TVB台慶劇《金式森林》昨晚還有好戲之人演技之爭,主角是三屆視帝郭晉安及出名好戲的綠葉王徐榮。劇情講述長子方學禮(何廣沛飾)在董事會中被圍攻之際,阿爸方仰天(郭晉安飾)坐著輪椅突入,更一嚟便「以退為進」地向乘機搞亂檔的徐榮宣戰。兩大好戲之人郭晉安與徐榮的洪技火花一來一回,可謂是高手過招的場口。
兩大好戲之人郭晉安徐榮高手過招
三屆視帝郭晉安先是拋出一個鄙視式自信笑容,之後便直球攻擊徐榮:「上天對我不薄,我有排都唔死得,點呀?你有冇好失望?」面對郭晉安的突如其來強攻,明顯亂了陣腳的徐榮強裝鎮定:「點解你咁講呀,你知唔知呀,你一出事我即刻好擔心你,日日裝香拜神,希望你好番。」
安仔「鄙視式自信笑容」一嘢KO徐榮
之後郭晉安向現場所有董事表示原本以為自己死得,之後乘機再直球寸多次徐榮:「今次我點都要捱過呢一關,因為只要我醒番,就會有好多人都好失望,我就係要擘大對眼,親眼睇住嗰啲人失望嗰個樣。吖!今日終於畀我睇到喎!」更邊說邊以挑機笑容直視徐榮,氣得徐榮吹鬚碌眼,極度老尷地扮無謂問:「天哥,你講緊邊個呀?」郭晉安再回:「邊個人對號入座咪講邊個咯。」
這場「刀光劍影」搶白戲火花四濺、贏盡正評:「安仔好有氣場、係有戲嘅」、「呢個編劇有料到」,有細心網民更留言指在如此緊張的對嗆場口,安仔能以如此放鬆的狀態、說出如上高能量對白是演技示範作。