金童｜張繼聰首部個人電影宣佈上映！耗時六年自資6位數圓夢 發長文自白：我無辜負到你！
張繼聰的首部個人主演電影《金童》歷經六年等待，終於在2025年問世。他為戲由2017年開始操肌鍛鍊，以極高毅力準備角色，並親自投入資金完成後期，只為對得住作品與當年自己。在今日（10月2日）張繼聰在社交平台發長文用文字紀錄這六年來等待上映的血淚史：「我真係企到最後，將套戲送入咗放映室」。
金童｜電影故事概要
電影《金童》是一部香港動作驚悚作品，由陳維冠執導，張繼聰親自監製及主演。故事圍繞昔日拳壇天才「金童」張力（張繼聰飾），他十年前在事業巔峰時因意外入獄，失去了一切自由與尊嚴。刑滿出獄後，他首次見到從未謀面的親生兒子方圓，並因要繼承方圓母親遺產，必須和這個陌生兒子共同生活，開始父子之間的感情磨合。
張力困於生活經濟困境和家庭情感的糾葛，也面對過往賽台陰影的壓力。隨著父子日漸理解和包容，張力逐步找回人生的使命感，鼓起勇氣重返拳壇。他不僅要在擂台上正面迎戰，更希望成為兒子的榜樣，展現堅毅信念、重拾自我價值。電影主題貫穿勇氣、親情及自我救贖，帶出「邊個理由夠厚，就可以企到最後！」的激勵訊息，讓觀眾感受到主人公歷經血淚鍛鍊仍然堅持到底的精神。
金童｜張繼聰長文自白 紀錄六年血淚
張繼聰發佈的長文自白，主要是記錄他為電影《金童》付出的六年血淚歷程和心路歷程。他在文中坦言，為了演繹拳手「張力」這角色，自己由瘦身到增肌、每日操練、甚至面對身體傷患如椎間盤突出，每個星期六天訓練三小時，過程極為艱辛，但同時也收穫了成長與感動。
自白中他形容自己的人生如電影中心思想一樣：「邊個理由夠厚，就可以企到最後」，鼓勵行內外的同行不要輕易放棄夢想。即使遇上重大挫折、電影拖延上映、甚至需自行投入資金完成後期，都不曾放棄。
金童｜張繼聰自資完成電影後期製作
由於影片製作歷經多次延期及資金困難，張繼聰透露他最終親自投入六位數資金，將後期剪接、混音等工作完成，只為讓這部個人心血之作順利面世。這份堅持展現了他對電影和夢想的執著與責任感。他坦言，這六年等待的過程像是和自己作對，但只要有信念，能在最困難時刻堅持下來，人生理想便總有機會實現。
金童｜張繼聰六年曾望 獲封「影帝」
張繼聰坦言六年後，看待這部電影《金童》的態度已變得很純粹，當年曾經想在40歲前能憑電影奪得「最佳男主角」，但六年後的今日，他自知作品不多，都未知能否獲邀出席頒獎禮。他亦坦言近年整個行業遇上前所未有的困難，甚至入戲院看電影的人少之有少。如今，他只能盼望觀眾入場可從電影中獲得一些力量，能夠激勵到大家勇敢行下去。他最後寄予電影一句：「每套戲都有自己嘅命運，就算佢係咩形狀，喺我心目中都係最完美嘅。」
張繼聰完整發文如下：
「To 6年前嘅張繼聰：
聰，我係2025年嘅你。係啊，45歲嘅你。放心啦，我仲未中年發福，頭髮都仲keep到，只係身體因為多年拼搏，積埋咗少少傷患，不過大致上都仲頂得順！
今日有個好消息話你知——我哋套戲《金童》終於上映 啦！由6年前拍完到今日，我成日問自己：點解當初我哋會開始呢個project？呢段咁難行嘅路，究竟意義喺邊？我知你為咗個角色，由2017年開始，提前準備咗兩年幾，捱盡皮肉之苦。講真，而家嘅我，應該做唔返你當年做嘅嘢。
