Threads熱議10大最有禮貌藝人！零負評男神一行為勁加分 張曼玉超親民舉動永世難忘

Threads網民大讚10大有禮貌藝人丨陳冠希

有網民指20年前在玩具反斗城偶遇當年紅透半邊天的陳冠希，外表Cool爆的他竟主動與網民聊天，問對方幾歲、做這份工多久。當網民隨手撕下一張紙求簽名時，他亦大方答應，完全零架子，令該網民將簽名珍藏至今。

原文：

「當年（大約2003-2004），我喺尖沙咀海運玩具反斗城做promoter賣哈姆太郎襟章機。嗰陣個場好靜，無野做周圍望見到前面有三個人行緊埋嚟，著hip hop 嘅，行埋啲睇真啲原來係陳冠希，真人真係好靚仔，冇架子，仲同我傾咗幾句偈（大約都係問部機點玩，問咗我幾歲，做咗幾耐）由於當時嘅女友好鐘意佢，我當刻叫佢幫我簽個名，但我冇佢嘅相，咁唯有喺本簿仔度搣咗張紙出嚟比佢簽，最後我仲過咗膠keep起咗冇比女友，到依家keep咗廿年喇」

Threads網民大讚10大有禮貌藝人丨Tyson Yoshi

有網民透露曾在咖啡店偶遇TysonYoshi，當時TysonYoshi已經買完咖啡準備離開，而網民的朋友雖然認出對方，但卻不敢上前合照。不過TysonYoshi竟主動向網民提出可以合照，令他們大為欣賞！

原文：

「同frd去買咖啡見到佢,佢應該係買完準備走人，朋友(男仔)唔好意思問佢影相 佢主動行埋來問係咪想影相，叫我哋等佢返上車放低啲嘢先」

Threads網民大讚10大有禮貌藝人丨張曼玉

有網民表示遇過最無架子的明星是張曼玉，並分享在約20年前曾在工作的咖啡店遇到張曼玉。當時身為國際影后的張曼玉戴著黑超進店，不但主動微笑回應店員的招呼，更全程有問必答。臨走時更特意同店員講：「我有車啦、下次再見」，被網民激讚是「見過最無架子的 Superstar」。

原文：

「貴為國際巨星、影后級人馬的張曼玉真係我見過最無架子的SuperStar!2003年、小弟任職蘭桂坊STARBUCKS 嘅時候、無意之間見到一個超級有ICONIC嘅人物進店⋯⋯巨大爆炸頭、超有派頭的黑超🕶️、由未進店已會心微笑咁行入嚟、佢一入到嚟、我就心心眼咁同佢打招呼（HELLO MAGGIE),佢見到我都笑笑口咁回應返（HELLO HELLO）跟住佢好有興趣咁望住個CAKE櫃問我有冇好介紹⋯⋯⋯最後佢買咗兩件蛋糕同一杯咖啡、全程就由收錢到沖咖啡期間我都係直接同佢對談，（完全有問必答、歷時約5分鐘左右，佢問我企喺呢邊門口會唔會阻住我哋（鏞記對面嗰入口）、我話：唔會當然唔會啦！原來佢等緊助手車嚟接佢、隔咗幾分鐘之後佢臨走仲同我講 （我有車啦、下次再見嘩，真係冧到暈咗！」

Threads網民大讚10大有禮貌藝人丨方力申

另外，亦有網民表示在2013年曾在倫敦酋長球場偶遇方力申，當時網民與太太不敢向前確認，更認為方力申未必會他們合照。怎料在前方的方力申竟回頭說：「邊個話我唔會同你哋影相㗎？」，主動與網民合照，更向他們介紹官方球迷會朋友，讓他們以後可以以正價買票，十分親民有禮！

原文：

「2013年2月同老婆去倫敦酋長球場睇波，歐聯十六強阿仙奴主場對拜仁，行緊去球場途中，疑似前面嗰個人係万刀甲，我同老婆講，不如睇下係咪佢啦(我哋嗰時經常聽佢啲歌，有睇佢拍嗰啲葉念琛嘅戲，都幾鍾意佢)，跟住老婆話佢未必會同你影相啦。點知万刀甲拎轉面，用《獨家試愛》阿華嘅語氣同我哋講，『邊個話我唔會同你哋影相㗎？』如是者，我哋就一齊影相，仲傾咗一陣計，佢話佢係喺大陸拍劇途中，趁有三日空檔，專登飛嚟倫敦睇呢場波，得咁短時間都飛過嚟，可見佢幾愛阿仙奴，又介紹個官方球迷會朋友畀我哋識，話可以搵佢幫手買正價票，唔駛食黃牛。」

