公民教育展覽@香港書展2025 圓滿結束！立即回顧精彩時刻！

邊玩邊學  公民教育
由民政及青年事務局和公民教育委員會主辦嘅「公民教育展覽」，位於會展3樓「兒童天地」攤位，場內設有豐富嘅圖文展板，畀大家了解委員會工作。

場內亦設有多個可換取紀念品嘅「集印仔」小遊戲，除咗邊玩邊推廣四個核心公民價值，包括「尊重」、「負責」、「關愛」和「包容」外，亦加深大家對《憲法》、《基本法》、「一國兩制」、維護國家安全，以至中華優秀傳統文化嘅認識。現場人頭湧湧，大家玩遊戲和睇展板內容之餘，亦專心睇電視短片、留意公民教育委員會嘅推廣訊息，呢個輕鬆有趣嘅學習方法，睇嚟相當成功！

3大人氣遊戲  緊張刺激
數到最受歡迎，一定係3大攤位遊戲，大小朋友們都不停排隊玩遊戲，成功獲得唔少精美又實用嘅紀念品，例如圍裙、泥貓迷你掛鈎袋和砌圖等！

問答遊戲「有『腦』公民最知『法』」考驗大家有關《憲法》、《基本法》、維護國家安全的知識，玩家需於限時內以平板電腦回答選擇題，答啱一定數目題目，即可獲得紀念品，好多家長都陪同子女一齊動腦筋，親子協力過關答題，氣氛都幾緊張！

現場所見，唔少人完成問答遊戲後，都即刻排隊玩邏輯益智遊戲「『熊貓號』啓航」，繼續絞盡腦汁，諗辦法以控制筆將遙控車「熊貓號」駛經各個「國家現代成就」圖案，只要「熊貓號」於限時內走出正確路線，即可獲得紀念品。遊戲超級燒腦，吸引人一玩再玩！

至於第三個攤位遊戲「『牌』除萬難」，則屬勾牌遊戲，玩家要於限時內先搵出能夠體現核心公民價值嘅牌子，再以遊戲竿將牌子勾上掛板，絕對是身手眼力大挑戰，唔少參加者都眼明手快，成功完成遊戲將紀念品帶返屋企。

AI加持  中國名勝打卡
玩完趣味十足嘅互動遊戲，仲可以喺「身臨其『景』」打卡位影相留念。現場設有打卡裝置，運用AI技術帶大家瞬間置身於多個國家著名景點。

現場有唔少人排隊同小泥子、王子和泥貓齊齊打卡。見到大家笑得咁開心，仲發揮創意擺出趣怪影相pose，現場直擊嘅小編都想丟低工作影埋一份呀！

簡單而隆重  公民教育展覽典禮
「公民教育展覽」舉辦日期為7月16日至22日，而喺7月18日上午11點，就舉行咗公民教育展覽典禮。除咗有公民教育委員會主席蔡德昇先生致辭，頒發公民教育委員會「公民大使」嘉許狀外，亦有簡單而隆重嘅啟動儀式。

出席嘉賓有民政及青年事務局副秘書長（民政事務）黃昕然先生、首席助理秘書長（民政事務）嚴鈞樂先生、公民教育委員會主席蔡德昇先生、公民教育委員會屬下宣傳小組召集人呂志宏先生，以及公民教育委員會一眾委員等，場面十分熱鬧！

典禮更有連串精彩表演，打頭陣係「藝菁薈」嘅粤劇表演，兩位青年表演者落力唱戲，極具功架！然後係「飛舞天下舞蹈中心」嘅芭蕾舞表演，四位兒童舞者雖然年紀細細，但憑藉多個高難度動作成功擄獲觀眾芳心！

最後由曾參加《中年好聲音》嘅柳冕帶嚟歌唱表演，柳冕唔止歌聲具感染力，佢嘅奮鬥經歷亦感動唔少在場人士，典禮喺一片掌聲中順利結束！

除咗今次嘅公民教育展覽，公民教育委員會亦會不時舉辦唔同嘅精彩活動，推廣公民及國民教育。想緊貼第一手消息，記得留意公民教育委員會嘅Facebook專頁同Instagram帳號喇！

Facebook專頁：https://www.facebook.com/cpce.events
Instagram帳號：https://www.instagram.com/cpce_hk

Source: 公民教育委員會 CPCE