每年元旦許願，我都希望件事有轉機，希望我哋嘅努力唔會白費……就係咁，足足等咗六年。拍完套戲之後，因為資金問題，我哋連後期製作嘅錢都唔夠。就係咁，等完一年又一年……
因為唔想辜負你，幾難行嘅路我都會咬緊牙關頂落去。為咗套戲可以上畫，我要面對好多估唔到嘅問題同困難。好多時我覺得自己好似陷入咗流沙咁，越用力掙扎，沉得越快。作為一個演員，我要處理無數製作同後期問題，面對一萬樣未接觸過嘅挑戰，甚至自己拎六位數出嚟完成套戲，只係想對得住《金童》。為咗你，就算剩返最後一啖氣，我都要爬返上嚟，同大家分享我哋嘅作品！
記得你當年搞呢個project，係想用勵志片鼓勵入場嘅觀眾，亦都想喺40歲前攞到「最佳男主角」，喺影壇站穩陣腳。Sorry man，「最佳男主角」我哋後來差啲有機會，不過唔緊要 啦。原來就算同獎項擦身而過，都無影響我哋對演戲嘅熱誠，我哋依然係個快樂嘅人。
有時失去你以為好想要嘅嘢咩？望真啲，其實真正需要嘅嘢已經喺手。We are fine.
至於你驚會被影壇淘汰？我話你知唔使驚。因為到咗2025年，成個行業好似被人淘汰咗咁……好多前輩都話未見過咁艱難。你以前成日開工好少時間喺屋企？唔使擔心，幾年之後大家都有好多時間陪屋企人。
最佳男主角？一年得咁少戲上，都唔知仲有冇頒獎禮……
我記得你當時為咗修身，每日都要跑好多步，好辛苦。成日幻想全院滿座嘅觀眾為你鼓掌，就係你每次跑落去嘅動力。Sorry，都可以話你知，而家已經好少人入戲院……市道差到連戲院都撐唔住，好多電影票房都好慘淡。
努力係必須㗎，但最後可能乜都幫唔到……
所以我有時會諗，由2017年開始準備，到2025年先上到畫，上天到底想我學啲乜？原來我真係學到好多嘢。最難嘅時候，我遇到好多人幫手，每個幫過我嘅人，都令我覺得無限溫暖。人生就係咁，你以為好差咩？正因為咁差，你先會見到最美嘅嘢。不知不覺，迫住學咗好多電影製作嘅知識，對日後做導演，真係好有用。最重要係，我對《金童》嘅心態變得純粹咗，唔再諗佢會帶俾我啲乜，只係真心希望，有緣入場嘅朋友，可以攞到啲力量，喺佢哋人生可以勇敢啲繼續行落去 ！「邊個理由夠厚，就可以企到最後」——呢句就係我哋套戲嘅中心思想。
聰，無論結局點，我都可以抬起頭講一聲：我無辜負到你！我亦無辜負到套戲想講嘅主題。我真係企到最後，將套戲送入咗放映室。每套戲都有自己嘅命運，就算佢係咩形狀，喺我心目中都係最完美嘅。
2025嘅你 上
21.09.2025」
金童｜上映日期
電影《金童》將於11月21日正式上映，屆時留意官方社交平台公佈優先場日期及購票詳情。
金童｜電影預告
金童｜香港上映戲院購票詳情
資料及圖片來源：IG@goldenboy_movie、IG@louischeung2013
港生活人氣娛樂新聞
↓【限時搶⚡】激賞卡樂B熱浪香辣味蝦片 ↓
↓ 熱浪香辣味+金黃鬆脆蝦片 ↓
【請您去】香港挪亞方舟「動・森・萌樂園」
↓ 零距離接觸活潑小動物、全港首個大自然主題光影互動展館 ↓
假日好去處