Wyman自爆：《羅生門》未結局，第四集又關《目黑》事

文：Marcus

Hello，又嚟度《羅生門》新聞報導時間，聽咗成個星期《羅生門》3部《耿耿於懷》、《念念不忘》、《羅生門》3部曲，相信你哋已經急不及代想聽下集新歌JunoXWymanX周國賢嘅《雷克雅未克》，唔好意思，歌就未有得聽住，不過就可以透露下劇情發展。

Wyman接受JOOX訪問親自解讀呢份詞，話說前幾集講到個男主角同女主角分咗手仲思守十年，又耿耿於懷又念念不忘，《羅生門》都講到明個女仔唔Buy佢，無在意過佢，但結尾男主角仲話要實現十年之約，同女主角去冰島睇星：

「情人若你也未忘 約定誰過十年暗渡陳倉 再續夜航 別瘋狂　下個一月 願如期團聚於　冰島某地方」

但女主角冷淡回咗句：

「讓前塵沉澱於　福島某地方」

即係話無必要見，求其去福島睇算！不過個傻仔真係去咗冰島等個女仔，未出街嘅《雷克雅未克》歌名就係冰島首都。

咁周國賢嘅角色係咩呢？佢除咗作曲原來都會唱一Part，訪問中，Wyman透露：「整首歌有十分之九是Juno獨唱，而最後十分之一的部分則是周國賢唱的。而周國賢則是一個同步發展的新故事，他和男主角一樣因為一個約定，同時地在福島上等待那十年前於日本認識的一個日本女孩，他們曾經相約於福島上看星，而這個女孩正是周國賢11年前《目黑》中的女主角。」

Wyman填嘅《目黑》就提到：

「男：黑色眼睛　沿途與你有過一幀風景

(女：當這黑眼睛　找到黑眼睛)

男：但路上　誰也沒名沒姓

(女：平凡名字會褻瀆愛情)

男：自問曾經 憧憬 留低此地看星

(女：情願我　能做你眼中那顆星星)」

《雷克雅未克》部份已曝光歌詞就提到：

「請你兌現約定 飛到伴我看星

往昔福島名勝 破損中顯神聖

誰人能為 昨日情

過十年後 再度遠征

時間廢墟裡

尋那 不經污染 相戀的鐵」

周國賢喺其他媒體提過自己似《阿飛正傳》嘅梁朝偉梳出嚟兩下頭，小編聽落就似《春光乍洩》嘅張震，要去世界盡頭搵一啲嘢。

另外，好多人話Wyman一早部署咗十年後玩嘢，佢就話：「我當然没有精心部署這故事線，只是過去20年我亦曾經為不少歌手填詞，為他們各自寫下不同的小故事，所以當我要構思這個故事時，便想到可以加入其他歌手的故事，令這個故事更加有趣。」睇嚟大家諗得太多喇！

黃偉文獨家專訪足本可上JOOX詳閱