打工仔入職不足1年申請AL去旅行遭資深同事「報復」刁難

打工仔請假去旅行！同事不滿要求做滿1年先準請

有打工仔透過連登討論區發文，分享近日向公司請假被同事「刁難」的經歷。他表示打算申請年假去旅行時，遭一名女同事強烈反對：「返唔夠一年就掛住放假，家陣你你嚟返工定放假」、「咁你可能一日半日咁請嫁，總之我唔鍾意人未夠一年就請長假」等，最終事主仍向經理請假。

事主還原對話過程：

• 樓主：公司規條嚟嫁？
• 女同事：返唔夠一年就掛住放假，家陣你你嚟返工定放假？
• 樓主：公司又唔鼓勵我哋帶假去下年，好矛盾喎。
• 女同事：咁你可能一日半日咁請假，總之我唔鍾意人未夠一年就請長假。

網民一面倒撐：經理批咗關佢咩事？

雖然經理最終批准假期，但該女同事在事後不斷擺臉色，「間唔時搵野嚟罵人」，又稱該女同事早有逼走多名同事的事跡，因而留言詢問網民：「我應唔應該照去旅行？」帖文一出即引發熱議，大批網民力撐事主「照去旅行」，都有個別網民認為應取消行程。有人強調「經理批咗就係道理」、「經理批左關佢咩事？有事叫佢問經理？ 」「你都得罪左啦...你取消都無用，所以照去旅行」，有人就質疑「老臣子」越權管閒事。

職場潛規則 VS 勞工處制度

不過都有網民指出，該名女同事未必完全「錯哂」，並引述勞工處《僱傭條例》，指嚴格而言僱員未做滿12個月確實無權享年假（法定假期除外）：「法例上佢冇講錯，但程序上你冇錯喎，經理批咗，最緊要有人批架啫，有嘢叫佢搵經理」。

點擊圖片放大

針對這場職場風波，都有網民們紛紛獻計，有人建議「以前都遇過類似嘅事，忍唔住係寫字樓大大聲鬧佢，之後佢就好好禮貌」、「經理批話之你請埋no-pay（無薪假期）」。有熟悉勞工法例的網民指出，法理上年假需做滿一年才能累積，但實務上不少公司會彈性處理，「正常公司係試用期非必要唔請得（入職前講定都得，負住數先） ，一年幾多日假咪果年可以請幾多次，你12日年假，5月1日入職，5月至12月咪可以請8日」，稱只要僱主批准，僱員便有權休假，其他同事無權干涉。

資料及圖片來源：連登討論區