JACE陳凱詠紅館演唱會尾場！嘉賓林家謙鍾雪瑩掀高潮 眼濕濕哽咽：口話支持但入場就冇人

林家謙送一物令JACE眼泛淚光

焦點嘉賓林家謙出場時，與JACE合唱《想突然》，期間二人更即興跟隨節奏，默契十足地跳了一小段舞。合唱過後，林家謙笑問：「點解初三會搵我嚟做嘉賓？」JACE聞言即發揮其搞笑本色回應：「我想搵你鬧交呀！今日我唔驚你，因為係我主場！」林家謙反擊：「但下一首歌係我主唱喎！」引得全場爆笑。

林家謙貫徹擔任演唱會嘉賓的傳統，花心思為JACE準備了三張親手寫的揮春作為新年禮物，頭兩張走搞笑風，寫有「Chan春常駐」、「人人都JACE」，第三張則是「你太努力」，林家謙認真地說：「想你acknowledge（承認）吓你自己呢七年嘅努力，陳凱詠用咗我哋幾倍努力行到呢個場館，想你proud of（欣賞）你自己，承認自己太努力，所以大家俾多啲掌聲佢。」令JACE瞬間眼泛淚光，強忍淚水匆匆收下揮春。

JACE剖白開紅館演唱會心路歷程

JACE感觸這是最後一場演唱會，並剖白自己的成長：「唉！今日係尾場，好想好想記住你哋每一個，原來開紅館係好唔容易。我天生唔鍾意比較，專注自己嘅嘢，天生算樂觀，有勇氣，但人愈來愈大，好似《天生二品》歌詞內容，能夠保持自己真我、自己性格，真係好唔容易，所以我好幸福，因為有屋企人……我今日諗咗好耐，盡量叫自己冷靜，但係都最後一日，下次紅館要等幾時。」說罷隨即哽咽拭淚。

台下歌迷見狀紛紛高呼「加場」，JACE即時破涕為笑，率真回應：「賣唔晒點算呀？你哋成日都呃人，口話支持但入場就冇人，咁點算呀？但係今日你哋入咗場，所以希望你玩得好開心。希望你哋都可以有力量，俾多啲信心自己，盲目啲去揀一啲支持自己嘅聲音去聽。就算自己未準備好，但係都好好keep住自己條路，繼續努力，一定搵到自己嘅世界，加油！」一番真摯說話贏得全場熱烈掌聲。

影后鍾雪瑩驚喜現身

臨近演唱會尾聲，金馬影后鍾雪瑩驚喜現身encore環節，二人合唱了歌迷期待已久的《Sigue Haciendo 時機已到》，鍾雪瑩唱畢後並未有發言，向觀眾揮手後即降回台下，事後JACE承認鍾雪瑩是一位被演戲耽誤的Rapper，問到二人將來會否合作出歌，JACE說：「以前我哋一齊創作咗好多歌，有諗過推出，不過佢依家電影工作太忙，都冇再諗。」。

兩度encore為演唱會劃上完美句號

演唱會落幕後，一半觀眾久久不肯離去，Encore聲此起彼落，最終成功呼喚JACE再度上台。她再次現身時笑向觀眾說：「聽日初四喎，你哋唔使返工嘅咩？仲唔走嘅？好啦你哋點唱啦！」盡顯親民率真個性。寵粉的JACE即場清唱了半首《蟠HOLD ME TIGHT》以及一曲《I WISH》，唱畢後她再次深深鞠躬道別，為一連兩場的首個紅館演唱會劃上完美句號。

點擊圖片放大