Threads網民大讚10大有禮貌藝人丨任達華

有當年做娛樂版實習記者的網民回憶以前因工作需要訪問任達華，初出茅廬不熟悉規矩而十分緊張，但任達華不但請他們吃飯、主動自拍緩解氣氛，訪問結束後更親自送他們搭𨋢，目送電梯門關上才離開，風度翩翩。

原文：

「以前𡃁妹仔做記者時候要去訪問任達華，我同同事兩個初出茅廬勁驚畀藝人黑面呀、阻到人呀⋯因為我哋唔係做開娛樂，完全對娛樂版有咩規矩係一無所知。點知去到，華哥話要叫嘢比我哋一齊食，訪問到咁上下又叫我哋同佢自拍吓先，唔好咁緊張。攝影師影佢，點影都有求必應，臨走送我哋搭𨋢，仲送到見到我哋架𨋢閂晒門先離開，咁好禮貌嘅明星真係好好」

Threads網民大讚10大有禮貌藝人丨張敬軒

有網民表示曾在偶遇張敬軒，而他剛下車準備進入大廈，不過在被網民認出後，他竟在原地等待網民走過去。該網民向他詢問可否合照，雖然當時張敬軒趕時間，但他就讓網民在在原地等待，在10至15分鐘後，他竟然真的出來與他們逐一合照，完全不介意被耽誤了時間，十分有禮貌。

原文：

「幾年前有一日我同幾個frd係街撞到佢，當時見佢岩岩落車行緊入一座大廈，我離遠見到大叫咗佢一聲，佢回頭望住我哋，企咗係度等我哋行過去，行到過去 我記得佢微笑咁逐個望下我哋，我個frd問佢可唔可以影相，佢話「但係我趕時間要入去，一係你哋係度等我一陣」我哋係原位等咗大約10-15分，佢真係出返嚟同我哋逐個影相、仲要我個frd手震影濛咗，佢主動問要唔要影多次」

Threads網民大讚10大有禮貌藝人丨陳凱琳

有網民憶述在疫情時，曾在電車上偶遇陳凱琳與鄭嘉穎一家，當時陳凱琳正是懷孕當中，而網民留意到她沒有戴口罩時，便從手袋中拿出一個給她。Grace亦十分有禮貌表示「sorry 食完飯唔記得戴」，並感激網民。

原文：

「有次佢大住肚加老公帶個仔坐叮叮，果時仲係疫情，見到無戴口罩係手袋拎個出黎遞比佢，佢超有禮貌話：『sorry 食完飯唔記得戴』 唔該前唔該後」

Threads網民大讚10大有禮貌藝人丨陳柏宇

有網民分享曾在九龍灣國際展貿中心偶遇陳柏宇，當時他剛剛錄完節目收工，但亦大方接受網民合照的請求，在拍照時更會就埋角度，令相片更加好看。除此之外，陳柏宇又會與網民聊天，表現十分親民！

原文：

「之前係九展見到佢錄完節目收工，想同佢影相仲勁好仲會就埋你角度，仲會真係同大家傾下計。」

Threads網民大讚10大有禮貌藝人丨馬國明

有網民表示曾在廣播道野生捕獲馬國明，當時他正在與龔慈恩拍攝，在空閒時他亦大方接受網民的合照要求。而在與小朋友合照時，馬國明更特意半蹲下遷就小朋友高度，親和力極佳！

原文：

「有一次係廣播道見到馬明，佢嗰陣同龔慈恩拍緊戲，龔應該咁啱行開咗。想同馬影張相，佢竟然特登半踎就返小朋友高度，好nice好好笑容。」

Threads網民大讚10大有禮貌藝人丨周潤發

有網民憶述小學放榜時在九龍城曾與父母一同偶遇周潤發，當時網民向周潤發表示十分喜歡他主演的《賭城風雲》及《無雙》，而周潤發亦大方與網民一家合照，更搭住網民膊頭主動再合照一張，被評為「零負評男神」！

原文：

「本人遇過嘅明星有發哥，小學放榜嗰日同阿爸阿媽一齊喺九龍城見到佢，同佢講話我好鍾意睇賭城風雲同無雙（嗰陣時無雙上咗冇幾耐）我話好好笑好好睇，佢話唔好笑好認真㗎我哋（我得出個結論係佢哋製作好認真）佢同我一家影嗰張相，再主動話同我影張相，仲要搭住我膊頭，無憾」

來源︰Threads