糜爛再糜爛！高登瓊姐《衝上雲霄》影評潮文

嗱你唔好問我：「垃圾你又睇？」「你無睇trailer架？」，因為我都係被迫睇呢套垃圾，原因有：1）叮噹爆晒場；2）同行有小朋友，廢事睇Fifty shades of grey同12金鴨；3）唔想睇強國幅射喜羊羊；4）衝上雲霄應該唔會垃圾得過套浮華宴掛？5）同行友人見到sam哥同cool魔就出晒水

結果係：我輸左！我低估左呢套衝上雲霄，垃圾戲黎講，佢居然超額完成！！其實見到【鄒凱光】呢3隻字我已經心知不妙，我已經稍為調低我對套戲既expectations。點解呀？點解睇親鄒凱光都中伏？

一）故事散修修 亳無連貫性
我睇完套垃圾既感覺就係：我係咪睇左3套mv定音樂特輯？睇睇下古天樂同阿佘，無啦啦跳左去sam哥度，幾條愛情線完全無交集，求其炒埋一碟，人地外國十幾年前Love Actually咪又係咁玩，點解人地果套戲玩到變經典，香港電影就搞到咁柒？

二）掛羊頭賣狗肉？
我話佢「掛羊頭賣狗肉」已經好客氣。睇完電視版，我都唔expect你會focus航空業，sell下d飛機幾靚果d，呀居然成套戲講飛機既情節連5分鐘 都唔知有無，出場最多咪就係鄭秀文心口條第三跑道。ok，你賣情情塔塔丫嘛，呀屌你，居然連用黎賣狗肉既愛情線都可以弱雞到咁，除左床戲同打車輪，就仍然 係床戲同打車輪（鍥而不捨堅持著住飛機服黎搞野果下好野）。情節仲要極度老土，有句核突對白「我做你條安全帶囉」嘩我頂你個肺成底蘿蔔榚都比我嘔出黎，呢 d對白我阿婆都識作啦！最過份係張智霖同郭采潔，佢兩個可以話係負火花，似父女多d。咁你話喇，掛羊頭又唔係，賣狗肉又唔係，你話呢套垃圾究竟賣乜？

三）同電視版毫無關連
唔係隔離飯香，但日本果d「劇轉戲」真係做得好好，交響情人夢呀，螢之光呀果d。香港呢？成日推翻電視版設定，做乜要加鄭秀文同古天樂落去，你加唔緊要， 加新角色你都要交代下啦？再唔係仲衰，個角色一樣但同電視版果個完全無關連，嘩電影版個sam哥同電視版果個都唔同既屌你！好驚呀！而家你叫觀眾點投入 先？呢d基本野唔係要觀眾教番你呀編劇們導演們？雖則電視版既續集已經好垃圾，無馬神同陳慧珊既衝上雲霄根本唔係衝上雲霄。

仲記得2003年睇衝上雲霄真係好深刻，意大利取景勁壯觀，大個聽到人講衝上雲霄呢套劇，一定會加把咀講：係呀呢套劇勁正！到上幾年套劇拍續集，人面全 非，到到呢部電影版，我可以宣布，經過後人糜爛再糜爛，再次斷定「續集實仆街」呢個黃金定律。衝上雲霄呢四隻字已經比人玩到臭晒，掛住呢四隻字吸金，已經 比人吸乾吸淨，邊個香港觀眾再比呢四隻字呃錢，記住叫我鬧醒佢。

以上！我好少寫影評，但睇完呢套垃圾，一踏出UA門口我已經決定要寫篇文。我在此呼籲大家要珍惜光陰，唔想浪費生命既，決定睇呢套戲之前絕對要三思。再比我揀多次，我一定搭車番屋企睇第2173383287次家有喜事（1992年版）。回水呀仆街！