王菀之演唱會2025｜王菀之紅館神級演出震憾觀眾 張敬軒合體喊住版《下次愛你》蕩魂攝魄
睽違11年王菀之昨晚（22日）再登紅館，紀念入行20週年舉行《合體 – 王菀之演唱會2025》。與團隊、觀眾、張敬軒「合體」做了一個精彩絕倫、震憾感動，被觀眾龥為『超級無敵正』『神級』『1000』分，『唯一缺點唔夠喉』的演唱會。劉德華，炎明熙、謝安琪、張繼聰、GIN LEE、白只、阿卵、梁仲恆、梁祖堯、湯駿業等等，均有到場支持。
唱作女王王菀之打造神級演唱會
演唱會一開始，王菀之就講明，呢個唔係一般紅館演唱會，全個團隊都上下一心想做一個非一般紅館演唱會，第一首歌開始全場就已經企晒起身，跟著Ivana一齊投入音樂世界當中，一口氣唱了11首歌 : 好時辰，水百合，波點女王， 畫意，我來自火星，開龍雀，粒糖有毒，該死的快樂，沉默的士高、面斥不雅、詩情、離遊記 ，超水準演出，令全場無一不陶醉於王菀之音樂世界之中。
超班1000分演出震憾觀眾心靈
第二部份，Ivana又一口氣唱了11首歌，當中包括有自彈自唱，又單獨跳了一part 現代舞，無論唱功，每首歌的編曲，音樂編排都引爆熱烈掌聲及歡呼聲。11 首歌後，終於停一停跟觀眾打招呼，「我唱得咁落力，其實都可以唞少少囉...」觀眾狂歡呼拍手不停，大叫「好靚呀你！」「好瘦」「好正」，Ivana飲住水突然就話，「我飲水濁親，養生咁耐竟然係飲水濁親....唔凍唔熱係容易濁親，唔係40歲以上先係咁...」可愛行為逗得觀眾狂笑不止，「多謝大家來到合體演唱會！又到咗我全晚最驚嘅環節啦....就係講嘢...」
對於觀眾大叫好瘦呀，Ivana回應，「你打比我教練啦，佢辛苦過我，佢train我之後，佢瘦咗。」又引得大家笑聲不斷。Ivana舉起V字手勢，笑道: 「其實我想V，但係咁啱又係2，20年啦！我相信係紅館開個唱嘅唱作歌手唔係好多，而女性唱作人就可能更少....」觀眾即報以熱烈掌聲及歡呼聲，「大家唔好誤會，我唔係讚自己，我唔係讚自己，我唔係讚自己(x10 次)....」
而熱烈掌聲及歡呼聲就成分鐘就冇斷過， Ivana繼續: 「我想話，冇你地每一個支持，我又點能開到紅館演唱會呢？你哋嘅支持係令我最感動係，我代表我哋成個精英雲集嘅團隊，多謝大家。我哋成個團隊都係有夢想嘅人，為夢想努力奮鬥。多謝大家揀咗(觀眾)人生寶貴嘅3 小時，係呢度同我哋一齊合體，我係呢度祝福大家，全年大吉行好運，你哋睇我緊張到隻手係咁黏著條裙...係時侯唱一首，好早好早嘅歌送比大家， 繼而唱出成名作《我真的受傷了》。
與張敬軒合體《下次愛你》蕩魂攝魄
第三部份 台面出現兩張對坐椅子，Ivana表示，「以下環節，我都唔想多講啦」然後觀眾已經瘋狂歡呼，「係好特別，呢首歌送比現場每一位，送比我自己，亦送埋比佢。」繼而靈魂伴侶張敬軒升台，兩個人都靜默狀態，觀眾無敵的歡呼大嗌成分鐘，兩人都唔敢講嘢，唔敢對視，每一個現場觀眾，由兩人的行為，都感覺到軒仔及Ivana兩人珍視對方的感情，張力之大非筆默可以形容。
《下次愛你》音樂響起，Ivana已經忍不到開始喊，軒仔跟住缺堤。只有歌聲，無過往演唱會嘉賓式對話演釋，軒仔唱完即降台，卻為大家帶來驚天地泣鬼神喊住的合唱版《下次愛你》，令現場唔單止兩人喊，不少觀眾都被感動得熱淚盈眶。唱畢兩人互相擁抱，繼而軒仔吻了Ivana一下才離開。
驚天地泣鬼神喊住唱
而軒仔Ivana這次合體，亦令不少歌迷聯想起佢哋坐低對望對唱，同行為藝術家教母 瑪莉娜・阿布拉莫維奇（Marina Abramovic）及舊戀人兼創作夥伴烏雷（Frank Uwe Laysiepen）喺「The Artist Is Present」嘅一幕。Thread上Ivana騷的讚美被瘋狂洗板，同軒仔呢一次對唱，更被形容為驚天地泣鬼神，那份深不見底的友情太感人。
王菀之無準備Encore
是次演唱會，Ivana並無準備安歌，亦於完結時，跟觀眾表明係冇安歌，但最後一首歌《小俠》結束後，觀眾已不停狂叫，完場後亦不肯離開，狂叫安歌近五分鐘，最後Ivana一個人走出來，手握電話說，「多謝你地，我有少少驚，我冇預 encore 嘅...好多謝你哋咁熱烈同鼓勵我出返嚟， 我點解帶電話，一係你哋話我聽你想聽咩，我驚我唔記得歌詞，我成日覺得encore 要係真嘅，如果冇人嗌就唔好出嚟，所以冇預就冇準備定啦。 (歌迷不停狂叫歌名) 最後 ivana 揀左自彈自唱 《面俱》半首 ，「《面俱》！但二十年冇唱，哈哈，對上個次唱係出道個陣，我真係心少少緊張，上網搵歌詞先，如果有少少甩漏，都希望你哋接收呢份禮物 。」
港生活人氣娛樂新聞
↓【限時搶⚡】Orca Skincare芭絲特貓神魔幻養肌蜜粉↓
↓櫻花粉色增添紅潤血色感｜蜜桃粉橙色提亮膚色↓
【社群送禮🌸】送您麒麟一番搾啤酒及「和風櫻花禮品套裝」！
↓簡單一步登記贏禮物！↓
