劏魚法！」已戒牛逾10年的高Ling，吃過香煎腦天後形容味道激似牛肉：「好耐冇食過呢陣味，喚醒番對牛扒嘅記憶！」二人食完吞拿魚大餐，繼續撇甩C君乘坐奢華的「丹後黑松號」觀光列車，從京都北面天橋立駛往西面的西舞鶴，邊歎和風定食套餐，邊欣賞沿途幽美風景，其中駛過橋與水面距離僅得6米的由良川鐵橋，呈現著名日本動畫《千與千尋》裡的海上列車真實版，猶如在海上行駛一樣！
」，
App內睇文同睇片可隨時捕捉U Fun彩蛋，
換領現金券及禮品！
↓【社群送禮🎁】大派亞洲旅遊數據卡350張！第2擊！↓
↓4日無限數據！12 個地區適用！↓
↓ 【毛孩請試用】Royal-Pets蘆薈溫和修護沐浴露！↓
↓去除身體污垢，成分溫和無添加！↓
