由周嘉洛、陳瀅、朱敏瀚、JW王灝兒主演的《痞子無間道》熱播中，劇情走向有時Gag到估你唔到，前晚（13日）其中一個場口講述符玲（陳瀅飾）一覺醒來發現閨房中勁多金，與近身丫環「哨牙珍」（何泳芍Honey飾）原本大為驚喜，並合力將大批銀両收好，劇情再爆笑位！
同一時間，太帥（黃子恆飾）因面上離奇出現超級大傷口，大吵大鬧要找出真兇，期間竟想到要去符玲房搵證據，為怕眾人搜出「秘密多金寶」，符玲與「哨牙珍」嚇到瘋狂飆汗。為了令場口更有喜感，陳瀅與Honey臨時掟橋搞加碼。
據知二人為了營造「真·汗如泉湧」效果，不斷拿水壼噴到自己成面濕晒之餘，還在頭髮上加了一條「水喉」，只要一嗌action，該條水喉便會射出水柱，製造二人「水柱式滴汗」效果。但仍嫌不夠喉的二人，最後決定再瘋狂飲水製造「噴水」效果，獲網民留言大讚「勁搞笑」！
Honey接受訪問時，坦言該幕忍笑很難：「嗰幕真係笑到哩，我同阿瀅要諗晒人生入面最悲慘嘅事情去忍笑，嗰幕係好癲嘅，阿瀅話無論佢睇幾多次，每次都係笑到傻。」並謂：「其實拍劇要玩水係好麻煩，雖然咁即興，但劇組好配合，仲將呢場戲特登調到嗰日最後先拍，因為我哋濕晒後好難拍其他場口，大家好齊心想做好件事。」
Honey續指當日拍攝時天氣確是很冷，並笑言濕身後要震住睇playback：「咁但係我哋覺得好值得咯，出嚟效果我哋好滿意。」
根據無綫曝光的官方花絮片，陳瀅與Honey確是全程笑個不停，陳瀅笑出「牛奶妹」樣之餘，仲一度笑到要踎在地上。根據片段，二人爆笑罪魁禍首絕對是Honey，皆因戴了假哨牙的Honey，噴水時出現「噴泉水花」，效果十分誇張，難忍笑也確是人之常情。
監製透露，陳瀅私下相當「多橋」，其中一件老是常出現的「暈暈」隨身酒壼，便是出自陳瀅的Idea，Andy透露：「原本劇本只係話符玲好鍾意飲酒，有一日陳瀅就話不如幫符玲設計一個叫『暈暈』嘅酒壼隨身攜帶，咁因為符玲成日都要飲酒，變相『暈暈』成日都會出現，咁啲觀眾就可以對符玲鍾意飲酒嘅特性有更深刻嘅印象。」
監製又謂每次拍劇都出心又出力的陳瀅，更自掏腰包將「暈暈」特製成紀念品送給劇迷及粉絲，相當有心！
除了陳瀅，JW是次的Input亦相當之多。其中一場講述JW急著向嘉洛通風報信，由於JW與嘉洛距離太遠，為了盡快將訊息傳達給嘉洛，竟上演了一場古裝版「超級無敵大電視」，為了表達「恭梓（公子）信唔得」，JW完全沒有理會任何偶包，扮完公公，又露出兇狠樣怒撕信紙，相當爆笑，Andy又爆料指所有動作，都是JW在零劇本的情況下即場自創。另一幕JW由壹將宮城一支箭跑回魯仁縣，JW擘大口瘋狂爆Seed的表情，竟與卡通人物燦子撞樣，相當爆笑。
港生活人氣娛樂新聞
【請您去旅行✈️🌎】
↓登記領取HK$1,500 旅遊資助金💰！↓
↓【限時搶⚡】卡樂B粟一燒熱浪香辣味！↓
↓ 粟一燒結合熱浪，香辣惹味！↓
