熱愛優質生活

8月新戲速遞之外國小品篇

紙上城市(官方圖片)
2015.07.31

廢話唔多講,嚟到8月,如果你鍾意睇啲浪漫愛情或者地獄悲情嘢,有咩新戲好揀?等小編話過你聽!

1.《紙上城市》紙上城市(官方圖片) 

預計上映日期:13-08-2015

作家John Green前作《生命中的美好缺憾》被改拍電影後反應非常正面,全球票房超過 3 億美元 ,今次到另一部作部《紙上城市》被改編,Quentin 暗戀咗好耐嘅女仔Margo有一晚潛入佢間房,邀請佢一齊參與報復男友偷食行動,第二日, Margo突然消失,留低一張紙條,上面寫住「你將前往紙上城市,永遠不會回來。」Quentin覺得有唔妥,就根據蛛絲馬跡去尋找Margo,展開一段公路旅程,當中,佢發現Margo並唔係好似佢想像中嘅模樣,從而從新認識佢……

適合:鍾意FF嘅人
不適合:環保人士(用咁多紙)

2.《攣情告急》攣情告急(官方圖片)  

預計上映日期:06-08-2015 

出櫃就聽得多,入櫃你有冇聽過,攣足30嘅俊杰米同醫生男友安東本來就愛得火熱,仲決定結婚,點知無啦啦同索女雅娜發生一夜情,呢件事對佢衝擊太大,佢隱滿基佬身份搵返個女仔出嚟,死火,佢越嚟越畀呢個女仔吸引,但婚期快到,佢會點收科呢?

適合:HeHe、HeShe、SheShe……
不適合:He、She

3.《玩轉4字頭》玩轉4字頭(官方圖片)

預計上映日期:20-08-2015

阿佐同歌妮呢對夫妻造人計劃失敗後就一直過住二人世界,不過長此落去又開始覺得悶,呢個時候畀佢哋遇到占美同戴比呢對年輕夫妻,跟住佢哋去踩Roller、跳Hip-Hop、參與巫術聚會等,疏遠班同齡朋友,成個人當堂Young晒,阿佐本身係拍紀錄片,占美話係佢Fans,但慢慢阿佐發現占美夫妻接近佢係有陰謀~

適合:鄭子誠
不適合:中年毒男

4.《幸福魔天倫》幸福魔天倫(官方圖片)

預計上映日期:20-08-2015

好似《凶兆》咁生個666魔童就話得人驚,原來生個聖嬰都好恐怖!Jude同意大利女仔Mina快速撐著、結婚、生仔,Mina憑佢嘅第六感,再聽埋神婆預言,覺得阿仔有超能力,所以就要極度保護佢,要佢食素同淨化身體,Jude本來都忍Mina,但見阿仔發育唔正常,佢都開始躁,兩個人嘅關係會有咩變化呢?

適合:怪獸家長

5.《翩翩愛自由》翩翩愛自由(官方圖片) 

預計上映日期:13-08-2015

英國電影大師堅盧治執導,佢曾多次獲得威尼斯同康城影展獎項,本片係佢最後一套劇情片,30年代,愛爾蘭政治領袖占美格拉頓從美國回流後,見到鄉下死氣沉沉,就諗住搞個舞池,畀班後生仔聯誼下,燃點佢哋生命嘅熱情,保守嘅教廷就想以道德理由打壓,究竟占美守唔守得住跳舞嘅自由?

適合:娃娃舜
不適合:討厭政治嘅人

6.《巨聲架勢堂》巨聲架勢堂(官方圖片)

 

預計上映日期:20-08-2015

70年代嘅韓國有一個音樂廳「C'est si bon」專培育民謠歌手,鄉下仔吳根泰為咗唱歌而放棄讀醫,佢喺C'est si bon遇到尹亨柱、宋昌植組成三重唱組合,根泰仲成功追到女神閔紫英,本來事業愛情兩得意,點知政府話要掃蕩音樂界歪風,將佢哋捉查,根泰被逼同拍檔、戀人分開,不過20年後,根泰竟然喺美國相遇女神,唔知佢哋可唔可以再續前緣?

適合:區瑞強
不適合:K-pop友

想睇更多?

即睇:

8月新戲速遞之本土/合拍片篇

8月新戲速遞之動作動漫激鬥篇

 

  

================ Follow us ================

即like UHK 港生活facebook, 追蹤城中大小熱話;
Instagram: @ulifestylehk

內容評分
評語