萬千星輝2025｜佘詩曼四屆視后締造香港歷史紀錄 四年四段得獎感言全部神對應

佘詩曼四奪視后創歷史！四次感言神對應

佘詩曼（阿佘）的演藝生涯蛻變速度與高度驚人，從當年的「雞仔聲」進化到今時今日的「Man姐」，回顧她四次獲獎感言，字裡行間環環相扣一段熱的血成長史。

2025年《新聞女王2》：第四次奪視后

阿佘在第四度封后時，感言已昇華至另一層次，她感性表示今次「我已經成為咗呢個角色」更霸氣勉勵台下後輩：「歷史係人類創造出來，只要冇放棄，你哋一樣會成為歷史。」 從追逐獎項到創造歷史，展現了女王風範。

「多謝！多謝！今晚將會係我人生中我一定會記住嘅夜晚，有你哋同我一齊喺呢個咁靚嘅畫面，多謝！我上一次攞呢個獎我覺得係我佘詩曼自己攞嘅，但我覺得今次得獎嘅係man姐，因為我已經唔係去飾演一個角色，我已經成為咗呢一個角色，係佢帶住我透過精彩嘅劇情，去同觀眾再一次產生共鳴，所以我想同man姐講一句「我鍾意你呀文慧心」！

我開心到爆，唔記得晒呀真係！我第一次演續集，原來演續集係咁正！因為可以同一班咁熱血同埋咁想進步嘅一班人可以繼續合作係我嘅福氣，好感恩遇到你哋每一位，多謝你哋！

多謝我嘅Team，仲有優酷嘅宣傳團隊，因為宣傳真係好重要，佢哋真係日以繼夜咁樣，我每日起身都見到幾百個message關於宣傳策略，拍咗一個戲出嚟，可以點樣好好宣傳，令到更加多人知道有呢個戲，有更加多人去睇呢樣嘢，非常重要，所以我好多謝所有宣傳嘅同事！

多謝編劇，同埋多謝我媽咪，咁堅強、咁樂觀去面對佢而家嘅情況，好多謝我細佬，好悉心去照顧媽咪，令到我可以好任性咁去追尋我嘅夢想，好多謝我經理人，有你係我身邊，係我一件好有福氣嘅事，有你做我經理人，係上天賜俾我嘅禮物，你令我不斷進步！

我成日覺得歷史係人類創造出來，我今日做到，我相信台下嘅每一位，你哋只要冇放棄，你哋一樣會成為歷史，鍾澍佳先生，我希望我哋可以再創下一個歷史，多謝！」

2023年《新聞女王》：第三次奪視后

阿佘第三次奪獎時，曾興奮高呼：「我可以證實『一不離二、二不離三』都可以係好嘢！」當時她強調攞獎「好難好難」，並感謝《新聞女王》團隊。對比2025年她笑言「演續集係咁正」，足見她對角色延續性的熱愛。

「我以為唔會喊，今日我攞完呢個獎，我可以證實「一不離二、二不離三」都可以係好嘢！每次企喺呢個台上面都好緊張，因為攞一個獎真係好難好難，唔係淨係我一個人努力，係大家嘅努力。我好多謝Man姐呢個角色，我好多謝大家支持《新聞女王》。

我最開心嘅係我可以同一班好好嘅演員合作。你哋俾咗個好好嘅回憶我，我真係好開心。我希望嚟緊會遇到更加多好嘅角色。希望嚟緊會有更加多好嘅等大家可以返屋企煲劇、追劇，多謝大家！仲有我多謝我媽咪，我媽咪成日都照顧我，多謝多謝。」

2014年《使徒行者》：第二次奪視后

第二次奪獎時，阿佘提到雖然大家都說她「攞硬」，但背後付出極多。她當時留下一句座右銘：「冇嘢係最好，只有更好。」 這份「不自滿」的精神，正正銜接了2025年她感謝經理人「令我不斷進步」的初衷。

「多謝TVB令我人生更加精彩，每一次企上呢個台都好緊張，啲人話我攞硬，但其實攞一個獎真係並唔容易，要付出好多，要好好彩，遇到好劇本、好角色，自己要好好把握。我今次好好彩，遇到一個好好嘅監製…

仲有一個人，我一定要多謝嘅，就係我媽咪，因為我做嘢壓力好大，成日都炆憎，但佢永遠都可以比到個好燦爛嘅笑容我，呢樣嘢係我好需要㗎，多謝你媽咪，有你喺我身邊鼓勵我，多謝你。多謝每一位投票俾我嘅觀眾。其實冇嘢係最好，只有更好，我會做到更好，繼續努力，多謝大家。」

2006年《鳳凰四重奏》：第一次奪視后

回望阿佘第一次拿視后，她曾泣不成聲地憶述被批評「雞仔聲、唔識做戲」的辛酸，並承諾「唔會令大家失望」。從當初那個怕令媽咪失望的女孩，到2025年她感謝細佬照顧媽咪，讓她能「任性追夢」。

「我真係以為，攞完頭先嗰個（我最喜愛的電視女角色），冇機會攞呢個（最佳女主角）㗎！我好多謝TVB，由啲人話我雞仔聲，唔識做戲，直到我今日攞呢個獎，好開心，我冇令到支持我嘅人失望，冇令我屋企人、冇令我媽咪失望。我唔知呀！我頭先講晒啦啲嘢，我想暈呀，我會繼續努力，唔會令大家失望，今晚我一定會記住！」